12 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Ашхободи Туркманистон дар Форуми байналмилалии сулҳ ва эътимод, ки дар доираи “Соли байналмилалии сулҳ ва эътимод, 2025” баргузор мегардад, иштирок ва суханронӣ намуданд.

Дар оғози сухан Сарвари давлати мо ба роҳбарияти Туркманистон ва Созмони Милали Муттаҳид барои роҳандозии ин ҳамоиши байналмилалии муҳим арзи сипос намуда, мардуми Туркманистонро бо 30-солагии бетарафии доимии кишвар табрику таҳниат гуфтанд.

Муҳтарам Эмомалӣ Раҳмон зимни суханронӣ аз рӯбарӯшавии ҷомеаи ҷаҳонӣ бо рақобати печидаи геосиёсӣ ва заиф шудани меъёрҳои ҳуқуқи байналмилалӣ ёдовар шуда, изҳор намуданд, ки болоравии таҳдиду хатарҳои ҷаҳони муосир боиси коҳиши суръати пешрафти иқтисодию иҷтимоӣ мегардад.

Таъкид гардид, ки “сулҳ ва эътимод дар пешбурди муносибатҳои байналмилалӣ, коҳиш додани таҳдиду хатарҳо, муҳайёсозии шароити муносиб барои ҳамкорӣ ва рушди устувор дар арсаи ҷаҳонӣ нақши муҳимтарин мебозанд”.

Ба андешаи муҳтарам Эмомалӣ Раҳмон, сулҳу эътимод имкон медиҳанд, ки мушкилоти печидаи ҷаҳони имрӯза дар фазои ҳамдигарфаҳмӣ ва масъулияти муштарак ҳалли худро пайдо намоянд.

Дар ин робита таъкид гардид, ки паёмадҳои нохуши хатарҳои экологӣ, ба мисли тағйирёбии иқлим, обшавии босуръати пиряхҳо, олудашавии муҳити зист ва дигар мушкилот низ тадбирҳои муштараку ҳамбастаи ҷомеаи ҷаҳониро талаб менамояд.

Сарвари давлати мо муҳтарам Эмомалӣ Раҳмон аз равандҳои ҷаҳонии Душанбе доир ба об ва муқовимат ба терроризм ёдовар шуда, таъкид доштанд, ки Тоҷикистон дар ҳалли мушкилоти глобалӣ пайваста саҳми муносиби худро мегузорад.

Муҳтарам Эмомалӣ Раҳмон изҳор доштанд, ки “Тоҷикистон аз ҳамаи ташаббусҳо доир ба таҳкими сулҳу амонӣ дар ҷаҳон пайваста пуштибонӣ менамояд”.

Дар ин робита аз пешниҳоди порсолаи Тоҷикистон ба СММ доир ба эълон намудани “Даҳсолаи таҳкими сулҳ дар ҷаҳон барои наслҳои оянда” бори дигар ёдоварӣ карда шуд.

Дар хулосаи сухан Сарвари давлати мо муҳтарам Эмомалӣ Раҳмон “тантанаи сулҳ”-ро “гарави таъмини адолат, баробарӣ, эҳтироми ҳуқуқ ва озодиҳои инсон” номида, изҳор доштанд, ки “ҷомеаи ҷаҳонӣ ба ин арзиши воло бояд бо такя ба эътимод, гуфтугӯ ва ҳамкорӣ муносибати эҳтиёткорона дошта бошад”.

Таъкид гардид, ки Тоҷикистон минбаъд низ омода аст, бо истифода аз анъанаҳои мақбули дипломатӣ, гуфтугӯи васеи созанда ва дигар воситаҳои сулҳомез дар таъмини амну субот ва рушди устувор саҳми намоёни худро гузорад.

10 декабри соли 2025 дар Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон ба муносибати Рӯзи ҳуқуқи инсон ҳамоши илмию назариявӣ баргузор гардид.

