Конститутсияи Ҷумҳурии Тоҷикистон на танҳо санади ҳуқуқии олии давлат, балки нишонаи соҳибистиқлолӣ, ваҳдат ва худшиносии миллии халқ ба шумор меравад. Он пояи ҳуқуқии тамоми сохтори сиёсӣ, иҷтимоӣ ва иқтисодии кишварро муайян карда, ҳамчун сарчашмаи асосии давлатдории миллӣ хизмат мекунад.

6 ноябри соли 1994 қабули Конститутсия пас аз марҳалаи душвори таърихӣ сурат гирифт. Он замон кишвар аз ноустувории сиёсӣ ва низоъҳои шаҳрвандӣ ранҷ мебурд, вале халқи Тоҷикистон бо иродаи озод ва умед ба ояндаи беҳтар ба роҳи давлатдории ҳуқуқбунёд қадам гузошт. Ин ҳуҷҷати тақдирсоз дар раъйпурсии умумихалқӣ қабул гардида, поягузори низоми демократӣ, дунявӣ ва ягонаи Тоҷикистон гардид.

Давлатдории миллӣ дар заминаи Конститутсия шакли мукаммал пайдо кард. Маҳз бо қабули он мафҳуми истиқлолияти сиёсӣ, ягонагии ҳудудӣ, забони давлатӣ, рамзҳои миллӣ ва сохтори идоракунии давлат ба таври ҳуқуқӣ муқаррар шуданд. Аз ҳамин лаҳза давлат ҳамчун соҳибихтиёр, қонунӣ ва мустақил дар арсаи байналмилалӣ эътироф ёфт.

Конститутсия давлатдории миллиро на танҳо аз нигоҳи ҳуқуқӣ, балки аз ҷиҳати идеологӣ низ таҳким мебахшад. Дар он арзишҳои умумибашарӣ бо суннатҳои миллӣ ва фарҳанги тоҷикон пайванд ёфтаанд. Меъёрҳои он дар асоси эҳтиром ба ҳуқуқи инсон, озодӣ, адолат ва баробарӣ устувор шудаанд, ки ин ҳама рукнҳои муҳимтарини давлатдории муосир мебошанд.

Яке аз паҳлуҳои муҳими нақши Конститутсия дар таҳкими давлатдории миллӣ ин аст, ки он низоми ҳокимиятро муқаррар кардааст. Маҳз дар асоси Конститутсия се шохаи ҳокимият -қонунгузор, иҷроия ва суд ташаккул ёфта, бо ҳам ҳамоҳангона амал мекунанд. Ин принсип имконият медиҳад, ки давлат ба сохтори демократӣ ва масъулиятнок табдил ёбад.

Бо мурури замон ва тағйир ёфтани шароити сиёсиву иҷтимоӣ, ба Конститутсия солҳои 1999, 2003 ва 2016 тағйироту иловаҳо ворид гардиданд. Ин ислоҳот ба таҳкими минбаъдаи давлатдории миллӣ мусоидат намуданд. Аз ҷумла, таъсиси Парлумони дупалатагӣ ва тақвияти пояҳои ҳокимияти судӣ ҳамчун кафолати Конститутсия ва Ваҳдати миллӣ ба устувории давлатдорӣ мусоидат карданд.

Конститутсия заминаи ҳуқуқӣ барои татбиқи сиёсати дохиливу хориҷии кишвар низ мебошад. Дар асоси он Тоҷикистон сиёсати сулҳҷӯёна, ҳамкорӣ бо кишварҳои ҷаҳон ва ташкилотҳои байналмилалиро пеш мебарад. Сиёсати хориҷии мустақили Тоҷикистон ва дастовардҳои он дар соҳаҳои иқтисод, фарҳанг, илму маориф ва амният маҳз дар доираи Конститутсия ба амал меоянд.

Дар сатҳи иҷтимоӣ низ Конститутсия ба таҳкими давлатдории миллӣ нақши муҳим бозидааст. Он ҳуқуқ ва озодиҳои инсонро кафолат медиҳад, баробарии шаҳрвандонро дар назди қонун таъмин мекунад ва барои рушди ҷомеаи шаҳрвандӣ замина мегузорад. Ҳуқуқ ба таҳсил, меҳнат, моликият, иштирок дар идораи давлат аз ҷумлаи унсурҳое мебошанд, ки дар баробари эҳсоси масъулияти шаҳрвандӣ пояи давлатдории миллиро низ мустаҳкам месозанд.

Беэътиноӣ ба Конститутсия маънои беэҳтиромӣ ба давлат ва миллатро дорад. Аз ин рӯ, тарбияи фарҳанги ҳуқуқӣ дар ҷомеа, махсусан миёни ҷавонон, яке аз вазифаҳои муҳимтарин мебошад. Зеро маҳз насли огоҳ ва қонуншинос метавонад арзишҳои миллиро ҳифз кунад..

Имрӯз Конститутсияи Ҷумҳурии Тоҷикистон ҳамчун ҳуҷҷати мукаммал на танҳо роҳи ҳаёти сиёсӣ ва иҷтимоии давлатро муайян мекунад, балки ғояи ваҳдату устуворӣ ва худшиносии миллиро инъикос менамояд. Бо шарофати ин ҳуҷҷати сарнавиштсоз Тоҷикистон тавонист пояҳои истиқлолияти сиёсӣ ва ваҳдати миллии худро таҳким бахшида, дар байни кишварҳои минтақа мавқеи устувор пайдо кунад.

Хулоса, Конститутсия рамзи ягонагӣ, нишони давлатдорӣ ва кафили субот аст. Он на танҳо санади ҳуқуқӣ, балки ойинаи давлатдории миллии тоҷикон мебошад. Он ойинаест, ки дар он озодӣ, истиқлолият ва ваҳдати халқи тоҷик инъикос ёфтааст.

Ҷамила ДАВЛАТЗОДА,

директори Литсейи касбии техникии ноҳияи Шаҳринав

Конститутсияи Ҷумҳурии Тоҷикистон ҳуҷҷати асосӣ ва сарнавиштсозест, ки бунёди сохтори давлатӣ, сиёсӣ ва ҳуқуқии кишварро муайян менамояд. Он ҳамчун қонуни олӣ ва сарчашмаи тамоми қонунгузории ҷумҳурӣ амал мекунад ва тамоми муносибатҳои иҷтимоӣ, сиёсӣ, иқтисодӣ ва фарҳангиро дар доираи принсипҳои ҳуқуқӣ ба танзим медарорад.

Қабули Конститутсияи Ҷумҳурии Тоҷикистон 6 ноябри соли 1994 рӯйдоди таърихие буд, ки бо иродаи умумии мардум сурат гирифт. Дар он давра дар кишвар мушкилоти сиёсӣ ва иҷтимоии шадид мегузашт, вале мардуми Тоҷикистон тавассути раъйпурсии умумихалқӣ роҳи давлатдории ҳуқуқбунёдро интихоб карданд. Аз ҳамин рӯз Тоҷикистон ҳамчун давлати демократӣ, ҳуқуқбунёд, дунявӣ ва ягона расман эътироф гардид.

Конститутсия ҳамчун сарчашмаи қонунгузорӣ дорои аҳамияти олӣ мебошад, зеро ҳамаи қонунҳо, қарорҳо ва дигар санадҳои меъёрии ҳуқуқӣ бояд ба меъёрҳои он мутобиқат кунанд. Ҳеҷ як санад ҳуқуқи боло аз Конститутсияро надорад. Маҳз ин меъёр кафолати волоияти қонун ва адолати иҷтимоиро таъмин менамояд.

Дар Конститутсия асосҳои сохтори сиёсӣ ва ҳуқуқии кишвар муқаррар гардидаанд. Аз ҷумла, он шакли идораи ҷумҳуриявӣ, принсипҳои ҷудоии ҳокимият ба се шоха — қонунгузор, иҷроия ва судиро муқаррар мекунад. Ҳуқуқу озодиҳои инсон ва шаҳрванд дар Конститутсия мавқеи меҳварӣ доранд. Он барои ҳар як шаҳрванд ҳуқуқ ба зиндагӣ, озодӣ, баробарӣ дар назди қонун, озодии виҷдон, сухан, андеша, меҳнат ва таҳсилро кафолат медиҳад. Ин муқаррарот на танҳо арзиши ҳуқуқӣ, балки маънои инсонпарварона ва демократиро доранд, ки ба меъёрҳои умумибашарӣ мутобиқат менамоянд.

