Дар ифтитоҳи маҷлис директори муассиса Марҳамзода Парвизи Исмоил баромад намуда аз ҳайати коллективи кормандону омӯзгорон барои меҳнати софдилона ва иҷроиши саривақтии нақшаву барномаҳои соли таҳсил, бо мувофиқа ва дастуру супоришҳои Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон изҳори қаноатмандӣ ва миннатдории хешро баён намуд.

Сипас тибқи рӯзномаи Шӯро аз ҷониби муовинон, мудирони шӯъбаҳо, кафедраҳо ҳисоботҳо ва натиҷаҳои ҷамъбастии соли таҳсил бо таври муфассал пешкаши ҳозирин гардиданд.

Дар фарҷоми маҷлиси ҷамъбастӣ ба як қатор омӯзнорону кормандоне, ки дар давоми соли хониш фаъолияти хуб нишон дода дар ҷалби довталабон ба муассиса саҳми зиёди худро гузошта буданд бо сипосномаи директори муассиса қадрдонӣ гардиданд.

Январи соли 1967. Сардии фасли дай, ки хуршедро камтар ба ҷилва мебаровард, ҳамоно ҳукумат мекард. Зимистони сардро гиряи кӯдаки нав ба дунё омада дар оилаи сарватманди водии Кӯлоб бобои Маҳмуд дигар намуд. Шодии ин оиларо ҳадду канор набуд. Гуё зиндагӣ ғазали тоза месароиду акнун бо хушиҳо дарашонро мекӯбид.

Бо ниятҳои зиндагии хубу духтари хуштолеъ, баландпарвоз ва хушбахтии фаровон насибаш гардидан, Қумринисо номаш ниҳоданд. Қумринисо ном ниҳоданаш таърихчаи ҳузнангези дигарро дорад. Акнун, духтари эркаи ин оила бо табассумҳои ширини бибию бобо, падару модар ва оғуши гарми пайвандон ба воя мерасиду бехабар аз фардои дарду ғамҳо, ки дар пайи ҳар як шикасташ шириниҳое дошт.

Умри инсонро чун абри раҳгузар гуфтанд, ки беҳуда набудааст. Хурсандиҳои аёми тифлӣ дер давом накард, баъди 6 моҳи таваллуди набера, бобои Маҳмуд ва баъди муддати бибии хонадон низ аз дунё реҳлат карданду зиндагӣ бар души фарзанди хурди гузашт.

Қумринисо бо завқи тамом, хушиҳои зиёд аз зиндагии доштааш раҳсипоре дабистон гашту соҳиби номаи камол низ гардид. Акнун, шебу фарози зиндагӣ ӯро чун духтараки ба камол расида, дар масри худ имтиҳон мекард. Соли 1985 бо мушкилиҳои зиёд донишҷӯи Донишкадаи омӯзгории Кӯлоб ба номи Абуабдуллои Рӯдакӣ гардиду бо сарбаландӣ соли 1992 ин боргоҳи номварро хатм намуд.

Дар муассисаи таълимии №41-и шаҳри Кӯлоб, ки ба ҳайси китобдор қабул гардида буд, фаъолияти меҳнатиро оғоз намуд. Сипас, ба шуъбаи алоқаи шаҳрӣ ва баъдтар дар Кумитаи комсомолии вилояти Кӯлоб корро давом дод. Дар ин коргоҳ, дар тамоми чорабиниҳои сиёсию фарҳангии шаҳр иштирок менамуд. Ва дар муддати 3 соли фаъолият бо ҳамроҳии шахсиятҳои маъруфи вилояти Кӯлоб Раҳимов Ибодулло Ҳабибуллоевич, Раҳмонов Абдуғаффор Азизович, Холов Ҳайдар Сангмадович, Амиров Раҳмоналӣ ва дигаррон корро омӯхта, хизматҳои зиёде анҷом додааст. Фаъолияти пурмаҳсули Маҳмудзода Қумринисоро чун бонуи фаъолу кордон ба инобат гирифта, 15 марти соли 1994 ӯро ба ҳайси вакил аз ҳисоби ҷавонони шаҳри Кӯлоб барои иштирок дар Анҷумани якуми ҷавонони Тоҷикистон ба шаҳри Душанбе равон намуданд. Бонуи фаъолу кордон дар нахустин вохӯрии Раиси Шӯрои олии Ҷумҳурии Тоҷикистон муҳтарам Эмомалӣ Раҳмон бо ҷавонони кишвар иштирок намуд. Аз нахӯстин Анҷумани ҷавонони Тоҷикистон бо Раиси Шӯрои Олии Ҷумҳурии Тоҷикистон муҳтарам Эмомалӣ Раҳмон, ки дар театри опера ва балети шаҳри Душанбе баргузор гардида буд, хотираҳои зиёде дорад. Бахусус, суханони таърихии муҳтарам Эмомалӣ Раҳмон, ки гуфта буд: Имрӯз ман ба нерӯи ҷавонони кишвар эътимоди зиёд дорам. Ва бовар дорам, ки шумо чун созандагони ояндаи миллат дар пешрафти кишвари тозаистиқлоламон саҳми калон мегузоред. Тоҷикистони ҷавон бо Шумо ҷавонон ояндаи дурахшон дорад. Ин вохӯрӣ барояш ҳамеша хотирмону таърихи гардидааст.

Фарози зиндагӣ, гардиши пуртуғёни умр, мушкилиҳои зиёди тақдир, қоматашро нашикаст. Дар аёми ҷавонӣ соли 1998 падари хонадон Маҳумдов Нуралӣ дунёро тарк намуд. Реҳлати падар, маҷрои зиндагии Қумринисоро ба куллӣ дигар кард. Акнун ӯ ба ҷойи падар паҳлуи модар қомат рост карду барои тарбияи 11 нафар хоҳарону бародаронаш камар баст. Дар айёми ҷангҳои шаҳрвандӣ, ки фазои сиёсии кишвар ноором буд, тарбия ва нигоҳ доштани оила мушкилии зиёдеро пеш меовард. Ӯ баъди падар на чун духтари эркаи хонадон балки як марди руинтанеро мемонд, ки бо мақсади зиндагии беҳтар бояд кори бештаре кардаву ошёни падарро саробон бошад. Заҳматҳои зиёду ранҷҳои бешумор, ӯро ҳеҷ гоҳ дилсард накарду рӯҳи падарро ҳамеша чун як Гурдофариди замон ором нигоҳ дошт. Бо обилаҳои дастону заҳматҳои фаровон бародарону хоҳаронашро босавод намуд ва ба роҳи зиндагӣ гусел кард. Ӯ он заҳматҳои гузаштаро ҳамеша ба хотир меораду аз фарзандони муваффақи падар меболад. Чун ин имтиҳони зиндагиро бо сарбаланди пушти сар намудааст.

Дӯстдории касби омӯзгорӣ ӯро соли 1993 ба Омӯзишгоҳи тиббии шаҳри Кӯлоб овард. Ӯ корро аз роҳбари созмони ҷавонони муассиса оғоз намуд. Сипас, раиси Шӯрои занон ва кор бо духтарон, муовини директор оид ба корҳои тарбиявӣ ва акнун муовини директор оид ба илм ва муносибатҳои байналмилалиро дар Муассисаи давлатии таълимии «Коллеҷи тиббии ш.Кӯлоб ба номи Раҳмонзода Раҳматулло Азиз» ба уҳда дорад. Дар муддати 32 соли фаъолият, шикасту рехти зиёдеро пушти сар намуд. Аз муваффақияту комёбӣ ва дастовардҳои зиёди доштааш қаноатманд набуда, ҳоло низ барои фаъолияти бештар мекӯшад. Дар ин муддат ӯ бо унвони баланди медали «Хизмати шоиста» нишонаҳои сарисинагии аълочии маорифи Тоҷикистон, аълочии тандурустии Тоҷикистон, Аълочии фарҳангӣ Тоҷикистон ва чандин ифтихорнома ва сипосномаҳо қадрдонӣ гардидааст.

Маҳмудзода Қумринисо Нуралӣ чун бонуи нексириш ва қавиирода дар роҳи бобарори умр заҳмат кашидаву ҷонфидои касби интихобнамудааш гардидааст. Ба андешаи устод Садриддин Айнӣ «Дар ин солҳои фаъолияти қаламкашию аламкашияш ҳарфҳои таҳсинбарангезу таънабарангезро зиёд шунидаю ба қадри илму дониш расидааст». Ва дар ин сарои пурғубори зиндагӣ дандон болои ҷигар гузошта, дуди чароғ хӯрда ва чун мурғи самандар аз хокистар эҳё шуда, ба фазои матлабу мақсади балантаре расиду болу пари нав кушоду сазовори унвони илимии номзади илмҳои педагогӣ гардидааст. Ба қавле, аз рӯз бурида ба шаб сӯхтаааст ва шабҳои худро аз домани андешаҳои миллатпарварона ва фарҳангдӯстона тулонитар ва паҳнотар намудаву китобе бо номи «Ташаккули салоҳиятҳои касбии донишҷӯёни коллеҷҳои тиббӣ»-ро рӯи чоп овардааст. Инчунин, ӯ зиёда 50 мақолаҳои илмию омавиро интишор намудааст.