Чорабинии мазкур бо ҳузури роҳбарият ва кормандони дастгоҳи марказӣ баргузор шуда, ҳадафи он таҳкими дониш ва маърифати ҳуқуқии кормандон ва баланд бардоштани фарҳанги риояи ҳуқуқу озодиҳои инсон буд.

Чорабиниро раиси Кумита академик Фарҳод Раҳимӣ ифтитоҳ намуда, қайд кард, ки ҳамасола ҷомеаи ҷаҳонӣ 10-уми декабрро ҳамчун Рӯзи ҳуқуқи инсон таҷлил мекунад. Ин сана ба рӯзи қабули Эъломияи умумии ҳуқуқи башар, ки 10 декабри соли 1948 дар шаҳри Парижи Ҷумҳурии Фаронса аз ҷониби Маҷмааи Умумии Созмони Милали Мутаҳид қабул гардид, рост меояд.

Раиси Кумита таъкид намуд, ки Эъломияи мазкур санади бунёдиест, ки ба таҳкими ҳуқуқу озодиҳои инсон дар саросари ҷаҳон заминаи воқеӣ гузошта, минбаъд барои таҳия ва қабули аксари санадҳои байналмилалии ҳуқуқӣ асос гардид.

Дар идомаи ҳамоиш сардори шуъбаи кадрҳо ва корҳои махсуси Кумита, номзади илмҳои ҳуқуқшиносӣ, дотсент Назарзода Давлатхон Қурбонмурод оид ба моҳият, сохтор ва аҳамияти Эъломияи умумии ҳуқуқи башар суханронӣ намуда, нақши онро дар ташаккули низоми муосири ҳуқуқи инсон шарҳ дод.

Ӯ зикр кард, ки риоя ва ҳифзи ҳуқуқу озодиҳои инсон яке аз арзишҳои меҳварии давлатдории муосир маҳсуб ёфта, омӯзиши мунтазами меъёрҳои байналмилалии ҳуқуқӣ барои кормандони соҳаи таҳсилоти касбӣ аҳамияти хоса дорад.

Сипас, сармутахассиси шуъбаи ҳуқуқ, коргузорӣ ва назорати Кумита Бобозода Барно оид ба ҳуқуқҳои инсон ва меъёрҳои амалкунандаи қонунгузории миллӣ маърӯза намуда, зарурати баланд бардоштани маърифати ҳуқуқии шаҳрвандон, хусусан ҷавонон ва кормандони соҳаро таъкид кард.

Дар анҷоми чорабинӣ қайд гардид, ки Кумита минбаъд низ ба масъалаҳои риояи ҳуқуқу озодиҳои инсон, ташкили чорабиниҳои омӯзишӣ ва баланд бардоштани сатҳи ҳуқуқдонии кормандон таваҷҷуҳи махсус намуда, хонишҳои сиёсии идоравиро доир ба ин мавзуъҳо бо иштироки коршиносону олимони варзида роҳандозӣ менамояд.

11 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар ҳошияи Форуми сулҳ ва эътимод дар шаҳри Ашхобод бо Президенти Туркманистон Сердар Бердимуҳамедов мулоқот намуданд.

Дар мулоқот як зумра масоили вобаста ба таҳким ва густариши минбаъдаи ҳамкории гуногунҷанбаи ду кишвар баррасӣ шуд.

Сарвари давлати мо муҳтарам Эмомалӣ Раҳмон таъкид доштанд, ки Тоҷикистон ҷонибдори дар руҳияи шарикии стратегӣ рушд додани ҳамкорӣ бо Туркманистон мебошад.

Таваҷҷуҳи зиёд ба тақвияти ҳамкории тиҷоратию иқтисодӣ ва сармоягузорӣ, густариши робитаҳо дар соҳаҳои нақлиёт, энергетика, саноат, кишоварзӣ ва дигар самтҳо зоҳир гардид.

Алоқамандии ҳарду кишвар ба густариши робитаҳои фарҳангию башарӣ таъкид гардид.