Дар баробари ин, Конститутсия вазифаҳои асосии шаҳрвандонро низ муайян кардааст, азҷ умла риояи қонунҳо, эҳтироми ҳуқуқи дигарон, ҳифзи манфиатҳои ҷамъияту давлат ва иҷрои уҳдадориҳои шаҳрвандӣ.

Конститутсияи Ҷумҳурии Тоҷикистон заминаи ҳуқуқии фаъолияти тамоми сохторҳои давлатӣ ва ташкилотҳои ҷамъиятиро фароҳам овардааст. Маҷлиси Олӣ ҳамчун мақоми олии қонунгузор, Ҳукумат ҳамчун шохаи иҷроия ва судҳо ҳамчун шохаи ҳокимияти судӣ тибқи он амал мекунанд.

Бо гузашти замон ва тағйирёбии воқеияти сиёсӣ ва иҷтимоии кишвар, ба Конститутсия якчанд маротиба тағйиру иловаҳо ворид карда шуданд (солҳои 1999, 2003, 2016), ки ҳадафашон мутобиқ гардондани он ба талаботи рушди ҷомеа ва давлат буд. Масалан, ворид кардани институти парлумони дупалатаӣ ва муқаррар намудани ҳадафҳои стратегии рушди кишвар аз ҷумлаи чунин ислоҳот мебошанд.

Имрӯз Конститутсияи Ҷумҳурии Тоҷикистон на танҳо санади ҳуқуқӣ, балки рамзи ваҳдат, истиқлол ва пойдории давлатдории миллӣ мебошад. Он шаҳрвандонро ба эҳтиром ба қонун, адолат, сулҳ ва ҳамдигарфаҳмӣ даъват мекунад. Дар ҳақиқат, Конститутсия ҳамчун сарчашмаи қонунгузорӣ ва ҳуҷҷати асосии сиёсиву ҳуқуқӣ ба тамоми низоми ҳуқуқии кишвар тартибот мебахшад. Ҳамаи соҳаҳои ҳаёти ҷомеа, аз иқтисоду маориф то фарҳанг ва сиёсат дар асоси меъёрҳои он танзим мешаванд.

Пойдории Конститутсия ва риояи меъёрҳои он масъулияти ҳар як шаҳрванди ҷумҳурӣ мебошад. Зеро эҳтиром ба Конститутсия маънои эҳтиром ба давлат, миллат ва арзишҳои инсониро дорад.

Зинатшо ИМАТШОЕВ,

директори Литсейи касбии техникии

нақлиёти автомобилии шаҳри Душанбе

Имрӯз дар доираи сафари корӣ ба Ҷумҳурии Тоҷикистон Президенти Донишгоҳи Лифти Кореяи Ҷанубӣ Ҳюнсук Ли ва муовини якуми раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон Давлатзода Баҳрулло Раҳмон ба муассисаҳои таҳсилоти ибтидоӣ ва миёнаи касбии шаҳри Душанбе ташриф оварданд.

Ҳайати мазкур нахуст дар Литсейи касбии техникии сохтмони шаҳри Душанбе бо дастовардҳои муассиса ва фаъолияти он шинос шуда, бо роҳбарияти литсей мулоқот анҷом доданд.

Иттилоъ дода шуд, ки Литсейи касбии техникии сохтмони шаҳри Душанбе яке аз муассисаҳои пешбари соҳаи таҳсилоти ибтидоии касбӣ ба ҳисоб меравад, ки дар тайёр кардани мутахассисони сатҳи коргарӣ барои соҳаи сохтмон саҳми арзанда дорад. Ин муассиса бо мақсади қонеъ гардондани эҳтиёҷоти бозори меҳнат бо кадрҳои соҳибкасб таъсис ёфтааст.

«Дар литсей ҷавонон пас аз хатми синфи 9 ва 11 ба таҳсил ҷалб мегарданд ва вобаста ба ихтисос дар муддати 1 то 2 сол таҳсил мекунанд. Самтҳои асосии таълим дар литсей сохтмони биноҳо ва иншоот, пардозгарӣ, кафшергарӣ, челонгарӣ, кафшергари газию барқӣ, инчунин корҳои таъмирӣ мебошанд», - гуфт директори литсей Аҳмадшо Саидзода дар мулоқот.

Дар идома ҳайати Донишгоҳи Лифти Кореяи Ҷанубӣ бо фаъолияти Коллеҷи информатика ва техникаи компютерии шаҳри Душанбе шинос шуда, имкониятҳои ҳамкорӣ ва роҳҳои ҷалби донишҷӯёни тоҷик ба ин муассисаи таълимии хориҷи кишварро баррасӣ намуданд.

Ҳамза Сафарзода, директори муассисаи мазкур, зикр кард, ки Коллеҷ яке аз муассисаҳои пешсафи таҳсилоти миёнаи касбӣ маҳсуб ёфта, мутахассисони соҳибихтисосро дар самтҳои технологияҳои иттилоотӣ, барномасозӣ, шабакаҳои компютерӣ ва фанҳои муҳандисиву техникӣ омода мекунад.

Гуфта шуд, ки муассиса дар заминаи эҳтиёҷоти бозори меҳнат ва талаботи замони муосир фаъолият дошта, мақсади асосии он омода намудани кадрҳои ҷавон бо донишу малакаҳои амалӣ дар соҳаи технологияҳои иттилоотӣ ва коммуникатсия мебошад.

Сипас, ҳайати мазкур ба Коллеҷи муҳандисию омӯзгории шаҳри Душанбе ташриф оварда, бо имкониятҳои моддию техникии ин муассисаи таълимӣ аз наздик шинос шуда, бо ҳайати роҳбарияти муассиса мулоқоти судманд анҷом доданд.

Директори коллеҷ Наҷибулло Рабизода иттилоъ дод, ки фаъолияти муассисаи таълимии мазкур ба самти тайёр кардани мутахассисони соҳибихтисос дар самтҳои муҳандисӣ, омӯзгорӣ ва техникиву технологӣ равона шуда, дорои пойгоҳи моддию техникӣ ва инфрасохтори муосир, аз ҷумла лабораторияҳои фаннӣ, устохонаҳои таълимӣ, синфхонаҳои компютерӣ, озмоишгоҳҳои амалӣ ва китобхонаи муосир буда, дарсҳоро устодони соҳибмаълумот, муҳандисони касбӣ ва омӯзгорони таҷрибадор мегузаронанд.

Баъд аз боздид ва гуфтугӯ бо роҳбарони муассисаҳои таълимии мазкур Президенти Донишгоҳи Лифти Кореяи Ҷанубӣ Ҳюнсук Ли зикрк ард, ки дар доираи Ёддошти тафоҳуме, ки дирӯз бо Раиси Кумита имзо намуданд, ҷониби онҳо дар заминаи ҳарсе муассисаи таълимӣ синфхонаҳои махсуси фанниро ҷиҳати омӯзиши забони кореягӣ таъсис дода, курсҳои омӯзишии ройгонро бо ҷалби омӯзгорони варзидаи дохилию хориҷӣ ба роҳ мемонанд.

«Мо дар доираи имкониятҳои худ кӯшиш мекунем, ки теъдоди бештари донишҷӯёни тоҷикро аз ҳисоби муҳассилини муассисаҳои таҳсилоти ибтидоӣ ва миёнаи касбии Ҷумҳурии Тоҷикистон барои таҳсил дар муассисаи худамон ҷалб намоем. Дар муассиса барои писарон ихтисосҳои муҳандис, таъмиргар ва устоҳои насби лифт ва барои духтарон ихтисоси косметолог амал мекунанд. Дар оянда мо грантҳоро ба роҳ мемонем, ки тамоми хароҷоти таҳсилу иқомати донишҷӯёнро дар Кореяи Ҷанубӣ пардохт мекунад», - гуфт ҷаноби Ҳюнсук Ли.

Қайд гардид, ки дарсҳои нахустин дар заминаи курсҳои омӯзишӣ шуруъ аз 10 ноябр ба роҳ монда шуда, хоҳишмандон метавонанд дар онҳо иштирок намоянд ва баъди хатм бо сертификат таъмин шуда, имкони идомаи таҳсилу фаъолият дар Кореяи Ҷанубиро ба даст оранд.