Муаллиф ба хотири эҳтиром гузоштан ба ин бонуи пуркору заҳматкаш, ки 32 соли ҳаёти худро ба пешаи омӯзгорӣ равона намудааст, андешаҳои худро рӯи коғаз овардааст. Нигоштаи мо хусусияти таблиғотӣ надорад. Умедворем, зиндагинома ва фаъолияти бисёрсолаи муаллима Маҳмудзода Қумринисо Нуралӣ барои ҷавондухтарон намунаи ибрат хоҳад шуд.

ИБРОҲИМОВ С. Т.,

мудири кафедраи фанҳои гуманитарии

Коллеҷи тиббии ш.Кӯлоб ба номи Раҳмонзода Р. А.

Бо мақсади ҷамъбаст ва натиҷагирӣ аз фаъолияти шашмоҳаи аввал дар Коллеҷи омӯзгории ба номи Хосият Махсумоваи ДДОТ ба номи Садриддин Айнӣ 30-юми июни соли 2025 ҷаласаи умумии ҳисоботӣ баргузор гардид, ки дар он директори муассиса, дотсент Ғафурӣ Зоир Саъдулло, муовини аввали директор, муовинони соҳавӣ, деканони факултетҳо, мудирони кафедраҳо, шуъбаҳо ва бахшҳо, инчунин ҳайати омӯзгорон ва кормандони муассиса иштирок намуданд.

Дар ҷараёни ҷаласа роҳбарияти Коллеҷ фаъолияти шашмоҳаи муассисаро бо нишондиҳандаҳои амиқу мушаххас таҳлил намуда, дастовардҳои назаррас ва самтҳои афзалиятноки корро дар самти таълиму тарбия, омодасозии мутахассисони соҳибмаърифат ва иштироки фаъоли донишҷӯён дар чорабиниҳои илмиву фарҳангӣ ва варзишӣ мавриди баррасӣ қарор дод.

Дотсент Ғафурӣ Зоир Саъдулло зикр намуд, ки рушди соҳаи таҳсилоти касбӣ ва дастгирии пайвастаи муассисаҳои таълимӣ аз ҷониби Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, неруи муҳимми пешбарандаи соҳа буда, иқдому таваҷҷуҳи хосаи Пешвои миллат нисбати рушди илм ва маърифат боиси сарфарозӣ ва масъулияти баланд мегардад.

Ҳамзамон, қайд гардид, ки омӯзгорону донишҷӯёни муассиса дар озмуну олимпиадаҳои сатҳи шаҳрӣ ва ҷумҳуриявӣ, аз ҷумла дар гирифтани Стипендияи Президентӣ, Стипендияи Раиси шаҳри Душанбе ва дигар ҷоизаҳо дастовардҳои шоён ба даст овардаанд. Дастгирии кадрҳои ҷавоне, ки ба фаъолияти илмиву таҳқиқотӣ рӯ овардаанд, яке аз самтҳои муҳимми самти кадрии Коллеҷ арзёбӣ гардида, барои омӯзгороне, ки рисолаҳои илмии номзадӣ ва докториро дифоъ менамоянд, мукофотпулиҳо ҷудо карда мешавад.

Директори Коллеҷ аз самтҳои дигари фаъолияти муассиса ташкили дарсҳои сайёр дар мавзеъҳои таърихию фарҳангӣ, тарғиби худшиносиву хештаншиносӣ ва баланд бардоштани ҳисси ватандӯстии донишҷӯён ёдоварӣ гардид.

Дар охири ҷаласа мудири бахши идоракунии сифати таҳсилот Мастура Қосимова ва муовини директор оид ба корҳои тарбиявӣ Муродҳусайн Илҳомов ба музокира баромада, фаъолияти шашмоҳаи Коллеҷ қаноатбахш арзёбӣ карданд. Инчунин, барои самаранок амалӣ намудани стратегияҳо ва барномаҳои давлатӣ, баланд бардоштани сифати таълиму тарбия ва таъмини рақобатпазирии мутахассисони оянда ба масъулин супоришу дастурҳои мушаххас дода шуд.

30-юми июни соли равон дар Литсейи касбии техникии нақлиёти автомобилии шаҳри Душанбе ҷаласаи васеи Шурои муҳандисӣ омузгорӣ, ки баррасии натиҷаи фаъолияти литсей дар соли таҳсили 2024-2025 ва вазифаҳо барои соли таҳсили 2025-2026-ро дар бар мегирифт, дар сатҳи баланд баргузор гардид.

Зимни баргузории ҷаласа фаъолияти бисёрҷабҳаи литсей, дастовардҳои омӯзгорон, кормандон ва хонандагони муассиса мавриди таҳлил қарор гирифта, барои соли таҳсили 2025-2026 вазифагузориҳо карда шуд.

Дар ҷаласа омӯзгорон, устоҳои таълимӣ ва кормандони хоҷагӣ иштирок карданд.

Дар ифтитоҳ директори муассиса номзади илмҳои иқтисодӣ Иматчоев Зинатшо Хизматшоевич оиди фаъолияти таълимию методӣ, илмӣ-тарбиявӣ, робитаҳои байналмилалӣ, ташкилию тарбиявӣ ва маъмурию хоҷагии литсей муфассал сухан ронд.

Вобаста ба ҳисоботи директори литсей Раҳмонов Нуриддин муовини директор оид ба таълими истеҳсолӣ ибрози андеша карда, фаъолияти солонаи литсейро самаранок ва қаноатбахш арзёбӣ намуд.

Дар идома,Ҷамшед Нуров, муовини директор оид ба корҳои хоҷагӣ-маъмурии муассиса ба музокира баромада, фаъолияти литсейро дар давраи ҳисоботӣ мусбат арзёбӣ намуд ва дар пайвастагӣ ба ин, фикру пешниҳодҳои худро иброз дошт.

30-юми июни соли 2025 ҷиҳати натиҷагирӣ аз фаъолияти шашмоҳаи аввали соли 2025 дар Коллеҷи омӯзгории шаҳри Кӯлоб ҷаласаи умумии ҳисоботӣ баргузор гардид, ки дар он директори муассиса, номзади илмҳои педагогӣ, дотсент Одиназода Латофат Амиршо, муовинони директор, деканони факултетҳо, мудирони кафедраҳо, шуъбаю бахшҳо, инчунин ҳайати омӯзгорон ва кормандони қисмати хоҷагидории муассиса иштирок намуданд.

Директори муассиса ҷаласаро ифтитоҳ намуда, зимни баромади худ иброз доштанд, ки пешрафти соҳаҳои ҳаёти ҷомеа аз сиёсати давлатӣ дар соҳаи маориф вобастагии зич дорад. Бесабаб дар Тоҷикистон рушди соҳаи мазкур яке аз самтҳои афзалиятноки сиёсатии Ҳукумати Ҷумҳурии Тоҷикистон муқаррар нашудааст. Зеро таҳкурсӣ ва пояи рушди соҳаи иқтисодиёту сиёсат ва иҷтимоиёту фарҳанг аз омода кардани кадрҳои баландихтисос вобаста мебошад.

Лозим ба ёдоварист, ки ҳамасола бо ҷонибдорӣ аз сиёсати хирадмандона ва маорифпарваронаи Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмон дар тамоми шаҳру ноҳияҳои кишвари азизамон муассисаҳои нави таълимӣ бо шароити муосиру ҷавобгӯ ба талаботи замон бунёду мавриди баҳрабардорӣ қарор мегирад, то насли имрӯзу оянда соҳибилму донишманд гарданд ва барои рушди Тоҷикистони соҳибистиқлол саҳмгузор бошанд.

Соҳаи маориф зербинои асосии пешрафти ояндаи давлату миллат буда, дуруст ба роҳ мондани корҳои таълимиву илмӣ ва тарбиявию ҷамъиятӣ дар тамоми зинаҳои таҳсилот барои омода кардани кадрҳои баландихтисос ва ҷавобгӯ ба талаботи рақобати бозори меҳнат таъсири бевосита мегузорад.

Дар идомаи ҷаласа ҳисоботи муовинони соҳавӣ, деканони факултетҳо ва мудирони шуъбаҳову кафедраҳо шунида шуд.

Баромадкунандагон зимни ироаи ҳисоботҳои худ зикр намуданд, ки омӯзгорону донишҷӯёни муассиса дар давраи ҳисоботӣ дар озмуну олимпиадаҳои ҷумҳуриявии сатҳи шаҳрӣ, вилоятӣ ва ҷумҳуриявӣ, аз ҷумла Озмуни ҷумҳуриявии "Фурӯғи субҳи доноӣ китоб аст", "Илм-фурӯғи маърифат", Тоҷикистон-Ватани азизи ман" ва олимпиадаи фаннӣ ширкат карда, соҳиби ҷой гардида, ба даври вилоятӣ ва ҷумҳуриявӣ роҳхат гирифтанд. Ҳамзамон, баҳри зиёд намудани иқтидори илмии муассиса аз ҳисоби кадрҳои ҷавон якчанд омӯзгори муассиса ба корҳои илмӣ-таҳқиқотӣ машғуланд. Аз он ҷумла, Шарипов Раҳмоналӣ омӯзгори кафедраи математика-информатика иҷозаи ҳимояи рисолаи номзадиашро дар моҳи сентябри соли равон соҳиб шудааст. Дар умум дар ҳама самтҳо дар коллеҷ натиҷаҳо хуб буданд.

