ДАВРИ ЯКУМИ ОЗМУНИ ҶУМҲУРИЯВИИ “МАЛАКАИ КАСБӢ” ДАР МИНТАҚАИ ХУҶАНДӢ ВИЛОЯТИ СУҒД ОҒОЗ ГАРДИД

Рӯзҳои 10-11 апрел дар Литсейи касбии техникӣ сохтмонии шаҳри Хуҷанд даври вилоятии озмуни ҷумҳуриявии “Малакаи касбӣ” миёни муассисаҳои таҳлоти ибтидоии касбии шаҳру ноҳияҳои Хуҷанд, Бобоҷон, Ғафуров, Мастчоҳ, Истиқлол, Исфара, Конибодом ва Ашт, баргузор гардид, ки дар кори он Ҷамолиддин Назарзода, муовини сардори Раёсати таҳсилоти ибтидоии касбии Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон иштирок ва суханронӣ намуд.

Озмуни ҷумҳуриявии «Малакаи касбӣ» ҳамасола дар байни хонандагони муассисаҳои таҳсилоти ибтидоии касбӣ аз рӯйи 15 ихтисос, аз ҷумла барқчӣ оид ба таъмири қисмҳои барқии автомобил, челонгар оид ба таъмири муҳаррики автомобил, кафшергари барқию газӣ, ҳисобдор бо донистани компютер, системаи компютерӣ ва интернет технология, дуредгар, дӯзанда, монтёри барқӣ оид ба таъмир ва хизматрасонии таҷҳизотҳои барқӣ, тракторчӣ-мошинисти истеҳсолоти кишоварзӣ ва челонгар оид ба тайёр намудани ҷузъҳо ва қисмҳои техникӣ санитарӣ гузаронида мешавад.

Озмун дар ду давр баргузор гардида, хонандагон бо супоридани тест аз рӯи фани таълимӣ ва нишон додани маҳорат аз рӯи ихтисос иштирок менамоянд.

Дар ин давра аз 12 муассиса 250 нафар хонанда аз рӯи 15 ихтисос иштироки фаъолона намуда, баъди ҷамъбасти натиҷаи имтиҳон ғолибон ба даври ҷумҳуриявии он роҳхат мегиранд.

Маврид ба зикри хос аст, ки даври ҷумҳуриявии озмуни мазкур 15 - 16 майи соли 2025 дар Литсейи касбии техникии нақлиёти автомобилии шаҳри Душанбе баргузор мегардад.