29 октябри соли равон бо иштироки муовини раиси Кумитаи Иҷроияи Ҳизби Халқии Демократии Тоҷикистон дар шаҳри Кӯлоб Саймуминзода Фирӯз, мудири шуъбаи умумии КИ ҲХДТ дар шаҳри Кӯлоб Мунаввараи Бозоралӣ, раиси Ташкилоти ибтидоии ҳизбии “Омӯзгор”, директори Коллеҷи омӯзгории шаҳри Кӯлоб Одиназода Латофат Амиршо ва аъзои ташкилот аз ҳисоби омӯзгорону ҳайати маъмурияти муассиса ҷаласаи ҳизбӣ гузаронида шуд.

Саймуминзода Фирӯз дар оғози ҷаласа баромад карда, доир ба ҳадафҳои бузурги Ҳизби Халқии Демократии Тоҷикистон изҳори андеша намуда, ҳамагиро барои саҳм гузоштан дар амалисозии онҳо даъват намуд. Инчунин, мавсуф вобаста ба мавзуҳои мубрами рӯз-мубориза бо терроризму экстремизм, даст назадан ба бегонапарастӣ ва фарҳанги бегона, ҳамчун ашхоси намуна ба бар кардани либосҳои миллӣ, тарбияи дурусту комили ҷавонон дар рӯҳияи ватандӯстӣ худшиносӣ ва дигар масоил андешаронӣ намуд. Аз ҳамаи аъзоён даъват ба амал овард, ки барои татбиқи сиёсати Ҳукумати мамлакат ва Роҳбари давлат муҳтарам Эмомалӣ Раҳмон ҳамеша омода ба хизмат бошанд.

Сипас, саҳми роҳбари Ташкилоти ибтидоии ҳизбии “Омӯзгор” ва аъзои онро дар татбиқи сиёсати Ҳукумати мамлакат ва махсусан Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва пиёдасозии ҳадафҳои муҳимми ҳизбӣ калон дониста, аз фаъолияти ташкилот изҳори қаноатмандӣ кард.

Дар охири ҷаласа якчанд аъзои Ташкилоти ибтидоии ҳизбии “Омӯзгор” аз ҳисоби кормандони муассиса барои хизматҳои содиқонаву софдилонаашон бо сипосномаи КИ Ҳизби Халқии Демократии Тоҷикистон дар шаҳри Кӯлоб сарфароз гардонида шуданд.

Имрӯз дар Кумитаи таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон мулоқоти раиси Кумита академик Фарҳод Раҳимӣ бо Сафири Фавқулодда ва Мухтори Ҷопон дар Ҷумҳурии Тоҷикистон хонум Фурута Кейко баргузор гардид.

Зимни вохӯрӣ ҷонибҳо масоили марбут ба рушди ҳамкориҳои дуҷониба дар соҳаи таҳсилоти ибтидоӣ ва миёнаи касбӣ, тайёр намудани кадрҳои коргарӣ, омӯзиши забони ҷопонӣ, мубодилаи таҷриба ва дастгирии техникию методиро мавриди муҳокима қарор доданд.

Дар оғози мулоқот академик Фарҳод Раҳимӣ меҳмони олиқадрро хайрамақдам гуфта, таъкид намуд, ки муносибатҳои дӯстона ва ҳамкориҳои судманд миёни Тоҷикистону Ҷопон дар солҳои охир тавсеа ёфта, Ҷопон яке аз шарикони боэътимоди кишвар дар самтҳои гуногун ба шумор меравад.

Академик Фарҳод Раҳимӣ дар мавриди фаъолияти Кумита ва муассисаҳои зерсохтори он маълумот дода, зикр кард, ки бо дастгирии Ҳукумати Ҷумҳурии Тоҷикистон ва шарикони рушд солҳои охир инфрасохтори муассисаҳои таҳсилоти ибтидоӣ ва миёнаи касбӣ дар мамлакат ба таври назаррас рушд ёфтааст. Дар ин раванд таҷрибаи пешқадами кишварҳое мисли Ҷопон барои Тоҷикистон намунаи хуби омӯзиш мебошад.

Раиси Кумита изҳор дошт, ки татбиқи таҷрибаи ҷопонӣ дар самти омӯзиши амалии ихтисосҳои техникиву муҳандисӣ метавонад ба беҳтар шудани сифати таълим ва мутобиқ кардани барномаҳо ба талаботи бозори меҳнат мусоидат намоянд.

Дар навбати худ хонум Фурута Кейко ба роҳбарияти Кумита барои пазироии самимӣ изҳори сипос намуда, таъкид кард, ки Ҷопон ҳамеша ба рушди нерӯи инсонӣ таваҷҷуҳи махсус зоҳир мекунад, зеро таълими босифати касбӣ дар замони технологияҳои рақамӣ нақши калидӣ дорад.

Сафир, ҳамчунин, афзуд, ки барномаҳои ҳамкории байни Ҷопон ва Тоҷикистон, аз ҷумла дар доираи Агентии Ҷопон оид ба ҳамкориҳои байналмилалӣ (JICA) имконият медиҳанд мутахассисони ҷавон дар курсҳои омӯзишӣ ва таҷрибаомӯзӣ иштирок намуда, донишу малакаҳои худро дар самтҳои муҳандисӣ, энергетика, менеҷмент ва технологияҳои иттилоотӣ такмил диҳанд.

Ҷонибҳо дар ҷараёни суҳбат масъалаи омӯзиши забони ҷопонӣ дар муассисаҳои зерсохтори Кумита ва ҳамкорӣ бо муассисаҳои таҳсилоти касбии Ҷопонро мавриди баррасӣ қарор доданд. Онҳо аз ҷонибдорӣ ва ҳамкориҳои устувори кишварҳо дар рушди соҳаи таҳсилоти касбӣ қаноатмандӣ намуда, изҳори итминон карда шуд, ки робитаҳои байни Кумита ва Сафорати Ҷопон минбаъд низ густариш меёбанд.

Вохӯрӣ дар фазои ҳамдигарфаҳмӣ ва дӯстӣ баргузор гардид.

28 октябри соли 2025 миёни Коллеҷи муҳандисию омӯзгории шаҳри Душанбе ва Коллеҷи олии педагогӣ ва технологияҳои саноатии «Каспий» -и Ҷумҳурии Қазоқистон созишномаи ҳамкорӣ ба таври маҷозӣ ба имзо расид.

Созишнома аз ҷониби директори Коллеҷи муҳандисию омӯзгории шаҳри Душанбе Рабизода Наҷибулло ва директори Коллеҷи олии педагогӣ ва технологияҳои саноатии “Каспий” Калдаманов Исенбай Абиевич дар асоси оинномаҳои ҳар ду муассиса дар мувофиқа бо Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон ба имзо расонида шуд.

Ҳадафи асосии созишномаи мазкур ба роҳ мондани фаъолияти муштараки таълимӣ ва илмию техникӣ мебошад, ки ба баланд бардоштани самаранокии омодасозии мутахассисон, рушди таҳқиқоти илмӣ ва такмили раванди таълим дар муассисаҳои таълимии мазкур нигаронида шудааст.

Тибқи бандҳои созишнома, ҷонибҳо дар самтҳои мубодилаи барномаҳои таълимии мутахассисон аз рӯи соҳаҳо ва ихтисосҳои таҳсилоти миёнаи касбӣ, мубодилаи маводи таълимию методӣ барои таҳсилоти миёнаи касбӣ ва барномаҳои таҳсилоти миёнаи касбӣ, мубодилаи донишҷӯён аз рӯйи барномаҳои таълимӣ ва фарҳангӣ, инчунин ҳама намудҳои таҷрибаомӯзии донишҷӯён, мубодилаи мутахассисон дар доираи барномаҳои таълимӣ ва таҳқиқотӣ, инчунин табодули таҷриба ва усулҳои фаъолияти таълимӣ ва таҳқиқотӣ дар соҳаҳои мавриди таваҷҷӯҳи тарафайн, иштирок дар лоиҳаҳои якҷояи илмию техникӣ, мубодилаи ахбороти илмию техникӣ, ташкили семинару конференсияҳои илмию техникӣ ва таълимиву методӣ оид ба масъалаҳои мавриди таваҷҷуҳи тарафайн, мубодилаи иттилоот, омода ва нашри якҷояи монографияҳо, мақолаҳо ва маҷмӯаҳои илмӣ, инчунин нашрияҳои таълимию методӣ, баррасии муштараки лоиҳаҳои илмӣ ва барномаҳои таълимӣ, ташкил ва татбиқи чорабиниҳои муштарак оид ба баланд бардоштани рақобатпазирии хатмкунандагон дар бозори меҳнат, таъсиси факултаи муштарак ва татбиқи барномаҳои ду дипломагӣ аз рӯйи самтҳои (ихтисосҳои) таҳсилоти миёнаи касбӣ ҳамкорӣ хоҳанд кард.