Дар ҷараёни суҳбат, ҳамчунин, масъалаҳои ҳамкорӣ дар доираи созмонҳои минтақавию ҷаҳонӣ мавриди назари ҷонибҳо қарор доштанд.

11 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо сафари корӣ вориди шаҳри Ашқободи Туркманистон шуданд.

Дар саҳн ва толори фурудгоҳи байналмилалии Ашқобод Президенти Ҷумҳурии Тоҷикистон муҳтарам Эмомалӣ Раҳмонро Раиси Халқ Маслаҳатии Туркманистон муҳтарам Гурбангули Бердимухамедов ва дигар шахсони расмӣ гарму самимӣ истиқбол гирифтанд.

Зимни ин сафар Сарвари давлат муҳтарам Эмомалӣ Раҳмон дар Форуми байналмилалии сулҳ ва эътимод иштирок менамоянд.

11 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои иштирок дар Форуми байналмилалии сулҳ ва эътимод ба Туркманистон сафар карданд.

Дар фурудгоҳи байналмилалии Душанбе Президенти Ҷумҳурии Тоҷикистон муҳтарам Эмомалӣ Раҳмонро Раиси Маҷлиси миллии Маҷлиси Олии Ҷумҳурии Тоҷикистон, Раиси Маҷлиси намояндагони Маҷлиси Олии Ҷумҳурии Тоҷикистон, муовини якуми Роҳбари Дастгоҳи иҷроияи Президенти Ҷумҳурии Тоҷикистон ва дигар шахсони расмӣ гусел намуданд.

Дар ин сафар Президенти Ҷумҳурии Тоҷикистон муҳтарам Эмомалӣ Раҳмонро вазири корҳои хориҷӣ, ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ ва дигар шахсони расмӣ ҳамроҳӣ мекунанд.

Тарбияи кӯдак танҳо раванди омӯзонидани хондану навиштан набуда, масъулияти бузургест, ки шахсият, ҷаҳонбинӣ ва рафтори ӯро дар тамоми умр муайян мекунад. Волидайн, омӯзгорон ва ҷомеа ҳама дар ин раванд нақши муҳим доранд, зеро ҳар кӯдак оинаи оянда аст.

Оила мактаби аввалини зиндагии кӯдак буда, волидайн устодони аввалини ӯ мебошанд, зеро маҳз онҳо арзишҳои ахлоқӣ ва фарҳангиро меомӯзонанд, одобу рафтори солимро нишон медиҳанд, муҳити пур аз меҳру муҳаббатро фароҳам меоранд. 

Кӯдак аз рӯи гуфтор ва амалҳои волидон меомӯзад. Агар волидон масъулиятшинос бошанд, кӯдак низ тадриҷан ҳамин хислатро дар худ тарбия мекунад. Муассиса ҷойи такмили дониш ва ахлоқ аст. 

Дар ин раванд, омӯзгорон масъулияти бузург дар бунёди шахсияти кӯдак ва хонанда доранд. Дар дарсҳо дар баробари фанҳои таълимӣ эҳтироми ҳамдигар, масъулияти иҷтимоӣ, интизом ва заҳматкашӣ омӯзонида мешавад. Омӯзгор бо сабру таҳаммул намунаи рафтор буда, кӯдакро ба таҳсил ва худшиносӣ ҳидоят мекунад.

Ҷомеа низ муҳити таъсиргузор мебошад. Кӯдак берун аз хона ва мактаб низ таъсир мегирад. Аз ин рӯ муҳити амну солим, фаъолияти фарҳангӣ ва варзишӣ ба ташаккули масъулияти кӯдак кӯмак мекунанд.

Дар ҷомеаи солим кӯдакони солим ба воя мерасанд. Масъулият дар таълиму тарбияи кӯдак вазифаи як нафар нест. Ин ҳамкории волидайн, омӯзгорон ва ҷомеа мебошад. Агар мо имрӯз барои тарбияи дурусти кӯдакон саъю талош кунем, фардо ҷомеаи мо низ солим ва масъулиятшинос хоҳад буд.