Дар идомаи ҷаласаи аз ҷониби директори муассиса доир ба масъалаҳои рухсатии кормандону омӯзгорон, пардохти саривақтии рухсатпулиҳо, ба истироҳатгоҳҳо ҷалб намудани омӯзгороне, ки дар давоми сол заҳмату меҳнати зиёд кашиданд, дастгирии донишҷӯёни ятиму имконияти маҳдуддошта ва иштирокчиёни озмунҳои болозикр ва тақсимоти вазифаҳо барои соли нави хониш ба масъулин дастуру супориши қатъӣ мушаххас дода шуд.

Дар ҷамъбасти ҷаласа як қатор омӯзгороне, ки дар давоми сол фаъолияти назаррас доштанд, бо ифтихорнома ва сипосномаҳои Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон қадрдонӣ гардиданд.

Санаи 01 июли соли 2025 таҳти раёсати директори Литсейи касбии техникии сохтмони шаҳри Душанбе н.и.п. Саидзода Аҳмадшо Раҳматшо бо иштироки васеъи омӯзгорону кормандон Шурои муҳандисию омӯзгории кормандони Литсей баргузор гардид, ки дар кори Шуро фаъолияти муассиса дар соли таҳсили 2024-2025 иҷрои Қонуну Барномаҳои давлатӣ, Стратегияву нақша чорабиниҳои дар самти таҳсилоти ибтидоӣ ва миёнаи касбӣ, нақшаи кории Литсей, натиҷагири карда шуд.

Ба кори ҷаласа директори муассиса Аҳмадшо Саидзода ифтитоҳ бахшида, аз фаъолияти таълимию методӣ, илмӣ-тарбиявӣ, робитаҳои байналмилалӣ, ташкилию тарбиявӣ ва маъмурию хоҷагии литсей дар як сол натиҷагирӣ намуд.

Зимни натиҷагирӣ аз фаъолияти директори муассиса изҳор дошт, ки ҳайати кормандони муҳандисию омӯзгории Листей соли таҳсили 2024-2025-ро бо дастовардҳои назаррас аз ҷониби омӯзгорон, кормандон ва хонандагон паси сар намуданд. Мисоли равшани ин гуфтаҳо иштирок ва сазовари ҷойҳои намоён гардидани хонандагон дар озмунҳои сатҳи ҷумҳуриявӣ мебошад. Бояд гуфт, ки дастовардҳои ба даст омада ҳамчун омили муаррификунанда барои фаъолияти минбаъдаи пурсамари муассиса ва аҳли коллективи кормандон нақши басо муҳим дорад.

Дар идомаи кори Шуро муовинони директор Исматова Н.Ҳ ва Сафолов А.Н. омӯзгори фанни таърих ва ҳуқуқ Каримов Навруз ба музокирот баромада фаъолияти муассисаро қаноатбахш арзёбӣ намуданд. Сипас директори муассиса н.и.п Аҳмадшо Саидзода ба ҳайати омӯзгорону кормандон ҷиҳати ноил шудан ба дастовардҳои боз ҳам баландтар дар соли таҳсили 2025-2026 дастуру супоришҳои мушаххас дода, вобаста ба иҷрои онҳо аз ҷониби аъзоёни Шурои муҳандисию омӯзгорӣ қарорҳои дахлдор қабул гардида, шахсони масъул вазифадор карда шуданд.

Мавриди зикр аст, ки дар анҷоми кори Шуро аз ҷониби маъмурияти Литсей устоҳои таълимие, ки хонандагонашон дар озмуни ҷумҳуриявии "Малакаи касбӣ " сазовори ҷойҳои намоён гардидаанд, бо Ифтихорнома мукофотонида шуданд.

30 июни соли 2025 таҳти раёсати директори Коллеҷи муҳандисию омӯзгории шаҳри Душанбе ҷаласаи васеи Шӯрои олимон баргузор гардид, ки дар он натиҷаҳои фаъолияти муассисаи таълимӣ дар самтҳои фаъолияти таълимӣ-методӣ, илмӣ-таҳқиқотӣ, тарбиявӣ, равобити хориҷӣ ва молиявию хоҷагидорӣ дар шашмоҳаи аввали соли 2025 мавриди баррасӣ ва таҳлил қарор гирифта шуда, натиҷагирӣ ва барои соли нимсолаи минбаъдаи соли 2025 вазифагузориҳо карда шуд.

Барои баррасии масъалаи мазкур муовинони директор аз рӯи соҳаҳои дахлдор, сардорони воҳидҳои сохторӣ бо маълумотномаи муфассал баромад намуданд.

Дар рафти натиҷагирӣ аз фаъолияти Коллеҷ директори муассисаи таълимӣ номзади илмҳои техникӣ, дотсент Рабизода Наҷибулло изҳор дошт, ки вобаста ба татбиқи дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баланд бардоштани сифати таҳсилот ва омодасозии мутахассисони рақобатпазир, ҷалби шунавандагон ба курсҳои кӯтоҳмуддати омӯзишӣ, такмили ихтисоси омӯзгорон дар хориҷи кишвар, омӯзиши забонҳои хориҷӣ ва тақвият бахшидани иқтидори кадрӣ, аз ҷумла устодони дорои дараҷа ва унвони илмидошта, иштироки фаъолонаи донишҷӯёну омӯзгорон дар озмуну олимпиадаҳои сатҳҳои гуногун,тавсеа бахшидани робитаҳои судманд бо муассисаҳои таҳсилоти миёнаи касбии хориҷи кишвар, таваҷҷуҳ ба пояи моддӣ-техникӣ, таҷҳизонидани озмоишгоҳҳо мавсъалаҳое мебошанд, ки раёсат ва коллективи меҳнатии коллеҷ аҳамияти аввалиндараҷа зоҳир намуда, нерӯи созандаи худро ба он равона карда, ба натиҷаҳои дилхоҳ ноил гардида истодааст.

Дар интиҳои ҷаласа, директори Коллеҷи муҳандисию омӯзгории шаҳри Душанбе Рабизода Н. аз ҳайати омӯзгорон ва кормандон даъват ба амал овард, ки дар нимсолаи дуюми соли 2025 бо масъулияти дучанд барои расидан ба нишондиҳандаҳои боз ҳам баландтар кӯшиш намоянд. Вобаста ба самтҳои асосии фаъолияти минбаъда, аз ҷониби Шӯрои олимон қарорҳои дахлдор қабул гардиданд.

Дар толори маҷлисгоҳ бо иштироки тамоми омӯзгорону кормандони коллеҷи техникӣ фаъолияти шашмоҳаи коллеҷи техникии ДТТ ба номи академик М.Осимӣ шунида шуд.

Ҷаласаро директори коллеҷи техникӣ муҳтарам Низомзода Зокирҷон ифтитоҳ намуда, масъалаҳои баррасишавандаро мавриди муҳокима ва баррасӣ қарор дод.

Сипас, тибқи рузномаи ҷаласа барои баррасӣ ва муҳокима намудани натиҷаи самтҳои фаъолияти коллеҷ дар шашмоҳаи соли ҷорӣ навбати сухан ба муовинони директор дода шуд.

Муовинони директор оид ба натиҷаи самти фаъолияти худ дар шашмоҳи соли ҷорӣ баромад намуда, ҷиҳати корҳои ба сомон расонида дар назди ҳамагон ҳисобот дода, қайд намуданд, ки камбудию нуқсониҳои ҷойдоштаро ошкору роҳҳои бартарафсозии онҳо ва самтҳои афзалиятноки пешрафти коллеҷро дар самти худ муайян карда, бояд ҷидду ҷаҳд намоем ва кӯшиш ба харҷ диҳем, ки иҷрои амалии нақшаҳои ояндаамонро дар соли таҳсили дар пешистода таъмин сохта, дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмонро ҷомаи амал пӯшонида, ҳиссаи арзандаи худро дар беҳдошти сифати таҳсилот, раванди таълиму тарбияи донишҷӯён гузорем.

Пас аз анҷоми ҳисоботҳо баромадкунандагон ба саволҳои аъзои Шӯрои олимон ва омӯзгорону кормандон ҷавобҳои саҳеҳу қаноаткунанда дода, иловатан қайд карданд, ки мақсаду мароми ҳар як сохтор ин беҳдошти сатҳи сифати таълиму тарбияи донишҷӯён, дилгармии омӯзгорон нисбати касби омӯзгорӣ, муҳайё намудани шароити мехнати омӯзгорону донишандӯзии донишҷӯён, таъмини муассисаамон бо воситаҳои замонавии таълим, ҷалби донишҷӯёну омӯзгорон ба корҳои эҷодӣ, навоварӣ, мувофиқи талаботҳои меъёрию ҳуқуқӣ ташкил кардани ҳуҷҷатнигорӣ дар тамоми воҳидҳои сохтории коллеҷ ва бо меҳнати ҳалолу таҳсили хуб ҷавоб гардонидан аст.