Маврид ба зикр аст, ки Коллеҷи муҳандисию омӯзгории шаҳри Душанбе феълан ҳамкориҳои судмандро бо зиёда аз 15 муассисаи таълимии хориҷи кишвар дар самтҳои илмиву таълимӣ ва фарҳангӣ ба роҳ мондааст ва тасмим дорад, ки дар оянда доираи ин ҳамкориҳоро бо муассисаҳои бонуфузи байналмилалӣ боз ҳам тавсеа бахшад.

24 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар деҳоти Пушинги ноҳияи Данғара бинои Муассисаи томактабии Гулистонро мавриди истифода қарор доданд. Иншооти навбунёд аз ҷониби соҳибкорони ватандӯсти ноҳия дар пайравӣ аз сиёсати маорифпарваронаи Сарвари давлат муҳтарам Эмомалӣ Раҳмон дар масоҳати умумии 2264 метри мураббаъ бо сифати баланд ва шароити замонавӣ бунёд ёфтааст.

Дар иншооти навбунёди таълимӣ 300 кӯдак ба таълиму тарбия фаро гирифта шуда, барои кор бо онҳо 10 мураббия ва ёварони онҳо, ки ҳамагӣ соҳибтаҷриба ва дорои ихтисоси педагогӣ мебошанд, ҷалб гардидаанд. Шумораи умумии кормандон дар муассисаи томактабӣ 29 касро ташкил медиҳад.

Бино дорои 16 ҳуҷраи барҳавои машғулият, аз ҷумла 8 ҳуҷраи хобу истироҳат, ошхона ва иншооти ёрирасон буда, ҳар кадоми он бо таҷҳизоти зарурӣ ва воситаҳои таълимӣ муҷаҳҳаз гардонида шудааст.

Дар синфхонаҳо бо мақсади ташаккулу инкишофи зеҳнии кӯдакон ва тарбияи онҳо дар рӯҳияи ватандӯстиву хештаншиносӣ шароиту имкониятҳои мусоид фароҳам оварда шудаанд. Бинои кӯдакистон бо шабакаи мутамаркази гармидиҳӣ пайваст буда, ҳуҷраҳои он бо оби гарм таъмин мебошанд.

Дар муассиса раванди таълим ва машғулиятҳо бо забонҳои тоҷикӣ, русӣ ва англисӣ ба роҳ монда шуда, барои бедор сохтани завқи эстетикии кӯдакон толори мусиқӣ низ фаъолият мекунад.

Зимни боздид аз шароити кӯдакистон Пешвои миллат муҳтарам Эмомалӣ Раҳмон ба сифати корҳои анҷомёфта ва имкониятҳои фароҳамгардида баҳои баланд дода, аз иқдомҳои созандаи соҳибкорони меҳандӯсти ноҳия изҳори қаноатмандӣ карданд.

Саҳни бинои Муассисаи томактабии Гулистон бо дарахтон ва гулу буттаҳои ороишиву ҳамешасабз ороста шуда, даромадгоҳи он пештоқи ҷолибу назаррабое дорад, ки бо завқу салиқаи баланд ороиш ёфтааст ва барои бедор сохтани ҳисси зебоиписандии кӯдакон муассир мебошад.

Ҳамзамон дар саҳни бино айвончаи тобистона барои гузаронидани машғулиятҳо сохта шудааст.

Роҳбари давлат муҳтарам Эмомалӣ Раҳмон зимни суҳбати самимӣ бо омӯзгорон ва масъулон, онҳоро барои ба роҳ мондани таълими босифат, ташаккули шахсият, омӯзиши донишҳои муосир ба хонандагон, тарбияи кӯдакон дар рӯҳияи ватандӯстӣ ва аз хурдӣ ҷой додани эҳтирому садоқат ба обу хоки аҷдодӣ дар қалби онҳо дастуру ҳидоятҳо доданд.

24 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ҷараёни сафари корӣ ба ноҳияи Данғара чор гармхонаи наву муосири хоҷагии деҳқонии Восеъро, ки дар деҳоти Пушинг ҷойгир аст, мавриди истифода қарор доданд.

Ин гармхонаҳо бо иқдоми соҳибкорони маҳаллӣ, оилаи Холматовҳо бо мақсади зиёд намудани истеҳсоли маҳсулоти кишоварзӣ сохта шуда, барои парвариши помидор, бодиринг ва лимӯ пешбинӣ гардидаанд.

Масоҳати умумии гармхонаҳо 10 садяк заминро ташкил дода, дар он тамоми инфрасохтори зарурӣ барои нигоҳдорӣ ва ҷамъоварии маҳсулот фароҳам оварда шудааст. Дар ин ҷо зиёда аз 10 сокини маҳаллӣ бо ҷойи кори доимӣ таъмин гардиданд. Дар ҳар як гармхона шароити мусоид барои нашъунамои зироатҳо фароҳам оварда шудааст. Системаи обёрии қатрагӣ ва таҷҳизоти идоракунии ҳарорат имконият медиҳад, ки дар як сол ду маротиба ҳосил ба даст оварда шавад.

Пешвои миллат муҳтарам Эмомалӣ Раҳмон ҳангоми шиносоӣ бо раванди кор дар гармхонаҳо таъкид намуданд, ки татбиқи чунин лоиҳаҳои кишоварзӣ барои таъмини бозори дохилӣ бо маҳсулоти тару тоза ва боло бурдани иқтидори содиротии кишвар аҳамияти калидӣ доранд.

Дар атрофи гармхонаҳо корҳои ободонӣ анҷом дода шуда, гулу буттаҳои ороишӣ ва дарахтони мевадиҳанда шинонида шудаанд, ки ба ҳусни зоҳирии ин мавзеъ зебоӣ мебахшанд.

Баробари ба роҳ мондани таъминоти об дар деҳоти Пушинг, заминҳои бекорхобида дубора ба гардиши кишоварзӣ ворид гардиданд. Ин иқдом имкон дод, ки кишоварзон бо рӯҳияи баланди меҳнатӣ ба парвариши маҳсулоти гуногуни сабзавот машғул шаванд. Ҳамзамон, бо дастгирии соҳибкорони ҳимматбаланд ва мақомоти иҷроияи маҳаллӣ шумораи гармхонаҳои муосир рӯз аз рӯз меафзояд.

Дар ҳамин ҷо Пешвои миллат муҳтарам Эмомалӣ Раҳмон аз намошгоҳи маҳсулоти кишоварзӣ дидан намуданд. Дар намоиш намунаҳои беҳтарини маҳсулоти худӣ, аз ҷумла сабзавоту меваҷот, зироатҳои ғалладона ва маҳсулоти ҳамин гармхона пешниҳод шуданд.

Сарвари давлат ба натиҷаи заҳмати кишоварзони хоҷагии деҳқонии Восеъ баҳои баланд дода, фаъолияти онҳоро дар рушди соҳаи кишоварзӣ саҳми арзанда номиданд.

Пешвои миллат муҳтарам Эмомалӣ Раҳмон дар анҷоми боздид ба масъулин дастур доданд, ки бо истифодаи самараноки имкониятҳо ҳаҷми истеҳсоли ватаниро афзоиш дода, барои рушди устувори соҳа ба хусус дар шароити гармхона иқдомҳои нав андешанд.

Муҳаммад Абдуллоев донишҷӯи соли дуюми Коллеҷи технологӣ-фарматсевтии Тоҷикистон дар ноҳияи Ёвон аст. Ӯ ғолиби ҷойи якум аз номинатсияи технологияи иттилоотӣ дар даври дуюми озмуни “Илм - фурӯғи маърифат” буда, феълан барои ғолибият дар даври ниҳоӣ талош дорад.

Ба андешаи Муҳаммад, имрӯз технологияҳои иттилоотӣ ба яке аз муҳимтарин омилҳои пешрафти кишвар табдил ёфтааст. Иқтисоди рақамӣ, ки асоси онро иттилоот ва технология ташкил медиҳанд, рушди устувор ва таъмини самаранокии иқтисодиётро таъмин менамояд. Ҳамчунин, технологияҳои иттилоотӣ имконият медиҳанд, ки истеҳсолот, савдо, молия ва хизматрасониҳо дар шакли рақамӣ амалӣ гарданд.