Замира ҶУМЪАЕВА,

муовини директор оид ба тарбияи

Коллеҷи ҷумҳуриявии хореографии ба номи М. Собирова

Ҳизби Халқии Демократии Тоҷикистон аз рӯзҳои нахустини таъсисёбӣ то имрӯз худро ҳамчун нерӯи сиёсии масъулиятшинос ва давлатсоз муаррифӣ намуда, ба таҳкими ваҳдати миллӣ, суботи сиёсӣ ва ҳамгироии мардумӣ таҳти роҳнамоии Пешвои миллат саҳми босазо гузоштааст.

Дар шароите, ки оғози солҳои 90-уми асри гузашта кишвар аз шикасти сохторҳои давлатӣ, ҷудоиандозии афкори ҷамъиятӣ ва парокандагии сиёсӣ ранҷ мебурд, маҳз ташаккули як нерӯи муттаҳидкунандаи миллӣ зарурат дошт. ҲХДТ дар ҳамин замина ба саҳнаи сиёсӣ ворид шуд ва вазифаи аввалиндараҷаашро дар барқарории эътимоди байни қишрҳои ҷомеа, пойдорсозии сулҳ ва тарғиби арзишҳои миллӣ қарор дод.

Дар тӯли солҳои минбаъда ҳизб тадриҷан ба маркази муттаҳидкунандаи ҷомеа мубаддал гардид. Барномаҳои сиёсию иҷтимоии ҲХДТ асосан ба идеологияи давлатсозии миллӣ такя мекунанд, ки дар меҳвари он ваҳдат, арзишҳои умумимиллӣ, эҳёи таърихӣ ва худшиносии миллӣ қарор доранд. ҲХДТ на танҳо ба сифати як ташкилоти сиёсӣ, балки ҳамчун мактаби тарбияву масъулиятшиносии шаҳрвандон амал мекунад. Тавассути ташкилотҳои васеи ҳизбӣ дар шаҳру ноҳияҳо, вохӯриҳо, мулоқотҳо, фаъолияти тарғиботӣ ва барномаҳои ҳадафманд ҳизб мекӯшад, ки ҷаҳонбинии миллатро таҳким бахшида, руҳияи ягонагиву масъулиятро дар миёни мардум боло бардорад.

Сиёсати кадрӣ ва иҷтимоии ҳизб низ ба таҳкими суботи ҷомеа равона шудааст. ҲХДТ таваҷҷуҳи махсус ба ҷавонон, занон ва қишрҳои фаъоли ҷомеа зоҳир намуда, онҳоро ба фаъолияти созандаи ҷамъиятӣ ҷалб мекунад. Ҷавонон ҳамчун нерӯи стратегӣ дар барномаҳои ҳизб мавқеи калидӣ доранд, зеро суботи фардо ба тасмимҳои имрӯзии онҳо вобаста мебошад. Бо пешниҳоди имкониятҳои баробар барои таҳсил, фаъолият ва худфаъолият ҳизб насли ҷавонро ба роҳи эҳтироми қонун, дӯстии байни миллатҳо, худшиносии миллӣ ва масъулияти иҷтимоӣ ҳидоят менамояд.

ҲХДТ ваҳдати миллиро чун арзиши муҳими маънавӣ ва заминаи рушди давлат медонад. Маҳз ба ҳамин хотир, ҳизб ҳамеша аз сиёсати сулҳофаринӣ, ҳамзистии осоишта ва муколамаи созанда пуштибонӣ мекунад. Дар солҳои баъдиҷангӣ фаъолияти муназзами ҳизб дар ташвиқу тарғиби сиёсати сулҳи миллӣ, тавзеҳи аҳаммияти гуфтушунид, гузашт ва фаҳмиши мутақобил миёни табақаҳои мухталифи ҷомеа нақши ҳалкунанда дошт. Имрӯз низ ҲХДТ ҳамин мавқеъро идома дода, масъалаҳои ҳассоси идеологӣ ва амниятиро ба ташвиқоти масъулона тааллуқ медиҳад.