Дар муҳокимаи ҳисоботҳо дар шашмоҳаи соли ҷорӣ аъзои Шӯрои олимон ва омӯзгорону кормандон қайд намуданд, ки дар ҳақиқат муассисаи таълимии мо соли таҳсили ҷорӣ ба бисёр дастовардҳои назаррас ноил гардид, тағйироти куллӣ дар ҳамаи самтҳои фаъолиятамон ба вуҷуд омаданд. Агар ҳар як корманди коллеҷ камбудиҳои фаъолияташро бартараф созад ва супоришҳои роҳбарияти коллеҷро дар хусуси рушди ояндаи коллеҷ дар амал татбиқ намояд, боз ба натиҷаҳои беҳтар ноил мешавем. Корҳои наҷиби ба сомон расонидаи муовинони директорро ба инобат гирифта, фаъолияти коллеҷро дар шашммоҳаи соли ҷорӣ қаноатбахш арзёбӣ намуда, бо боварии комил гуфта метавон, ки дар оянда ба комёбиҳои ҷолиби диққати ҳамагон ноил хоҳем гашт.

Аслан истеъдод ҳам, ҳунар ҳам, пеш аз ҳама, худи инсон аст. Инсоне, ки метавонад ва қодир аст дар вуҷуду сиришти хеш ҳама оламро ғунҷоиш диҳад ва тасхир созад. Номаи сарнавишти ҳунарманди асил бошад, барои дигарон аз ҳама ҷиҳат аҷоибу мароқангез аст. Муҳаббат атои Парвардигор аст. Дилеро, ки аз нури муҳаббат равшан аст, шикастану афсурда сохтан сахт душвор аст.

Кенҷабой Норматов ҳам аз ҳамин тоифа инсонҳост. Худованд барояш дили муҳаббатборе туҳфа намудааст. Кенҷабой Норматов зодаи ноҳияи Спитамен. Аз хурдӣ ба санъати мусиқӣ меҳр бастааст. Ин меҳр ӯро ба омӯзишгоҳи мусиқии ба номи Содирхон Ҳофизи шаҳри Хуҷанд меоварад.

Ӯро ҳунарманди бузург, рубобнавози моҳир Одилҷон Назаров ба шогирдӣ қабул менамояд. Омӯзишгоҳи мусиқиро бо баҳои аъло хатм намуда, бо ҳидояти устодаш ба консерваторияи давлатии шаҳри Тошкенти Ҷумҳурии Ӯзбекистон дохил мегардад. Дар он ҷо аз профессор Васильев Ф.Н. дарси санъати касбиро меомӯзад.

Баъди хатми консерватория бо дипломи аъло ба шаҳри Хуҷанд бармегардад ва дар омӯзишгоҳи мусиқии ба номи Содирхон Ҳофизи шаҳри Хуҷанд ба сифати омӯзгори рубоб ва дирижёрӣ ба кор шурӯъ менамояд. Устод чун роҳбари оркестри созҳои мардумӣ дар оркестр навгониҳо ҷорӣ менамояд. Дар оркестр асарҳои рангоранг ва калонҳаҷм садо медоданд. Асарҳои композиторони ҷаҳон ворид гашта иҷроиши асарҳо ба касбият мубадал гаштанд.

Устод Норматов К. дар давоми ин солҳо шогирдони зиёдеро тарбия намудааст, ки онҳо имрӯзҳо дар тамоми гӯшаву канори Ватани азизамон ва берун аз он кор ва фаъолият мебаранд. Камина яке аз аввалин шогирдони устод ҳастам ва мефахрам аз он ки аз устод сабақ гирифтам. Хушбахтона имсол устоди азиз ҷашни мавлуд доранд, он кас ба синни мубораки 80 расиданд.

Ворис РАҲМОНЗОДА,

композитор, омӯзгори Коллеҷи санъати ба номи Содирхон Ҳофизи шаҳри Хуҷанд

Дар Литсейи касбии техникии шаҳри Ҳисор ҷаласаи васеи Шӯрои муҳандисию омӯзгорӣ бо иштироки ҳайати омӯзгорону кормандон баргузор гардид, ки дар он натиҷаҳои фаъолияти муассисаи таълимӣ дар шашмоҳаи аввали соли 2025 мавриди баррасӣ ва таҳлил қарор гирифт.

Ҷаласаро директори Литсейи касбии техникии шаҳри Ҳисор Зарина Бурихонова ифтитоҳ намуда, роҷеъ ба фаъолияти муассиса дар нимсолаи аввали соли 2025 маълумот дод. Зикр гардид, ки муассиса дар ин давра ба як қатор дастовардҳои назаррасу шоиста сазовор гардид.

Аз ҷумла, дар даври ниҳоии Озмуни ҷумҳуриявии «Малакаи касбӣ», ки рӯзҳои 26-27 май дар шаҳри Душанбе баргузор шуд, хонандаи муассиса Манзура Ҳайдарова,иштирок карда, дар номинатсияи «Дӯзанда» сазовори ҷойи аввал шуд, ки ин боиси ифтихори тамоми кормандони литсей аст. Инчунин, аз рӯи ихтисоси «Барқчӣ оид ба таъмири қисмҳои барқии автомобил» Пиров Исроилҷон ҷойи сеюм ва аз рӯи ихтисоси «Ронандаи автомобил» Тоҳиров Ҷовид сазовори ҷойи сеюм шуданд, ки дастоварди шоистаанд.

Таъкид шуд, ки муассиса дар ин давра мутахассисони варзидаро аз рӯи ихтисосҳои “Системаи компютер ва интернет-технология», «Кафшергари газӣ-барқӣ», «Тракторист-мошинисти истеҳсолоти кишоварзӣ», «Челонгар оид ба таъмири муҳаррики автомобил», «Ронандаи автомобил бо гирифтани дараҷаи В, С», «Ҳисобчӣ (бо омӯзиши кор дар компютер)», «Дӯзанда» ва «Барқчӣ оид ба таъмири қисмҳои автомобил» омода карда, ба бозори меҳнат ворид намуд.

Дар қисмати музокира як қатор омӯзгорон ва устоҳои таълимӣ-истеҳсолӣ баромад карда, фаъолияти муассисаро дар ин давра қаноатбахш арзёбӣ намуданд.

Дар хотима дирекори литсей ба аъзои Шӯро барои фаъолияти босамар дар соли таҳсили 2025-2026 дастуру супоришҳои мушаххас дода, таъкид намуд, ки ҳар як омӯзгор вазифадор аст дар пайи татбиқи сиёсати созндаи Пешвои миллат муҳтарам Эмомалӣ Раҳмон барои дар сатҳи баланд омода кардани кадрҳои коргари нақши сазовор гузорад.

1-уми июли соли 2025 бо мақсади натиҷагирӣ аз фаъолияти шашмоҳа ҷаласаи васеи Шӯрои олимони Коллеҷи технологии шаҳри Душанбе баргузор гардид, ки дар он Бобоҷон Маҳмадализода – сардори раёсати таҳсилоти миёнаи касбии Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, Сино Амирбекзода – директори коллеҷ, муовинони директор, сардорони шуъбаҳо, деканҳои факултетҳо, мудирони кафедраҳо ва омӯзгорону кормандон иштирок намуданд.

Дар оғоз директори коллеҷ Сино Амирбекзода оид ба фаъолияти таълимию методӣ, илмӣ-таҳқиқотӣ, робитаҳои хориҷӣ, ташкилию тарбиявӣ ва маъмурию хоҷагии коллеҷ муфассал суханронӣ кард. Зимни суханронӣ изҳор дошт, ки маъмурияти Муассисаи давлатии таълимии «Коллеҷи технологии шаҳри Душанбе» дар соли таҳсили 2024-2025 ва шашмоҳаи аввали соли 2025 ҷиҳати дар амал татбиқ намудани дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба эълон намудани солҳои 2020-2040 ҳамчун «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» ва эълони солҳои 2025-2030 «Солҳои рушди иқтисоди рақамӣ ва инноватсия» ва оид ба баланд бардоштани сатҳу сифати таҳсилот дар зинаҳои таҳсилоти ибтидоӣ ва миёнаи касбӣ фаъолияти худро ба роҳ монда, дар самти таълим, фаъолияти илмию таҳқиқотӣ, инноватсионӣ, ташкилию тарбиявӣ, маъмурию хоҷагидорӣ ва тавсеаи базаи моддию техникӣ корҳои назаррасеро ба анҷом расонидааст.