“Инро ба инобат гирифта, мо-ҷавонон дар пайи омӯзиши илмҳои дақиқ ва фанни технологияи иттилоотием. Ман соли дуюм аст, ки дар ин озмун иштирок мекунам ва орзу дорам дар даври ниҳоӣ ғолибият ба даст орам. Раҳмат ба Пешвои муаззами миллат, ки барои мо ҷавонон шароит муҳайё месозанд, то илму дониш гирем, ҳамқадами замон бошем ва дар чунин озмунҳо иштирок кунем. "Илм - фурӯғи маърифат" озмунест, ки зеҳни моро рушду инкишоф медиҳад, сатҳи донишамонро баланд мегардонад. Дар оянда орзу дорам, дар самти барномамозӣ ва кор бо технологияҳо мутахассиси хуб гашта, дар пешрафти Ватани маҳбуб нақше гузорам”, - иброз дошт Муҳаммад Абдуллоев.

Ёдовар мешавем, ки 21 октябр дар Донишгоҳи миллии Тоҷикистон даври ниҳоии Озмуни ҷумҳуриявии «Илм — фурӯғи маърифат» оғоз гардида, он то 24 ноябр дар Донишгоҳи миллии Тоҷикистон ва Донишгоҳи техникии Тоҷикистон ба номи академик М. Осимӣ идома мекунад.

24 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар деҳоти Пушинги ноҳияи Данғара корхонаи парандапарварии Ҷамъияти дорои масъулияти маҳдуди Парандаи Пушингро ифтитоҳ намуданд.

Корхонаи мазкур бо ҳадафи саҳмгузорӣ дар таъмини амнияти озуқавории кишвар ва истиқболи сазовори ҷашни бузурги миллӣ – 35-солагии Истиқлоли давлатӣ аз ҷониби соҳибкорони маҳаллӣ таъсис дода шудааст. Барои парвариш ва нигоҳдории мурғ шароити мусоид фароҳам оварда шуда, иқтидори умумии паррандапарварӣ 40 ҳазор сар чӯҷаро дар бар мегирад.

Пешвои миллат муҳтарам Эмомалӣ Раҳмон зимни шиносоӣ бо фаъолияти корхона иброз доштанд, ки таъсиси чунин корхонаҳои парандапарварӣ барои баланд бардоштани сатҳи таъминот бо маҳсулоти ватанӣ аҳамияти калон дорад. Ин иқдом имконият медиҳад, ки бозори дохилӣ бо маҳсулоти босифати истеҳсоли худӣ таъмин шуда, ҷойҳои нави корӣ барои аҳолӣ муҳайё гардад.

Масоҳати умумии корхонаи Парандаи Пушинг 23 ҳазору 695 метри мураъббаро ташкил дода, дар он фермаҳои парандапарварӣ, қитъаҳои махсуси нигоҳдорӣ ва коргоҳи хӯроки омехта мавҷуданд. Ҳоло дар фабрикаи истеҳсоли хӯроки паранда асбобу таҷҳизоти муосир насб гардида, истеҳсоли он мутобиқи талаботи ҷаҳонӣ ба роҳ монда шудааст.

Дар маҷмӯъ, дар корхонаи Парандаи Пушинг 15 сокини маҳаллӣ, аз ҷумла занони хонашин, бо кори доимӣ ва музди хуб таъмин шудаанд.

Ба Сарвари давлат муҳтарам Эмомалӣ Раҳмон иттилоъ доданд, ки дар паҳлуи корхона 165 панели офтобӣ насб гардидааст, ки ҳар рӯз 380 кВт/с неруи барқ истеҳсол мекунад. Аз ин ҳаҷм, корхона тақрибан 115 кВт/с неруи барқро барои таъмини фаъолияти худ истифода мебарад, боқимонда метавонад барои ниёзҳои дигар ё захираҳо равона гардад.

Ҳамчунин, дар ҳудуди комплекси агросаноатии мазкур ниҳолҳои сабзу зебо шинонида шуда, барои сабзиши муҳити зист ва ҳусни атроф шароити мусоид фароҳам оварда шудааст.

Сарвари давлат, муҳтарам Эмомалӣ Раҳмон зарур шумурданд, ки барои баланд бардоштани фоиданокии кор шумораи коргоҳҳои парвариши паранда афзун карда шавад.

Пешвои миллат муҳтарам Эмомалӣ Раҳмон зимни шиносоӣ бо фаъолияти корхона ба масъулин дастур доданд, ки аз масоҳати он на танҳо барои парвариши гулҳои мавсимӣ, балки дигар зироатҳои кишоварзӣ низ самаранок истифода баранд.

Дар рӯзи дуюми сафари корӣ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар деҳаи Алиҷони деҳоти Пушинги ноҳияи Данғара Муассисаи таҳсилоти миёнаи умумии №89-ро мавриди баҳрабардорӣ қарор доданд.

Муассисаи мазкур бо дастгирии Ҳукумати Ҷумҳурии Тоҷикистон ва саҳми соҳибкорони ватандӯст бунёд гардида, дорои шароити муосири таълиму тарбия мебошад.

Муассисаи навбунёд барои 480 хонанда дар ду баст пешбинӣ шуда, дорои 4 синфхонаи ибтидоӣ, 5 синфхонаи фаннӣ, 1 синфхонаи компютерӣ, 3 синфхонаи умумии таълимӣ, ҳуҷраи кории омӯзгорон ва китобхона мебошад, ки дар онҳо имконоти ҳозиразамон ва лавозимоту аёнияти таълимӣ муҳайё гардидааст.

Дар китобхонаи муассиса беш аз 1500 адабиёти илмию бадеӣ маҳфуз аст ва хонандагон бо китобҳои дарсии нав таъмин гардидаанд.

Иштироки хонандагони Муассисаи таҳсилоти миёнаи умумии №89 дар озмунҳои ҷумҳуриявӣ назаррас буда, соли 2024 як хонандаи он дар даври ҷумҳуриявии озмуни “Фурӯғи субҳи доноӣ китоб аст” ба гирифтани ҷойи аввал мушарраф гардидааст.

Ба Сарвари давлат муҳтарам Эмомалӣ Раҳмон иттилоъ дода шуд, ки ин муассисаи таълимӣ бо назардошти осон намудани мушкили хонандагон, ки қаблан барои таҳсил тақрибан 2 киллометр роҳро аз мавзеъҳои душворгузар тай менамуданд ва дар фасли зимистон пешорӯи мушкилӣ мегардиданд, бунёд ёфтааст. Сохтмони бинои мактаб соли 2024 оғоз гардида, он бо сифати баланд ва ҷавобгӯи талабот пеш аз муҳлат ба истифода дода шуд.

Ҷиҳати тақвияти ҷаҳонбинии хонандагон ва ҷалби бештари онҳо ба омӯзиши забонҳои хориҷӣ дар муассисаи таълимӣ синфхонаи забонҳои хориҷӣ омода шуда, омӯзгорони соҳибкасб ба кор ҷалб гардидаанд.

Дар синфхонаҳои таълими меҳнат низ бо мақсади сайқал додани малакаи хонандагон дастгоҳ ва асбобу анҷоми лозима харидорӣ ва насб шудааст. Аз ҷумла синфхонаи таълими меҳнат барои духтарон бо 8 дастгоҳи дӯзандагӣ таъмин гардида, дар доираи маҳфили дохилимуассисавии “Дастони моҳир” ба духтарон ҳунарҳои дӯзандагӣ, гулдӯзӣ, муҳрабофӣ ва пазандагӣ омӯзонида мешавад. Ҳамчунин дар синфхонаи таълими меҳнат барои писарон дастгоҳҳои пармакунии чубу оҳан, суфтакунии тахта, челонгарӣ, арраи барқӣ ва олоти кандакорӣ дастрас карда шудааст, ки ба раванди касбомӯзии хонандон таъсири мусбат мерасонад.

Дар иншооти навбунёд системаи ягонаи гармидиҳӣ мавҷуд буда, дар фасли зимистон синфхонаҳо ва ҳуҷраҳои кории муассиса бо гармӣ таъмин карда мешаванд.

Пешвои миллат муҳтарам Эмомалӣ Раҳмон зимни суҳбат бо масъулин ва омӯзгорони муассиса дастур доданд, ки истифодаи самараноки шароиту имконоти муҳайёшударо ба манфити кор ба роҳ монда, дар тақвияти донишу малакаи хонандагон, тарбияи ин қишри ояндасоз дар рӯҳияи ватандӯстӣ ва арҷгузорӣ ба муқаддасоти миллӣ, омода намудани онҳо ба озмунҳои ҷумҳуриявию байналмилалӣ ва боз ҳам беҳтар кардани сифати таълим дар маҳал таваҷҷуҳи аввалиндараҷа равона созанд.

