ЭМОМАЛӢ РАҲМОН - СИПАРИ АМНИЯТ ВА ПОЯИ ДАВЛАТДОРӢ

Асосгузори сулҳу ваҳдати миллӣ, Пешвои миллат ва Президенти Ҷумҳурии Тоҷикистон муҳтарам Эмомалӣ Раҳмон - шахсияти барҷастаи таърихиест, ки номашон бо истиқлолият, ваҳдати миллӣ ва ободии саросарии Тоҷикистони азиз тавъам гаштааст.

Шахсияти муҳтарам Эмомалӣ Раҳмон ҳамчун фарзанди содиқи Ватан ва вориси арзандаи анъанаҳои пурғановати миллӣ дар лаҳзаҳои басо ҳассоси таърихӣ масъулияти бузурги роҳбарии давлатро ба дӯш гирифта, бо иродаи қавӣ ва ҷаҳонбинии хирадмандона миллати парешонгашта ва давлатдории вайроншударо ба роҳи ягонагӣ, амният ва рушд раҳнамоӣ намуданд.

Пешвои миллат дар муддати начандон тӯлонӣ тавонистанд, кишварро аз вартаи буҳрону ҷанги шаҳрвандӣ берун кашида, пояҳои давлатдориро аз нав эҳё ва мустаҳкам намоянд. Таъмини сулҳи устувор, оромии комил ва ризоияти миллӣ маҳз бо заҳматҳои бемисли ин шахси фидокор имконпазир гардид.

Бо дили соф, нияти пок, эҳсоси баланди масъулият ва садоқати бепоён ба Ватан, Пешвои миллат - муҳтарам Эмомалӣ Раҳмон давлатеро, ки рӯ ба таназзул ниҳода буд, ба як кишвари соҳибистиқлоли дорои нуфузи байналмилалӣ табдил намуданд.

Бо талошҳои пайваста ва иқдомҳои созандаи Сарвари давлат, садҳо иншооти азими стратегӣ, аз қабили нақбҳои “Истиқлол”, “Озодӣ”, “Шаҳристон” ва “Хатлон” сохта шуданд, ки онҳо на танҳо василаи пайванди вилоятҳо, балки рамзи “Ваҳдат” ва якпорчагии миллат мебошанд.

Муҳтарам Эмомалӣ Раҳмон роҳбари халқпарвар ва инсондӯст мебошанд. Ҳамеша дар канори мардум қарор дошта, ба ҳар гӯшаи дурдаст сафар карда, аз вазъи зиндагии сокинон огоҳ мегарданд, ба дарду ниёзашон гӯш дода, чораҳои амалӣ меандешанд. Маҳз ҳамин сидқ ва муҳаббат ба мардум аст, ки онкасро бо ифтихор "Пешвои миллат", "Падари Ватан" ва "Ҷони халқ" мехонанд.

Дар самти сиёсати хориҷӣ низ, таҳти раҳбарии Пешвои муаззами миллат, Тоҷикистон мавқеи устувор ва обрӯи баланд касб намудааст. Пешниҳодҳои муҳтарам Эмомалӣ Раҳмон доир ба масъалаҳои муҳими ҷаҳонӣ ба монади об, иқлим ва амният аз ҷониби ҷомеаи ҷаҳонӣ бо самимият пазируфта шудаанд.

Имрӯз ҳамаи дастовардҳои кишвар сулҳу субот, ободӣ, пешрафти илм, рушди иҷтимоӣ ва иқтисодӣ, натиҷаи сиёсати бунёдгароёна ва хидматҳои содиқонаи Пешвои миллат мебошанд. Бо диди васеъ, ақли расо ва қалби пурмеҳр, Пешвои миллат Тоҷикистонро ба сӯи фардои дурахшон раҳнамоӣ менамоянд.

Бешак, хизматҳои таърихии муҳтарам Эмомалӣ Раҳмон дар саҳифаҳои заррини давлатдории навини тоҷикон сабт гардида, барои наслҳои оянда ҳамчун намунаи фидокорӣ, садоқат ва ваҳдатгароӣ хизмат хоҳанд кард. Ӯ раҳнамои миллат ва нури чашми халқанд, симои барҷастае, ки таърих бо ифтихор аз он кас ёд хоҳад кард.

МАҚСУДА БОБОЕВА,ҷонишини директор оид ба таълим ва

тарбияи Коллеҷи омӯзгории шаҳри Панҷакент