Сабаби асосии пойдории ҷомеа ва суботи сиёсӣ ҳамоҳангии мардум бо сиёсатҳои давлатӣ мебошад, ки ҲХДТ онро ба таври густурда шарҳ ва таҳким мебахшад. Ин ҳизб сиёсати давлатро барои ҳар қишр татбиқ мекунад, мушкилоти иҷтимоӣ ва эҳтиёҷоти мардумро ба идораҳои давлатӣ мерасонад ва кӯшиш мекунад, ки иртиботи дуҷонибаи шаҳрвандон бо давлат ҳамеша дар сатҳи устувор қарор гирад. Маҳз ҳамин иртиботи муназзам ба эътимоди мардум ба давлат ва мустаҳкам гардидани пояҳои суботи миллӣ мусоидат мекунад.

Дар замони ҷаҳонишавӣ, ки таҳдидҳои иттилоотӣ, экстремизму ифротизм ва рақобатҳои геополитикӣ бештар шудаанд, нақши ҲХДТ дар муҳофизати ҳуввият, субот ва ваҳдати миллӣ боз ҳам муҳимтар гардидааст. Тавассути маъракаҳои иттилоотӣ, таҳлилҳо, барномаҳои тарбиявӣ ва фаъол кардани қишрҳои ҷомеа, ҳизб барои пешгирии таҳдидҳои дохилию хориҷӣ саҳм мегузорад. Дуруст фаҳмидани арзишҳои миллӣ, пешгирии таъсири идеологияҳои номатлуб ва ҳифзи манфиатҳои умумимиллӣ аз самтҳои муҳими фаъолияти он ба ҳисоб мераванд.

Метавон гуфт, ки ҲХДТ ҳамчун нерӯи сиёсие, ки ба арзишҳои миллӣ такя менамояд, дар таҳкими ваҳдати миллӣ ва суботи ҷомеа мавқеи беназири худро дорад. Идеологияи он ба гаравидани мардум ба идеяҳои давлатсозӣ, баланд бардоштани масъулияти шаҳрвандӣ ва ҳамгироии сиёсиву иҷтимоӣ мусоидат намуда, Тоҷикистонро ба сӯи ҷомеаи устувор, мутамарказ ва дорои ҳадафҳои мушаххас раҳнамоӣ мекунад.

ОДИНАЗОДА Латофат Амиршо,

директори Коллеҷи омӯзгории шаҳри Кӯлоб,

номзади илмҳои педагогӣ, дотсент

«Шоҳнома» ҳамчун бузургтарин ёдгории таърихию адабии ҷаҳони форсу тоҷик дар тӯли ҳазорсолаи охир манбаи илҳом, худшиносӣ ва ҳифзи ҳувияти миллӣ гардидааст. Ин асари безаволи Ҳаким Абулқосим Фирдавсӣ бо забони хирад, далерӣ ва ватандӯстӣ таърихи пурифтихори ниёгони моро ба наслҳои нав меомӯзонад ва онҳоро ба посдории арзишҳои миллӣ роҳнамоӣ мекунад. Чунон ки худи шоир дар асараш таъкид мекунад, ӯ тавассути ин китоб Аҷамро бо порсӣ зинда кард. Ин аст, ки имрӯз низ «Шоҳнома» барои ҳар фарди тоҷик рамзи ҳастии миллӣ ва пояи худшиносӣ ба шумор меравад.

Дар ҳамин замина, иқдоми Пешвои миллат муҳтарам Эмомалӣ Раҳмон оид ба тақдим намудани «Шоҳнома» ба ҳар хонадон ҳамчун туҳфаи фарҳангӣ ва маънавии беназир аҳамияти хеле бузург дорад. Ин амал агар аз як тараф арҷгузорӣ ба мероси ниёгон ва эҳтироми гарму самимӣ ба фарҳанги миллӣ бошад, аз тарафи дигар, дурнамоест, ки ба тарбияи маънавии ҷомеа, махсусан ҷавонон, таъсири амиқ мерасонад. Туҳфа шудани чунин китоб ба ҳар хонадони кишвар маънои онро дорад, ки ҳар оила бояд дорои ганҷинаи хирад ва таърих бошад, то фарзандони ин миллат бо пояи устувори маънавӣ ба воя расанд.