Атрофи муассисаи мазкур бо гулҳои мавсимӣ ва дарахтони ороишию ҳамешасабз оро дода шуда, дар идомаи тадбирҳои ободонӣ роҳи муассиса то роҳи асосии деҳа мумфарш гардидааст.

23 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар деҳаи Ғарғара Муассисаи таҳсилоти томактабии хусусии Ҷасурро ифтитоҳ намуданд.

Иншоот дар асоси супориши Роҳбари давлат вобаста ба бунёди ҳатмии кӯдакистон дар маҳаллаҳои дорои зиёда аз 100 хоҷагӣ аз ҷониби соҳибкор Ҷомии Абдураҳмон сохта шудааст.

Ин иқдом бозгӯи гузоштани саҳми муносиб дар татбиқи босамари “Барномаи давлатии рушди таҳсилоти томактабӣ дар Ҷумҳурии Тоҷикистон барои солҳои 2020 - 2025” аз ҷониби соҳибкорон аст.

Иншооти мазкур дар деҳаи Ғарғара аввалин кӯдакистон буда, тарҳи миллӣ ва муосир дорад. Синфхонаҳои муҷаҳҳаз бо муҳимтарин лавозимот барои бо таҳсилоти томактабӣ фаро гирифтани 350 кӯдак пешбинӣ шудааст.

Таълими дӯстрӯякон бо забонҳои тоҷикӣ, русӣ ва англисӣ бо ҷалби 12 парастори соҳибтахассус сурат мегирад. Машғулияти кӯдакон бо истифода аз ранг, ҳарфу рақам, аломату нишонаҳо ва шаклҳои геометрӣ гузаронида мешавад.

Парасторон бо истифода аз ин шароит ва ташкили бозиҳои гуногун, омӯзиши суруд, рассомӣ ва машқҳои равонӣ қобилияти ҳалли масъалаҳо ва фикрронии кӯдаконро инкишоф медиҳанд.

Барои истироҳати кӯдакон ҳуҷраҳо бо рахти бароҳат, ҷевон ва бозичаҳои мутобиқ ба завқи онҳо таҷҳизонида шудааст.

Пешвои миллат муҳтарам Эмомалӣ Раҳмон иқдоми соҳибкорро барои дар шароити деҳот бунёд намудани кӯдакистони ҷавобгў ба талабот намунаи пайравӣ ба сиёсати маорифпарваронаи Ҳукумати кишвар унвон намуданд. Ба таъкиди Сарвари давлат фаъолияти боғчаҳо дар рушди зеҳну тафаккур, забон ва муошират, эҷодкорӣ, мутобиқ шудан ба муҳити омӯзиш ва омодагии кӯдакон ба давраи мактаб нақши муасир мегузорад. Масъалаҳои бунёд ва фаъолияти кӯдакистонҳо дар ҳама шаҳру деҳот, ки ба иҷрои талаботи Стратегияи миллии рушди Ҷумҳурии Тоҷикистон барои давраи то соли 2030 дар хусуси фарогирии ҳарчи бештари кӯдакон бо таҳсилоти томактабӣ нақш мегузорад, бештар таъкид гардид.

Пешвои миллат муҳтарам Эмомалӣ Раҳмон аз ҳайати мураббияҳо истифодаи дурусти шароити фароҳамшуда ва дар рӯҳияи ватандӯстӣ тарбия намудани кӯдаконро тақозо намуда, иҷрои дурусти ин рисолатро нишони дӯст доштани миллату давлат унвон карданд.

Барои бемушкилӣ сипарӣ намудани мавсими тирамоҳу зимистон ҳуҷраҳо бо шабакаи гармидиҳӣ пайваст буда, зиёда аз 100 тонна ангишт захира карда шудааст.

Гулу буттаҳо ва дарахтони ороишии дар саҳни ҳарду бино шинонидашуда ҳусни ин мавзеъи деҳаи Ғарғараро диданӣ ва афзун мекунад.

Ду иншооти ба зеҳну тафаккур заминагузор: Китобхона ва Муассисаи таҳсилоти томактабии хусусии Ҷасур, ки аз ҷониби Пешвои миллат муҳтарам Эмомалӣ Раҳмон дар деҳаи Ғарғара ифтитоҳ ёфтанд, ба таъсиси 37 ҷойи нави корӣ замина гузоштанд.

Майдони варзишии болопӯшида дар деҳаи Ғарғараи деҳоти Корези ноҳияи Данғара сеюмин иншооти аз ҷониби соҳибкор Ҷомии Абдураҳмон сохта шуда аст, ки дар ҳамин рӯз бо иштироки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ифтитоҳ ёфт.

Иншоот барои баргузории бозии футбол пешбинӣ шуда, рамзи таваҷҷуҳ ба рушди ин навъи варзиш ва сарафрозии соҳибкорон аз ташаббус ва пешниҳоди Раиси Федератсияи футболи Тоҷикистон муҳтарам Рустами Эмомалӣ вобаста ба эълони рӯзи ҷаҳонии футбол аст, ки соли 2024 аз ҷониби Созмони Милали Муттаҳид қабул гардид.

Майдони варзишии болопӯшида дар масоҳати 20 садяк замини бекорхобида бо паҳноии 22 метр ва дарозии 42 метр бунёд шудааст.

Иншоот бо ҷалби 40 сокини маҳаллӣ ҷавобгӯи талабот сохта шуда, ҳамчун макони баргузории бозиҳои дӯстона ва муттаҳидкунандаи ҷавонон хизмат менамояд.

Тарҳи майдони варзишӣ имкон медиҳад, ки бозиҳои футбол новобаста ба фасли сол ташкил ва баргузор шавад.

Дар шафати иншоот барои бозии волейбол ва дигар машқу тамрин шароит фароҳам оварда шудааст.

Ҳуҷраҳои ивазкунии либос, ҳаммом ва дигар инфрасохтори мавҷуд таваҷҷуҳи ҷавононро ба намудҳои гуногуни варзиш бештар намуда, ба ташаккули тарзи ҳаёти солим нақш мегузорад.

Ҳудуди майдони варзишии болопӯшидаро гулҳои рангин, буттаҳо ва дарахтони ороишву ҳамешасабз зиннат медиҳанд.

Сокинон имкон доранд, ки аз рақобати дастаҳои футбол ва гулгашти ҳудуди он хушу бароҳат тамошо намоянд. Барои ин дар паҳлӯи майдони варзишӣ нишастгоҳҳо насб карда шудааст.

Дар доираи сафари корӣ ба вилояти Хатлон Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар деҳаи Раҳмониёни деҳоти Корези ноҳияи Данғара бинои нави Маркази саломатиро мавриди баҳрабардорӣ қарор дода, бо шароити кор ва хизматрасонии он шинос шуданд.

Бунёди бинои нави маркази саломатӣ аз моҳи феврали соли 2025 оғоз гардида, дар рафти корҳои сохтмонӣ зиёда аз 45 мутахассису коргари маҳаллӣ ба кори муваққатӣ ҷалб шуда буданд. Иншоот пурра бо истифода аз маҳсулоти баландсифати ватанӣ ва бо харҷи 10 миллион сомонӣ сохта шудааст.

Маркази нави саломатӣ сеошёна буда, аз шуъбаи таваллуд бо 10 кати хоб барои модару кӯдак, 46 ҳуҷраи корӣ, аз ҷумла барои табиби дандон, ташхиси ултрасадо, тибби оилавӣ, ҷарроҳӣ, ташхиси дилу рагҳо, амрози занона ва ҳуҷраҳои ёрирасон иборат мебошад.

Бино бо таҷҳизоти махсуси гармидиҳӣ таъмин мебошад.

Иншооти нави саломатӣ барои хизматрасонӣ ба зиёда аз 100 ҳазор сокини ноҳия бо сатҳу сифати ҷавобгӯ ба талаботи муосир пешбинӣ шудааст.

Ба Пешвои миллат муҳтарам Эмомалӣ Раҳмон иттилоъ дода шуд, ки дар маркази нави саломатӣ шароиту имкониятҳои муосири кору хизматрасонӣ фароҳам оварда шуда, 54 таҷҳизоти тиббии он аз кишварҳои пешрафтаи ҷаҳонӣ харидорӣ гаштааст.