Қайд гардид, ки маъмурияти коллеҷ бо мақсади самаранок ба роҳ мондани фаъолияти минбаъда дар мувофиқа бо Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон сохтори коллеҷро таҷдид намуда, дар шакли нав тасдиқ намуд ва инчунин бо мақсади эътироф гардидани фаъолияти коллеҷ ҳамчун муассисаи давлатии таълимии зинаи таҳсилоти миёнаи касбӣ аз ҷониби Агентии назорат дар соҳаи маориф ва илми назди Президенти Ҷумҳурии Тоҷикистон «Иҷозатнома» оид ба пешдури фаъолияти таълимӣ гардид.

Дар муҳокима ва музокираи ҳисобот Маҳмадализода Бобоҷон, сардори раёсати таҳсилоти миёнаи касбии Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, муовинони директор, устодону омӯзгорони коллеҷ баромад намуда, ҳисоботи директори коллеҷро самаранок ва қаноатбахш арзёбӣ намуданд.

2 июли соли 2025 дар Коллеҷи омӯзгории шаҳри Бохтар ҷаласаи васеи Шӯрои олимон баргузор гардид. Дар ҷаласа директори коллеҷ Шамъигул Шарифзода, муовинони директор, устодон ва дигар аъзоёни шӯро иштирок доштанд.

Тибқи рӯзномаи ҷаласа масъалаҳои марбут ба ҷамъбасти сессияи ҷорӣ, натиҷаи аттестатсияи давлатии хатмкунандагон, ҳисоботи муовинони директор, мудирони кафедраҳо, сардорони шӯъбаҳо оид ба соли таҳсили 2024 - 2025, вазъи пардохти маблағи таҳсил ва иҷрои барномаҳои давлатӣ дар нимсолаи дуюм баррасӣ шуданд.

Зикр гардид, ки Шӯрои олимон ҳамчун як ниҳоди муҳими илмӣ-назариявӣ, саҳми арзанда дар рушди фаъолияти таълимӣ, тарбиявӣ ва илмии муассиса дорад. Аъзоёни шӯро дар робита ба самтҳои гуногуни фаъолият суханронӣ намуда, пешниҳодҳои худро ироа намуданд.

Директори муассиса масъалаҳои матраҳшударо таҳлил намуда, барои бартарафсозии камбудиҳо ва тақвияти фаъолияти соҳаҳо ба шахсони масъул дастуру супоришҳои мушаххас дод. Таъкид шуд, ки бо назардошти ҳидоятҳои Пешвои миллат муҳтарам Эмомалӣ Раҳмон чораҳои зарурӣ ҷиҳати баланд бардоштани сифати таҳсил ва омодасозии мутахассисони рақобатпазир андешида шаванд.

Дар интиҳо, қарорҳои дахлдор вобаста ба масъалаҳои рӯзномаи ҷаласа баррасӣ ва натиҷагирӣ гардиданд.

Таҳти ин унвон дар толори Маркази ҷавонони шаҳри Кӯлоб бо ташаббуси роҳбарияти Коллеҷи омӯзгории шаҳри Кӯлоб бахшида ба 28 умин солгарди Рӯзи Ваҳдати миллӣ чорабинии маърифатӣ-фарҳангӣ баргузор гардид.

Дар чорабинӣ директори коллеҷ номзади илмҳои педагогӣ, дотсент, Одиназода Латофат Амиршо, роҳбари дастгоҳи раиси шаҳри Кӯлоб Қурбонзода Наргис, муовини КИ ҲХДТ дар шаҳри Кӯлоб Саймуминзода Фирӯз, мудири бахши бойгонӣ - матбуотии Мақомоти иҷроияи ҳокимияти давлатии шаҳри Кӯлоб Нусратзода Шаҳноза, собиқадори меҳнат Валиева Саъбагул, садорати коллеҷ ва омӯзгорону донишҷӯён иштирок намуданд.

Зимни сухани ифтитоҳӣ директори муассиса аз Ваҳдати миллӣ дар мамлакатамон ба ҳайси неъмати бузург ва таърихии даврони Истиқлол ёдовар шуда, онро сарчашмаи субот, рушди устувори миллӣ ва таҳкими пояҳои давлатдорӣ дар самти бунёди давлати комили демокративу ҳуқуқбунёд маънидод намуд.

Роҳбари муассиса зимни баромади худ иброз намуданд, ки Ваҳдати миллӣ ҳамчун падидаи сарнавиштсоз ба хотири таъмини сулҳ ва барқарорсозии амнияту оромӣ дар Ҷумҳурии Тоҷикистон баъди солҳои душвору пурфоҷеаи ҷанги шаҳрвандӣ ба даст омада, маҳсули иродаи қавӣ, сиёсати хирадмандонаю сулҳҷӯёна, инчунин заҳматҳои шабонарӯзию пайвастаи Асосгузори сулҳу ваҳдати миллӣ - Пешвои муаззами миллат муҳтарам Эмомалӣ Раҳмон мебошад.

Дар рафти чорабинии имрӯза Қурбонзода Наргис, Валиева Саъбагул, Саймуминзода Фирӯз, Ҳусейнов Зарифбой суханони пурмуҳтавои худро вобаста ба арзишҳои миллию давлатии Ваҳдат ба ҳозирин ироа намуданд.

Роҳбари дастгоҳи раиси шаҳри Кӯлоб Қурбонзода Наргис маъмурият ва аҳли кормандону донишҷӯёни муассисаро аз номи Мақомоти иҷроияи ҳокимияти давлатии шаҳри Кӯлоб табрик намуда, дар идомаи суханрониашон қайд намуданд, ки Ваҳдати миллӣ яке аз дастовардҳои шоёни сиёсист, ки барои ба даст овардани он аввалиндараҷа Пешвои миллат муҳтарам Эмомалӣ Раҳмон ва дигар фарзандони ҷасури Ватан ҷони худро дареғ надошта, хизматҳои шоён кардаанд. 27 июни соли 1997 дар шаҳри Маскави Федератсияи Русия Созишномаи умумии истиқрори сулҳ ва ризоияти миллӣ дар Ҷумҳурии Тоҷикистон ба имзо расид ва бо шарофати он халқи тоҷик аз вартаи ҷангу хунрезиҳо раҳо шуд. Ваҳдат, ки ҳамчун рамзи озодӣ ва осудагист бояд ҳифзи он шоири ҳамешагии ҳамаи мо бошад.

Сипас, омӯзгорони фаъол ва донишҷӯёни муассиса, ки дар даври муассисавию шаҳрии озмунҳои ҷумҳуриявӣ ғолиб шуданд, бо сипосномаи директори коллеҷ ва Нишони аълочии Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон қадрдонӣ шуданд.

Дар қисмати фарҳангии чорабинӣ донишҷӯёни муассиса бо суруду тарона ва шеъру рақсҳои зебо ҳозиринро мафтун сохтанд.

Дар ҷамъбасти чорабинӣ таъкид гардид, ки Ваҳдати миллӣ арзиши муҳиму муқаддас ва кафили бақои халқу давлат буда, ҳифзи он вазифаи муқаддаси ҳар як сокини ин сарзамин ба ҳисоб меравад.

Охири моҳи июни соли 2025 сафари кории Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Вилояти Мухтори Кӯҳистони Бадахшон баргузор шуд. Ин сафар барои рушди минбаъдаи минтақаҳои кӯҳистони кишвар ва беҳтар кардани сатҳи зиндагии мардум аҳамияти бузург дошт ва бо иқдомоти мушаххасу судманд хотирмон гардид.

Албатта, қудуми мубораки Пешвои миллат ба гӯшаҳои дурдасти Ватан ҳамчун нури умед, муҳаббат ва ваҳдат дар дили мардум ҷой мегирад. Сафарҳои кории Пешвои маҳбуби миллат муҳтарам Эмомалӣ Раҳмон ба Вилояти Мухтори Кӯҳистони Бадахшон ҳамеша маънии фаротар аз боздид доранд. Онҳо рамзи самимияти давлату миллат, намунаи пайванди қавии ҳокимият бо мардум ва таҷассуми амалӣ шудани сиёсати созандаи Пешвои миллат мебошанд.

Сафари навбатии Пешвои миллат ба ВМКБ дар арафаи таҷлили Рӯзи Ваҳдати миллӣ натанҳо иқдоми расмӣ, балки ҳамчун изҳори эҳтиром ба сокинони кӯҳистон, ки ҳамеша дар маркази таваҷҷуҳ ва дастгириҳои давлат қарор доранд, маънидод мегардад. Дар шароите, ки ҷаҳон шоҳиди шикастҳои низомии зиёд ва фурӯпошии давлатҳо мегардад, таҳкими ваҳдату субот ва сафар ба гӯшаҳои дурдасти кишвар шаҳодати сиёсати хирадмандонаи Пешвои миллат мебошад.