Гузашта аз ин, дар шароити ҷаҳонишавии пуртаҳаввул, ки ҳар рӯз арзишҳои гуногуни бегона ба зеҳни ҷавонон роҳ меёбад, баргузидани «Шоҳнома» ҳамчун китобе, ки бояд дар ҳар хонавода бошад, иқдоми басо дурандешона аст. Зеро он китобест, ки дар ҳар мисрааш рамзҳои накӯкории инсонӣ, чун адолат, шуҷоат, ифтихори миллӣ, дӯстӣ, вафодорӣ ба ватан ва ҳифзи истиқлолият хеле ҷолибу таъсирбахш инъикос ёфтаанд. Симои ҳар қаҳрамони «Шоҳнома» паёми хоси тарбиявии худро дорад, ки барои тарбияи ахлоқии кӯдакон ва ҷавонон аҳамияти калон дорад.

Дар фазои оила, вақте чунин китоб метавонад мавриди мутолиаи муштараки волидайн ва фарзандон қарор гирад, эҳсоси пайванди наслҳо тақвият меёбад. Аз мубодилаи андешаҳо дар атрофи қаҳрамонҳои таърихӣ ва достонҳои пурпечутоби китоби Фирдавсӣ муҳити фарҳангӣ, гуфтугӯи созанда ва таҳкими робитаҳои маънавии оилавӣ ба вуҷуд меоянд. Дар чунин хонаводаҳо фарзандон таърихи миллатро аз забони падару модар бо шавқу эҳтироми хоса меомӯзанд ва ин бошад беҳтарин муҳит барои ташаккули худшиносии миллӣ мебошад.

Ҳамчунин, тақдими «Шоҳнома» ба ҳар хонадон рамзи он аст, ки давлат ва сарвари он ба фарҳанг ва мероси таърихӣ ҳамчун пояи давлатсозӣ ва сармояи асосии маънавӣ менигарад. Имрӯз барои ҳар миллат муҳим аст, ки анъанаҳои миллии худро на танҳо дар сатҳи рамзию рамзӣ, балки дар амал ва зиндагии ҳаррӯза нигоҳ дорад. Мавҷудияти «Шоҳнома» дар ҳар хонадон ба маънои эҳёи ҳамон фарҳанги мутолиапазир аст, ки дар замони гузашта дар ҳар хонадони тоҷик вуҷуд дошт.

Ин иқдом ҳамчунин ба он мусоидат мекунад, ки наслҳои имрӯзу фардои кишвар бо асолаҳои худ бештар ошно шаванд. Мероси Фирдавсӣ ҳамеша миллатро ба ваҳдат, ватандӯстӣ ва ҳимояи арзишҳои миллӣ даъват мекунад. Ин паёмҳо имрӯз ҳам мисли ҳазор сол пеш муҳиманд. Зеро миллате, ки аз таърихи худ огоҳ аст, ҳеҷ гоҳ фирефтаи идеологияҳои бегона намегардад ва дар ҳама шароит метавонад пояҳои маънавӣ ва сиёсии худро ҳифз кунад. Аз ин ҷиҳат, тақдими «Шоҳнома» аз ҷониби Пешвои миллат ба ҳар оила ташаббуси маърифатӣ ва тарбиявӣ мебошад, ки дар рушди ҷомеа, ҳифзи ҳувияти миллӣ ва устувории давлат нақши муҳим мегузорад.

Бешак, вақте чунин асари пурғановат дар ҳар хонавода ҷой мегирад, маърифати китобхонӣ таҳким ёфта, худшиносии миллӣ боз ҳам мустаҳкамтар мешавад. Ин китоб мактаби хирад аст ва ҳар хонае, ки дар он нури хирад аст, дорои нерӯ, устуворӣ ва ояндаи равшан мебошад.