Маркази навбунёди саломатӣ аз зумраи иқдомҳои роҳбарияти давлат дар самти татбиқи амалии сиёсати инсондӯстонаи иҷтимоӣ ва дар доираи корҳои ободонӣ бахшида ба ҷашни 35-солагии Истиқлоли давлатии Ҷумҳурии Тоҷикистон бунёд гашта, бо тарҳ ва намои зебои худ ба ҳусни ин мавзеъ зебогии дигар зам менамояд.

Президенти кишвар муҳтарам Эмомалӣ Раҳмон ба масъулин барои бунёди маркази муосири саломатӣ изҳори сипос намуда, табибонро ба хизмати софдилона ба мардум ҳидоят намуданд.

Дар партави сиёсати иҷтимоии давлат ва дастгириҳои ҳамешагии Пешвои миллат муҳтарам Эмомалӣ Раҳмон бунёди муассисаҳои нави тиббӣ ва ҷавобгӯ ба талаботи муосир дар саросари кишвар зиёд гардида, сатҳу сифати хизматрасониҳо боло меравад.

23 октябр бо иштироки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар маркази ноҳияи Данғара бинои нави Раёсати маорифи ноҳия мавриди истифода қарор дода шуд.

Бинои бошукўҳ аз 7 ошёна ва 157 ҳуҷраи корӣ иборат буда, он дар доираи истиқболи сазовор аз ҷашни бузурги миллӣ – 35-солагии Истиқлоли давлатӣ бо тарҳи замонавӣ ва услуби меъмории миллӣ бунёд шудааст.

Зимни шиносоӣ ба Сарвари давлат муҳтарам Эмомалӣ Раҳмон иттилоъ дода шуд, ки бинои мазкур дар масоҳати 0,88 гектар бунёд гардида, дар он шароити арзандаи корӣ фароҳам оварда шудааст.

Бинои нави Раёсати маорифи ноҳияи Данғара дорои ду маҷлисгоҳи барҳаво дар маҷмуъ бо 500 ҷойи нишаст мебошад.

Ҳамзамон дар бино 2 лифти замонавӣ насб гардидааст.

Ин бинои хуштарҳу замонавӣ дорои китобхона ва ошхона бо 140 ҷойи нишаст буда, ҳамчунин ҳуҷраҳои мусоиди корӣ муҷаҳҳаз бо муосиртарин технологияи иттилоотию коммуникатсионӣ аз бартариятҳои дигари иншоот ба шумор меравад, ки ба ноҳия ҳусни дигар зам кардааст.

Шароити фароҳамгардида дар бинои нав барои 40 корманд имконият медиҳад, ки минбаъд аҳли маориф фаъолияти худро ҷоннок намуда, дар рушди соҳа, баланд бардоштани сатҳу сифати таҳсилот ва таълиму табрияи насли худогоҳу ватандӯст саҳми намоён гузоранд.

Атрофи бинои нави Раёсати маорифи ноҳияи Данғара чароғон ва сабзу хуррам гардонида шудааст.

Ҳоло дар ноҳияи Данғара 85 муассисаи таълимӣ бо фарогирии 53 ҳазору 646 хонанда фаъолият дорад. Соли равон тибқи Квотаи Президентӣ 18 хатмкарда ба макотиби олии кишвар дохил шуданд, ки 9 касашон духтарон мебошанд. Ҳамзамон барои таҳсили солҳои 2025-2026 454 омӯзгор аз курси такмили ихтисос гузаштаанд.

Дар идомаи таҳсили соли 2025 хонандагон дар олимпиадаҳои фаннии ҷумҳуриявӣ иштирок намуда, соҳиби 171 медал, аз ҷумла 13 медали тилло, 22 медали нуқра ва 136 медали биринҷӣ, гардиданд.

Пешвои миллат муҳтарам Эмомалӣ Раҳмон пас аз шиносоӣ бо иншооти нав ба сифати корҳои анҷомёфта баҳои баланд дода, ба аҳли маорифи ноҳия барои боз ҳам баланд бардоштани сифати тадрис, истифодаи васеи технологияҳои муосир, ҷалби ҳарчи бештари хонандагон ба омӯзиши фанҳои табиатшиносӣ, дақиқ ва риёзӣ дастуру тавсияҳо доданд.

23 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ду бинои нави таълимии Донишгоҳи давлатии тиббии Хатлонро дар ноҳияи Данғара мавриди баҳрабардорӣ қарор доданд.

Биноҳои таълимии рақами 2 ва 3 дар доираи марҳилаи дуюми бунёди маҷмааи Донишгоҳи давлатии тиббии Хатлон ва ба истиқболи ҷашни бузурги миллӣ – 35 солагии Истиқлолияти давлатии Ҷумҳурии Тоҷикистон бо тарҳу услуби зебои меъморӣ бунёд ёфтааст.

Ба Пешвои миллат муҳтарам Эмомалӣ Раҳмон иттилоъ доданд, ки бинои таълимии рақами 2 бо 45 синфхонаи таълимӣ барои 1200 донишҷӯ ва бинои таълимии рақами 3 бо 49 синфхонаи таълимӣ барои 1416 донишҷӯ пешбинӣ шудааст.

Ҳамзамон дар биноҳои нави таълимӣ 9 синфхонаи озмоишӣ, 2 толори маърӯзавӣ, 1 маркази тестӣ бо фарогирии 2600 ҷойи нишаст ва 6 кафедра аз ҷумла “Биохимия ва биология” , “Фармакология ва микробиология”, “Тибби ҳарбӣ”, “Беҳдошт ва эпидемиология”, “Химияи тиббӣ ва экология” ва “Физиологияи нормалӣ ва патологӣ” бо шароити хуби таълимӣ ва дастгоҳу таҷҳизоти муосири тиббӣ омода карда шудаанд.

Ёдовар мешавем, ки соли 2016 бо мақсади таъмин намудани муассисаҳои тандурустии вилояти Хатлон бо кадрҳои баландихтисоси соҳа бо қарори Ҳукумати Ҷумҳурии Тоҷикистон ва ташаббуси Пешвои миллат муҳтарам Эмомалӣ Раҳмон Донишгоҳи давлатии тиббии Хатлон таъсис дода шуда, 31 августи соли 2016 бо гузоштани санги асос ба сохтмони бинои асосии донишгоҳ оғоз бахшида шуд.

Бинои асосии Донишгоҳи давлатии тиббии Хатлон бо бинои таълимии рақами 1 моҳи сентябри соли 2023 мавриди баҳрабардорӣ қарор гирифт, ки он замон донишгоҳ бо зиёда аз 2 ҳазор ҷойи нишаст дар як вақт таъмин гардида буд. Акнун бо мавриди баҳрабардорӣ қарор гирифтани биноҳои таълимии рақами 2 ва 3 дар ин даргоҳи илму маърифат 2600 ҷойи нишаст зиёд гардид. Ҳоло дар донишгоҳ дар маҷмуъ 5 ҳазору 412 ҷойи нишаст барои донишҷӯён омода карда шудааст.

Шумораи умумии донишҷӯён дар соли хониши 2025-2026 2 ҳазору 852 нафар аз шаҳру ноҳияҳои кишвар ва ҳайати омӯзгорону профессорон 215 нафарро ташкил медиҳанд.

Фаъолияти илмӣ-инноватсионии донишгоҳ аз соли 2018 инҷониб роҳандозӣ гардида, то имрӯз 1465 таълифоти илмӣ, 6 монография, 6 ихтироот, 65 пешниҳоди навоварона, 112 санади воридсозӣ, 14 китоби таълимӣ ва зиёда аз 60 дастури методӣ аз ҷониби олимони донишгоҳ ба нашр расидааст. Инчунин аз соли 2018 инҷониб 3 корманди донишгоҳ рисолаи докторӣ ва 8 кас рисолаи номзадӣ ҳимоя намудаанд. Дар самти таҳқиқот ва гузаронидани корҳои илмӣ олимони ҷавони донишгоҳ низ муваффақ буда, ҳамасола дар озмунҳои ҷумҳуриявӣ ва байналмилалӣ ширкат меварзанд. Ин аст, ки донишҷӯёни ин муассисаи олии касбӣ дар озмунҳо 25 ҷойи аввал, 27 ҷойи дуюм, 30 ҷойи сеюм, 20 ҷойи ифтихорӣ ва 9 дипломи дараҷаи 1 ва 2-ро ба даст овардаанд. Ҳамзамон соли 2022 дар Озмуни ҷумҳуриявии “Илм фурӯғи маърифат” ғолиби ҷойи сеюм, соли 2023 соҳиби шоҳҷоиза ва соли 2024 сазовори ҷойи дуюм гардидаанд.