Аз 25 то 28-уми июн Сарвари давлат дар шаҳру ноҳияҳои вилоят буданд ва дар ин муддат як қатор иншооти муҳими иҷтимоӣ ва инфрасохториро бо ҳузури мубораашон ба истифода доданд, ки барои беҳтар кардани хизматрасонӣ ва шароити зиндагии сокинон аҳамияти калон доранд. Дар шаҳри Хоруғ, ки маркази маъмурии вилоят аст, бо иштироки Пешвои миллат чойхонаи сеошёнаи “Хатлон” ифтитоҳ гардид, ки барои фароҳам овардани ҷойҳои корӣ ва дастгирии соҳибкорӣ дар минтақа нақши муҳим дошта, дар ин баробар, ваҳдати ду вилояти бузурги ҷумҳуриро таҷассум мекунад. Ин чойхона бо шароити замонавӣ ва тарҳи зебо барои хизматрасонии босифат ба аҳолӣ ва меҳмонон равона шуда, гӯшае аз Хатлони бостон дар ин диёр аст.

Дар ҷараёни ин сафар, ки аз ноҳияи Ванҷ оғоз ёфт як қатор иншоотҳои муҳими иҷтимоӣ, иқтисодӣ ва фарҳангиро ифтитоҳ намуда, бо мардум рӯ ба рӯ сӯҳбат карданд, суханони илоҳомбахш гуфтанд ва боз ба хотир оварданд, ки Ваҳдати миллӣ меваи муштараки ирода, сабр ва хирад аст, зеро маҳз бо роҳбарии хирадмандонаи Пешвои миллат, Тоҷикистон аз вартаи ҷанги шаҳрвандӣ ба марҳилаи сулҳу субот ва рушд расид.

Ҳамин тавр, дар ноҳияи Ванҷ, ки яке аз минтақаҳои муҳимтарини вилоят ба ҳисоб меравад, бо дастгирии Пешвои миллат ҳашт муассисаи томактабӣ ифтитоҳ гардиданд, ки ин барои таълиму тарбияи фарзандони минтақа ва беҳтар шудани сатҳи илму дониш дар қаламрави вилоят заминаи устувор мегузорад.

Дар ноҳияи Рӯшон низ як қатор иншооти муҳим, аз ҷумла неругоҳҳои хурд ифтитоҳ гардиданд, ки ҷиҳати таъмини истиқлоли энергетикӣ саҳми назаррас мегузоранд. Сарвари давлат зимни мулоқоташон бо сокинони ноҳия бо қаноатмандӣ изҳор доштанд, ки дар натиҷаи заҳмату талошҳои ватандӯстонаи сокинон ва ғамхориву дастгириҳои доимии Ҳукумати мамлакат имрӯз симои ноҳияи Рӯшон куллан дигаргун гардидааст, зеро Ҳукумати мамлакат барои ҳалли масъалаҳои иҷтимоиву иқтисодии ноҳия ва таъмин намудани рушди он тайи 34 соли соҳибистиқлолӣ ҳамаи тадбирҳои заруриро амалӣ намуд ва ин равандро идома дода истодааст.

Таъкид гардид, ки дар ин давра аз ҳисоби ҳамаи манбаъҳои маблағгузорӣ барои рушди ноҳия беш аз 1,4 миллиард сомонӣ равона карда шуда, танҳо аз ҳисоби буҷети давлатӣ 660 миллион сомонӣ ҷудо гардидааст, ки зиёда аз 346 миллион сомонии он маблағҳои мақсаднок барои пӯшонидани хароҷоти буҷети ноҳия мебошанд.

Бояд гуфт, ки дар замони соҳибистиқлолӣ дар ҳудуди ноҳия 10 лоиҳаи сармоягузории давлатӣ татбиқ гардида, ҳоло амалисозии боз 5 лоиҳаи дигар идома дорад, ки маблағи то имрӯз дар доираи ин лоиҳаҳо азхудшуда 118 миллион сомониро ташкил медиҳад. Дар ин муддат маблағгузорӣ аз ҳисоби ҳамаи манбаъҳои сармоягузорӣ танҳо дар соҳаи сохтмон беш аз 458 миллион сомониро ташкил додааст.

Тибқи маълумот барои истиқболи сазовори ҷашни 35-солагии истиқлоли давлатӣ дар ноҳия сохтмону азнавсозии 165 иншоот пешбинӣ гардида, то имрӯз 75 фоизи нақша иҷро шудааст.

Зимни ин сафар Сарвари давлат дар маркази ноҳия муҷассамаи шоҳ Исмоили Сомонӣ ва майдони муқаддасоти миллиро ифтитоҳ намуданд, ки нишони арҷгузорӣ ба таърихи пурғановат ва анъанаҳои деринаи давлатдории миллати тоҷик мебошад. Инчунин, муассисаҳои томактабӣ барои 200 кӯдак, якчанд бинои фарҳангиву маъмурӣ ва иншооти иҷтимоиву энергетикӣ ба истифода дода шуданд. Корхонаҳои коркарди шир, истеҳсоли маҳсулоти ширӣ, нон, масолеҳи сохтмон, ҳавзи моҳипарварӣ ва гармхонаи муосир, ки тоза ба фаъолият оғоз карданд, барои таъсиси садҳо ҷойи нави корӣ ва таъмин намудани бозори дохилӣ бо маҳсулоти истеҳсоли худӣ саҳм мегузоранд.

Илова бар ин, Пешвои миллат дар ноҳия хатти интиқоли барқи дузанҷираи 35 ва 110-киловолтаи «Хоруғ – Рӯшон»-ро бо дарозии 68 километр ва зеристгоҳи «Ҷангал»-ро дар наздикии деҳаи Вомари ноҳияи Рӯшон ба маблағи умумии 114 миллион сомонӣ ба истифода доданд, ки имконияти интиқоли муназзами неруи барқро ба ноҳияҳои Рӯшон, Ванҷ ва Дарвоз бамаротиб беҳтар мегардонад. Инчунин, 3 неругоҳи барқи обии хурд дар деҳаҳои дурдасти ноҳия ба истифода дода шуда, таъкид гардид, ки то охири соли ҷорӣ дар ноҳия боз 6 неругоҳи барқи обӣ ва як неругоҳи хурди барқи офтобӣ бунёд мегардад. Ҳамзамон бо ин, имрӯз сохтмони 42 километр хатти интиқоли барқи 110 – киловолта аз маркази ноҳия то зеристгоҳи «Вознавд» оғоз гардид, ки дар нимсолаи аввали соли 2026 ба истифода дода мешавад.

Сарвари давлат зимни мулоқоташон ба мо масъулини соҳаи илму таҳсилот дастур доданд, ки барои боз ҳам баланд бардоштани сатҳу сифати таълим, омода кардани кадрҳои баландихтисос, омӯхтани таъриху фарҳанги бостонии халқи тоҷик, боло бурдани завқу рағбати хонандагон ба омӯзиши фанҳои риёзиву дақиқ, технологияҳои иттилоотӣ ва аз худ кардани забонҳои хориҷӣ бояд таваҷҷуҳи аввалиндараҷа зоҳир карда шавад.

Дар мулоқоти худ Пешвои миллат бо ифтихор таъкид карданд, ки Вилояти Мухтори Кӯҳистони Бадахшон, аз ҷумла ноҳияи Рӯшон яке аз минтақаҳои нотакрору ҷолиб барои рушди сайёҳӣ дар кишвар ба ҳисоб меравад. Табиати зебо, кӯҳҳои баланд, кӯлҳо, пиряхҳо, шаршараҳо ва чашмаву гиёҳҳои шифобахш, инчунин, маҳсулоти аз лиҳози экологӣ тоза имкониятҳои беҳтарин барои ҷалби сайёҳон мебошанд.

Ҳамин тавр, ин сафар нишон дод, ки сиёсати Ҳукумати Тоҷикистон дар бахши рушду пешрафти ҳамаи гӯшаву канори кишвар пайваста ва бо ниятҳои нек идома дорад. Пешвои миллат бо амалҳои мушаххас нишон доданд, ки ғамхорӣ нисбати мардум, рушди устувори иҷтимоӣ ва таъмини зиндагии шоиста барои ҳар як сокини Тоҷикистон аз вазифаҳои аввалиндараҷаи давлат мебошад.

Сафари мазкур боз як бори дигар собит кард, ки Пешвои миллат натанҳо роҳбари сиёсӣ, балки роҳнамои маънавии миллатанд. Ҷаҳду талошҳои пайвастаи Сарвари маҳбуби кишвар барои таъмини субот, рушди иқтисод ва болоравии сатҳи зиндагии мардум, бахусус дар минтақаҳои кӯҳӣ, ҳамзамон эҳёи маънавият ва таҳкими арзишҳои фаарҳангии миллиро низ дарбар мегиранд.

Имрӯз Вилояти Мухтори Кӯҳистони Бадахшон ҳамчун як намунаи зиндаи татбиқи сиёсати ваҳдатофар ва мардумгарои Пешвои миллат миёни минтақаҳои дигари кишвар ҷойгоҳи устувор дорад. Барномаҳои иҷтимоӣ, сохтмони роҳу муассисаҳои маорифу тандурустӣ, пуштибони аз рушди фарҳанг ва забони модарӣ далолат мекунад, ки ҳамбастагии миллӣ танҳо дар сухан не, балки дар амал татбиқ ммешавад.