Пешвои миллат муҳтарам Эмомалӣ Раҳмон зимни суҳбат бо донишҷӯён ва ҳайати омӯзгорони донишгоҳ таъкид намуданд, ки илму маориф доимо дар сиёсати Ҳукумати кишвар мавқеи меҳварӣ дорад ва олимону муҳаққиқон, омӯзгорону зиёиён неруи созанда ва пешбарандаи кулли соҳаҳои ҳаёти кишвар мебошанд. Яке аз ҳадафҳои муҳимме, ки дар назди омӯзгорону олимон қарор дорад, ин тарбияи мутахассисони варзида, ҷавобгӯ ба талаботи замони муосир ва мутобиқ ба меъёрҳои ҷаҳонӣ аст.

Давоми 9 соли фаъолият заминаи моддию техникии Донишгоҳи давлатии тиббии Данғара мукаммал гардонида шуда, дар синфхонаҳои таълимӣ ва озмоишгоҳҳои фаннию илмӣ технологияи нав, дастгоҳу таҷҳизоти муосир мавриди истифода қарор доранд.

Ба хотири густариши равобит ва ҳамкориҳои судманд бо муассисаҳои олӣ ва марказҳои бонуфузи илмии дохил ва хориҷи кишвар донишгоҳ 22 шартномаи ҳамкорӣ бо Мактаби байналмилалии Қирғизистон, Донишгоҳи тиббии Ал-Форобӣ, Донишгоҳи тиббии Қарагандаи Қазоқистон, Академияи тиббии Ҷумҳурии Беларус, Донишгоҳи тиббии Павияи Италия, Донишгоҳи ҷаҳонии Куруши Кабири ИМА ва Донишгоҳи давлатии тиббии Урали Ҷанубии Федератсияи Русия ба имзо расонидааст, ки то имрӯз соҳиби 5 лоиҳаи грантӣ мебошад.

Донишгоҳ соли 2022 аъзои комилҳуқуқи “Ассотсиатсияи баҳодиҳии экспертии таълими тиббӣ дар Аврупои Шарқӣ ва Осиёи Марказӣ” ва соли 2023 расман дар руйхати Феҳристи Умумиҷаҳонии Донишгоҳҳои тиббӣ ворид гардидааст.

Бо қарори Ҳукумати Ҷумҳурии Тоҷикистон дар низоми маорифи кишвар стандартҳои нави давлатӣ қабул гардида, бунёд ва зиёд намудани шумораи муассисаҳои олӣ васеъ ба роҳ монда шудааст. Ин аст, ки дар солҳои соҳибистиқлолӣ шумораи муассисаҳои олии кишвар аз 13 ба 47 муассисаи олӣ ва шумораи донишҷӯён аз 65 ҳазор ба зиёда аз 220 ҳазор расонида шудааст.

Таъсиси Донишгоҳи давлатии тиббии Хатлон дар ноҳияи Данғара низ аз дастовардҳои назарраси соҳаҳои маорифу тандурустӣ мебошад.

Президенти Ҷумҳурии Тоҷикистон муҳтарам Эмомалӣ Раҳмон дастур доданд, ки ба масъалаҳои сифати дониш, касбияти донишҷӯён, такмили ихтисоси омӯзгорону олимони ҷавон эътибори ҷиддӣ дода шуда, усулҳои нави таълим ва истифодаи васеи технологияи муосир ба пуррагӣ ҷорӣ карда шавад.

Ҳоло дар донишгоҳ 10 шуъба, 2 Шурои илмӣ, 5 марказ, 5 факултет, 21 кафедра, 2 коллеҷ, китобхонаи барҳаво, 4 ташкилоти ҷамъиятӣ, дармонгоҳ ва озмоишгоҳи марказӣ фаъолияти самаранок доранд.

Боиси зикр аст, ки соли 2021 аввалин маротиба дар Донишгоҳи давлатии тиббии Хатлон хатми донишҷӯён сурат гирифт ва то имрӯз 1532 донишҷӯ ин боргоҳи илмро хатм намудааст. Аз ин шумора 113 нафар соҳиби дипломи аъло гардидаанд.

Дар ҳамин ҷо, Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо лоиҳаи Нақшаи генералии маркази маъмурии ноҳияи Данғара ва лоиҳаи бунёди ду бинои нуҳошёнаи истиқоматӣ барои омӯзгорони Донишгоҳи давлатии Данғара шинос шуданд. Зимни муаррифӣ иттилоъ доданд, ки сохтмони биноҳо дар масоҳати 1430 метри мураббаъ дар кӯчаи Исмат Шарифи шаҳраки Данғара ба нақша гирифта шудааст.

Хурсандиовар аст, ки Ҳукумати кишвар маорифро аз соҳаҳои калидӣ ва пешбарандаи ҷомеа эътироф намуда, омӯзгорону олимонро захираи бузурги зеҳнии ҷомеа медонад ва мақоми олимону омӯзгоронро аз нигоҳи иҷтимоӣ, маънавӣ ва молиявӣ давра ба давра баланд мебардорад.

Ҳарду бино аз нуҳ ошёна иборат буда, 36 хонаи дуҳуҷрагӣ бо масоҳати 67,84 метри мураббаъ ва 36 хонаи якҳуҷрагӣ бо масоҳати 52,80 метри мураббаъ пешбинӣ гардидааст, ки барои таъмини 72 оилаи омӯзгор бо манзили истиқоматӣ пешбинӣ гардидааст. Манзилҳои истиқоматӣ дар 3 сол омода хоҳанд шуд.

Пешвои миллат муҳтарам Эмомалӣ Раҳмон таъкид доштанд, ки ба хотири устуворӣ ва мустаҳкамии иншоот дар раванди корҳои сохтмонӣ маҳсулоти хушсифат истифода бурда шуда, сифати корҳои сохтмонӣ дар мадди аввал гузошта шавад.

Ҳамчунин дар ҳамин ҷо, ба Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон оид ба Нақшаи генералии шаҳраки Данғараи ноҳияи Данғара маълумот дода шуд.

Нақшаи генералии шаҳраки Данғара аз ҷониби ҶСК “Шаҳрофар” дар масоҳати 3861 гектар таҳия гардида, бо қарори Ҳукумати Ҷумҳурии Тоҷикистон аз 29 июли соли 2022 тасдиқ гардидааст.

Ба Пешвои миллат муҳтарам Эмомалӣ Раҳмон иттилоъ доданд, ки ҳудуди нақшаи генералии шаҳрак ба ҳудудҳои маркази маъмурию ҷамъиятӣ, иморатсозии бисёрошёна ва хусусии истиқоматӣ, коммуналию анборӣ ва хизматрасонии марказӣ ҷудо карда шудааст.

Дар соли 2024 лоиҳаи муфассали банақшагирии кӯчаҳои Марказӣ, Неъмат Қарабоев, Зебунисо, Шарқ, Киров, Исмат Шариф, маҳаллаи рақами 8 ва Ҷамоати деҳоти Сафобахш ва деҳаи Файзбахш дар масоҳати 240 гектар барои 72 ҳазору 700 хонавода таҳия гардидааст.

Фонди манзили лоиҳавӣ 1 миллиону 455 ҳазору 300 метри мураббаъро дар бар гирифта, аҳолӣ аз ҳисоби 20 метри мураббаъ ба 1 нафар 72 ҳазору 700 нафарро ташкил медиҳад.

Талабот ба муассисаи таҳсилоти миёнаи умумӣ 9600 ва таҳсилоти томактабӣ 7200 касро дар бар мегирад.

Дар ин асос, дар лоиҳаи муфассали банақшагирӣ бунёди 315 бинои истиқоматии аз 9 то 16 ошёна, 8 муассисаи таҳсилоти миёнаи умумӣ, 13 муассисаи таҳсилоти томактабӣ, 46 иншооти ҷамъиятию корӣ ва савдо, 6 таваққуфгоҳи нақлиётии 5-6 ошёна, роҳҳои мошингард, майдончаҳои варзишӣ, боғҳои фарҳангӣ ба нақша гирифта шудааст.

Пешвои миллат муҳтарам Эмомалӣ Раҳмон дастур доданд, ки дар ҷараёни корҳои сохтмонӣ дар иншооти гуногуни пешбинигардида ба сифати кор ва маҳсулот таваҷҷуҳи ҷиддӣ зоҳир карда шуда, иншооти таъйиноти гуногун ва биноҳои баландошёна бо риояи стандартҳои байналмилалӣ ва унсурҳои меъмории миллӣ бунёд гардад.