Сафари Пешвои миллат ба Вилояти Мухтори Кӯҳистони Бадахшон бори дигар ин ҳақиқатро собит кард, ки вақте Пешвои миллат бо мардум аст, миллат бо умед ва итминон ба сӯйи фардои дурахшон ҳаракат мекунад. Ваҳдат на танҳо шиори расмӣ, балки паймони устувори давлат ва мардум гаштааст.

Ҳанӯз соли 2014-ум Пешвои миллат зимни сафари хеш ба ноҳияи Рӯшон аз хиради азаливу ориёии сокинони ин зебодиёр тавсиф карда, изҳор доштанд, ки “Сокинони ВМКБ дар рӯзҳои мушкил бо давлат ва Пешвои худ буданд ва дар роҳи таҳкими сулҳу субот саҳми арзанда гузоштанд.” Ин суханони ҳикматомӯз аз он шаҳодат медиҳанд, ки Сарвари давлат мардуми Бадахшонро ҳамчун шарикони воқеии ваҳдати миллӣ мешиносанд.

Пешвои миллат Вилояти Мухтори Кӯҳистони Бадахшонро танҳо минтақаи ҷуғрофӣ намедонанд, балки ҷузъи муҳими дили миллат ва пайванди маънавии худаш бо мардум медонад. Ин таъкиди Роҳбари ғамхори миллат дар соли 2007 гувоҳи ин гуфтаҳоянд: “Ман худро фарзанди Бадахшон меҳисобам, зеро қалби ҳар як сокини ин диёр барои ободии Тоҷикистон метапад».

Суханони Пешвои миллат дар бораи мардуми Бадахшон ҳамеша бо эҳтиром, ифтихор ва дӯстиву самимият садо медиҳанд. Сарвари давлат мардумро ба таҳкими ваҳдат ва созандагӣ даъват намуда, Бадахшонро ҳамчун “дарвозаи тиллоии Тоҷикистон” муаррифӣ мекунанд.

Мавзуна БОЙЕВА,

директори Филиали Литсейи касбии махсуси маъюбон дар ноҳияи Рӯшон

Оила пояи устувори ҷомеа буда, макони муҳаббат, эҳтиром ва дастгирист. Солимии ҷомеа аз пойдории оилаҳо вобаста аст, зеро маҳз дар оила инсон аввалин арзишҳои ахлоқӣ, масъулиятшиносӣ ва ҳамзистиро меомӯзад.

Аммо, мутаассифона, тайи солҳои охир шоҳиди афзоиши ҷудошавии оилаҳо ҳастем, ки он на танҳо ба аъзои оила, балки ба ҷомеа низ таъсири ҷиддии манфӣ мерасонад. Дар ин мақола сабабҳои аслии вайроншавии оилаҳо ва роҳҳои эҳтимолии пешгирӣ аз он мавриди баррасӣ қарор мегиранд.

Муоширати солим пояи мустаҳками ҳар як муносибати оилавист. Бисёр вақт зану шавҳар ҳиссиёт ва фикрҳои худро озодона баён намекунанд, ки дар натиҷа нофаҳмиҳо ҷамъ шуда, боиси низоъҳои ҷиддӣ мешаванд.

Норасоии даромад ва ноустувории вазъи иқтисодӣ яке аз омилҳои асосии муноқиша дар оилаҳо мебошад. Ихтилофи назар дар идоракунии буҷет, тақсими масъулиятҳои молиявӣ ва бенизомии хароҷот метавонад ба танишҳо оварда расонад.

Бекорӣ ё аз даст додани ҷойи кори устувор ба руҳияи ҳамсарон таъсири манфӣ мерасонад. Ҳисси ноумедӣ ва фишори равонӣ, ки дар чунин ҳолатҳо ба вуҷуд меоянд, метавонанд боиси коҳиши эътимод ва ахиран ҷудошавӣ гарданд. Дахолати хешовандон ё таъсири манфии муҳити иҷтимоӣ низ метавонад ба муносибатҳои оилавӣ халал расонад. Чунин дахолатҳо боиси сардӣ ва аз байн рафтани эътимод дар байни ҳамсарон мешаванд.

Ҳар як инсон ба муҳаббат, эҳтиром ва қадршиносӣ ниёз дорад. Нокифоя будани ғамхорӣ ва ноадолатӣ дар муносибатҳо оҳиста-оҳиста боиси дуршавии эҳсосӣ ва сустшавии пайванди оилавӣ мегардад.

Ҷудошавии оилаҳо як мушкили ҷиддии иҷтимоӣ буда, сабабҳои он гуногун ва мураккабанд. Аммо ҳар як ҷуфт метавонад бо ҳисси масъулият ва фаҳмиши дуҷониба оилаашро аз пошхӯрӣ нигоҳ дорад. Оила на танҳо пайванди ду нафар, балки манбаи муҳаббат, дастгирӣ ва рушди шахсият аст. Агар ҳар кадоми мо омӯзем, ки бо сабр, муҳаббат ва дилсӯзӣ ба якдигар муносибат намоем, метавонем ҷомеаи солим, пурмуҳаббат ва устувор бунёд намоем.

Низомиддин САИДОВ, омӯзгори кафедраи математика ва табиатшиносии Коллеҷи омӯзгории шаҳри Панҷакент

Имрӯз дар толори маҷлисгоҳи Муассисаи давлатии таълимии "Коллеҷи техникию омӯзгории ноҳияи Рӯдакӣ" фаъолияти кории муассиса дар соли таҳсили 2024-2025 дар Шӯрои олимон (омӯзгорон) бо иштироки муовини раиси ноҳияи Рӯдакӣ, муҳтарам Исмоилзода Заррина, сардори Раёсати таҳсилоти миёнаи касбии Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, муҳтарам Маҳмадализода Бобоҷон, раисии шаҳраки Сомониёни ноҳияи Рӯдакӣ, Ҳакимзода Манучеҳра, директори Муассисаи давлатии таълимии "Коллеҷи техникию омӯзгории ноҳияи Рӯдакӣ" Хоҷазода Давронҷон ва омӯзгорон муассисаи мазкур баргузор гардид.

Дар ҷаласаи мазкур директори муассиса, муҳтарам Хоҷазода Давронҷон вазъи таълиму, тарбия, илм ва хоҷагидории муассисаро дар давоми ҳисоботӣ баррасӣ намуда, пешравиҳо ва камбудиҳои ҷойдошта дар ин раванд ба саҳми ҳозирин расонида шуд.

Дар охири ҷаласаи мазкур як қатор омӯзгорони муассиса барои фаъолияти хуб доштанашон ва ғолибону иштирокдорони озмунҳои ҷумҳуриявӣ бо Ифтихорномаю Сипоснома ва туҳфаи хотиравӣ дар фазои тантанавӣ супорида шуд.

Дар тӯли таърихи башар, халқи тоҷик борҳо бо хиради азалии худ ва бо дилу нияти пок тавонистааст рӯзҳои сахту сангини замонро паси сар намояд ва ба орзуҳои волои худ бирасад. Яке аз ин орзуҳои дерина ва муқаддаси халқамон Ваҳдати миллӣ буд, ки ниҳоят 27 июни соли 1997 бо кӯшишу талоши фарзандони фарзонаи миллат ва бо раҳнамоии Пешвои миллат, муҳтарам Эмомалӣ Раҳмон муяссар гардид.

Ваҳдати миллӣ на танҳо хотимаи ҷанги шаҳрвандӣ ва оташи бадбахтӣ буд, балки оғози як саҳифаи нав дар таърихи давлатдории тоҷикон гардид. Ваҳдат ба кишвари мо суботи сиёсӣ, амният ва имконияти рушди босуботи иқтисодиву иҷтимоиро фароҳам овард. Дар заминаи он, Тоҷикистон тавонист пояҳои истиқлолияти худ ва асосҳои давлатдории миллиро мустаҳкам намояд.

Имрӯз вақте сухан аз ваҳдати миллӣ меравад, пеш аз ҳама мо бояд ба он ҳамчун дастоварди бузург ва муқаддаси миллати худ назар афканем. Зеро ваҳдат он ганҷест, ки барои ба даст овардани он ҳазорон дил сӯхт, ҳазорон модар ашки сӯзон рехт ва ҳазорон фарзанд қурбонӣ шуд. Мо бояд ба қадри ин неъмати бебаҳо бирасем ва онро ҳамчун гавҳараки чашм ҳифз намоем.

Пас аз ба даст овардани ваҳдат, Тоҷикистон ба марҳилаи нави рушди давлатдорӣ ворид гардид. Бо талошҳои шабонарӯзии роҳбарияти давлат ва бо дастгирии халқи азиз, ин сарзамини кӯҳанбунёд ба як кишвари обод, зебо ва орому босубот табдил ёфт. Роҳҳо, пулҳо, мактабҳо, беморхонаҳо ва дигар иншооти ҳаётан муҳим дар гӯшаву канори кишвар бунёд ёфтанд. Ба шарофати ваҳдат мо имкон пайдо кардем, ки дар арсаи байналмилалӣ мавқеи худро устувор гардонем ва бо кишварҳои дунё равобити дӯстона барқарор созем.

Яке аз муҳимтарин арзишҳои Ваҳдати миллӣ дар он зоҳир мешавад, ки он ҳамаи сокинони кишварро бо ҳар гуна диду назар ва бо ҳар гуна мансубияти динӣ ва миллиашон дар зери як парчами ягонагӣ муттаҳид кард. Имрӯз ҳар шаҳрванди Тоҷикистон, сарфи назар аз ҷойи зисту мансубият, худро як порчаи ҷудонашавандаи ин ватан медонад ва бо ифтихор номи тоҷикро бар забон меорад.

Мутаассифона, дар ҷаҳони муосир ҳанӯз ҳам кишварҳое ҳастанд, ки аз набуди ваҳдат ва якпорчагӣ ранҷ мебаранд ва зиндагии мардумонашон таҳти хатари ҷиддӣ қарор дорад. Маҳз ҳамин аст, ки мо бояд таҷрибаи нодири ваҳдати миллии хешро пос дорем ва онро ҳамчун намунаи беҳтарини сулҳу субот ба ояндагон биомӯзем.

Ҳар сол мо бо шукуҳу шаҳомати хоса Рӯзи Ваҳдати миллиро ҷашн мегирем. Ин ҷашн на танҳо ба хотири ёдоварӣ аз як санаи таърихист, балки он лаҳзаест барои андеша кардан ба арзишҳои олӣ - сулҳ, дӯстӣ, ҳамдигарфаҳмӣ ва меҳру муҳаббат. Ваҳдати миллӣ ба ҳар яки мо масъулияти бузургеро вогузор намудааст: ки наслҳои ояндаро дар руҳи дӯстиву ҳамдигарэҳтиромӣ тарбия намоем ва ҳаргиз роҳ надиҳем, ки он рӯзҳои сиёҳ ва талхи гузашта такрор шаванд.

Ваҳдати миллӣ ҳамчун рамзи ифтихор ва сарбаландии халқи тоҷик дар ҳар қалб ҷовидон аст. Ин ганҷи бебаҳо моро ба сӯи ояндаи дурахшон ва обод раҳнамоӣ мекунад. Биёед ҳама бо ҳам якдилона саъю талош намоем, то ин кохи пурҷалоли ормонҳои халқи худ - ваҳдати миллиро ҳамеша устувор нигоҳ дорем ва онро ба фарзандону наберагони худ ба мерос гузорем.

Абдаминова Фирӯза, декани факултети филология ва таърихи Коллеҷи омӯзгории шаҳри Турсунзода

Ваҳдати миллӣ аз ҷумлаи арзишҳои бунёдии ҳар ҷомеаи пешрафта ба ҳисоб меравад. Барои кишварҳое, ки дар гузашта ҷангҳои дохилӣ ва ихтилофҳои сиёсиро аз сар гузаронидаанд, Ваҳдати миллӣ на танҳо як ғоя, балки зарурат ва шарти рушди устувор аст. Тоҷикистон низ аз зумраи чунин кишварҳоест, ки бо туфайли сиёсати сулҳофарини роҳбарияти давлат ва пуштибонии мардуми кишвар тавонист ба сулҳу оромӣ ва Ваҳдати миллӣ даст ёбад. Дар ин раванд, нақши омӯзгор ҳамчун тарбиятгар, роҳнамо ва неруи маънавии ҷомеа хеле бузург ва таъсиргузор аст.

Омӯзгор шахсияти марказӣ дар ташаккули тафаккури иҷтимоӣ ва худшиносии миллӣ маҳсуб мешавад. Ӯ бо насли наврасу ҷавон кор мекунад, ашхосеро тарбия мекунад, ки ояндаи кишварро месозад ва муаррифӣ менамояд. Он чӣ омӯзгор имрӯз ба шогирд меомӯзад, фардо ба як барномаи иҷтимоиву сиёсии ҷомеа табдил меёбад. Агар омӯзгор шогирдро ба муҳаббат нисбат ба Ватан, хештаншиносӣ, таҳаммулпазирӣ ва дӯстии якдигар тарбия намояд, ин арзишҳо дар зеҳни ҷавон ҷой гирифта, минбаъд ба таҳкими сулҳу субот ва ваҳдати ҷомеа хидмат мекунанд.

Пас аз солҳои ҷанги шаҳрвандӣ, ки ҷомеаи Тоҷикистон руҳафтода шуда буд, маҳз омӯзгорон буданд, ки бо заҳмати шабонарӯзии худ фазои фаҳм ва эҳтиромро миёни насли нав барқарор намуданд. Онҳо дар синфхонаҳо на танҳо донишу фанн меомӯзонданд, балки мисли падарону модарон, мисли ҳимоятгарони маънавӣ, ба шогирдон ёд доданд, ки душманӣ роҳи ҳал нест, балки миллат танҳо дар партави ваҳдат рушд мекунад. Онҳо бо мисолҳои зиндагии худ сабақ доданд, ки дӯст доштани Ватан танҳо дар сухан нест, балки дар амал, дар меҳнат, дар таҳсил ва дар рӯҳияи хуш доштан аст.

Мактаб ва омӯзгор муҳити аввалине ҳастанд, ки инсонро ба ҷаҳони арзишҳо ворид месозанд. Дар ин муҳит, арзишҳое мисли бародарӣ, ҳамдигарфаҳмӣ, ягонагии миллӣ ва ҳифзи манфиатҳои давлат тарбия меёбанд. Омӯзгорон дар дарсҳои забон, таърих, маърифати оиладорӣ, адабиёт ва ҳатто математикаву физика ин ғояҳоро ба хонандагон мерасонанд. Маҳз аз ҳамин ҷиҳат аст, ки омӯзгор дар фарҳанги миллати мо ҳамеша бо эҳтиром ёд мешавад ва ӯро «устод», яъне равшангару раҳнамо медонанд.

Дар шароити муосир, ки ҷаҳонишавӣ, шабакаҳои иҷтимоӣ ва таъсири фарҳангҳои бегона ба зеҳни ҷавонон фишор меоранд, омӯзгор боз ҳам рисолати сангину масъулиятнок дорад. Вай бояд донишомӯзро аз таъсири ғояҳои ифротгароён эмин нигоҳ дорад, онҳоро ба масири дуруст роҳнамоӣ кунаду барояшон тавзеҳ диҳад, ки дар паси ҳар иттилоот чӣ ният пинҳон аст ва кадом мавқеъ бояд ишғол шавад. Омӯзгор дар айни замон бояд равоншинос, таҳлилгар, фарҳангсолор ва мутафаккир бошад.

Дар минтақаҳои осебпазири кишвар, махсусан маҳалҳо ва деҳаҳое, ки дар гузашта даргирӣ доштанд, имрӯз низ омӯзгорон ҳамчун нерӯи ваҳдатсоз фаъолият доранд. Онҳо бо вуҷуди мушкилиҳо, камбуди моддӣ ва душвориҳои инфрасохторӣ, бо садоқати комил ба таълиму тарбия машғуланд. Онҳо мисли шамъ фидокорона месӯзанд, то дар зеҳни ҳар як шогирд нури маърифат ва муҳаббат ба Ватанро равшан созанд.

Нақши омӯзгор танҳо ба муҳити мактаб маҳдуд намешавад. Вай дар ҷомеа низ шахсияти таъсиргузор аст. Машварат ба волидайн, ширкат дар чорабиниҳои фарҳангиву сиёсӣ, ҳамкорӣ бо ниҳодҳои ҷамъиятӣ ва давлатӣ, ҳама ин фаъолиятҳо, дар маҷмуъ, омӯзгорро ба як сутуни муҳими Ваҳдати миллӣ табдил медиҳанд. Аз ин рӯ, сиёсати иҷтимоии давлат ва Ҳукумати Ҷумҳурии Тоҷикистон сол ба сол бештар ба рушди илму таҳсилот ва дастгирии омӯзгорон равона мегардад.

Пешвои миллат муҳтарам Эмомалӣ Раҳмон борҳо дар суханрониҳояшон ба рисолати омӯзгор ишора намуда, таъкид кардаанд, ки барои ҳифзи Ваҳдати миллӣ омӯзгор бояд ҳамеша дар маркази диққат бошад. Ин ба маънои он аст, ки мактаб, чун муҳити аввалини ваҳдат, бояд ҳамеша нерӯманд ва устувор бошад.

Дар маҷмуъ, метавон гуфт, ки омӯзгорӣ дар Тоҷикистон на танҳо як касб, балки як рисолати иҷтимоӣ, як масъулияти таърихӣ ва як сарнавишти миллӣ аст. Намояндаи он дар роҳи пойдории Ваҳдати миллӣ пайвандгари наслҳо, ҳимоятгари арзишҳо ва созандаи ҷомеаи муттаҳид мебошад. Агар ваҳдат неъмати олӣ бошад, пас, омӯзгор бунёдгари ин неъмат аст.

ОДИНАЗОДА Латофат Амиршо,

директори Коллеҷи омӯзгории шаҳри Кӯлоб,

номзади илмҳои педагогӣ, дотсент