Замира ИРМАТОВА,

директори Коллеҷи технологии

ба номи А. Қаҳҳорови шаҳри Конибодом

3 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар кӯчаи Рустам Амакиеви ноҳияи Фирдавсии шаҳри Душанбе Муассисаи таҳсилоти томактабии хусусии Кӯдакистони байналмилалии инноватсионии Басбиро мавриди баҳрабардорӣ қарор доданд.

Иншооти навбунёди соҳаи маориф бо таваҷҷуҳу ғамхориҳои Пешвои миллат муҳтарам Эмомалӣ Раҳмон ва иқдому ташаббусҳои созандаи роҳбарияти Мақомоти иҷроияи ҳокимияти давлатии шаҳри Душанбе ба истиқболи сазовор аз ҷашни 35-солагии Истиқлоли давлатӣ аз ҷониби соҳибкори ватанӣ Рустам Саидов бо маблағи 20 миллион сомонӣ сохта шудааст.

Ба Пешвои миллат муҳтарам Эмомалӣ Раҳмон иттилоъ дода шуд, ки корҳои сохтмонӣ дар иншооти мазкур соли 2023 оғоз гардида, дар масоҳати 6700 метри мураббаъ бо сифати баланд бунёд шудааст.

Муассисаи тозабунёд аз ду бинои 4-ошёна ва таҳхона иборат аст ва дар он барои инкишофи зеҳнии кӯдакон ва бозиҳои гуногуни шавқовар шароити хуби таълим фароҳам оварда шуда, барои 600 кӯдак пешбинӣ гардидааст.

Ба Сарвари давлат муҳтарам Эмомалӣ Раҳмон иттиллоъ доданд, ки Муассисаи таҳсилоти томактабии хусусии инноватсионии Басбӣ бо мақсади татбиқи равандҳои инноватсионӣ ва истифодаи ҳамаҷонибаи имконияти технологияҳои рақамӣ дар иқтисодиёт дар доираи эълон гардидани Солҳои рушди иқтисоди рақамӣ ва инноватсия (2025-2030) дар Тоҷикистон рӯи кор омадааст.

Тиқи иттилои масъулин, дар ин муассисаи томактабӣ кӯдакони аз синни 2 то 6 сола қабул гардида, бо 4 вақт хӯроки гарм таъмин мегарданд.

Ҳуҷраҳои таълимии кӯдакистон бо лавозимоти зарурӣ ва ҳар гуна бозичаҳои шавқовари кӯдакона, таъмин буда, омӯзишу парасторӣ дар он бо 3 забон тоҷикӣ, русӣ ва англисӣ ба роҳ монда шудааст.

Истифода аз робототехникаҳои роҳбалад, Луна ва дигар таҷҳизоти муосири замонавӣ, ки дар раванди таълим мавриди истифода қарор мегиранд, аз афзалиятҳои дигари ин муассисаи наву замонавӣ арзёбӣ мегардад.

Тибқи лоиҳа, дар ин муассиса барои 23 гурӯҳ шароити хуб, аз ҷумла ҳуҷраҳои таълимӣ бо хобгоҳ ва ҳаммом, толорҳои мусиқӣ, гимнастика, толор барои гузаронидани маҳфилу чорабиниҳо бо 120 ҷойи нишаст, ошхона, ҳуҷраи ҷомашӯӣ, майдончаи бозӣ ва ҳавзи оббозӣ, фароҳам оварда шуда, барои кӯдакони хуштолеи замони истиқлол туҳфаи арзишманд номида шуд.

Дар ҳар як гурӯҳ 20 кӯдак амал мекунад, ки ба онҳо омӯзгорони пуртаҷриба дарс медиҳанд.

Бо мавриди баҳрабардорӣ қарор гирифтани муассисаи нави таълимӣ 23 парастори дорои таҷриба ва донандаи хуби забони давлатӣ ва забонҳои хориҷӣ, дигар кормандони педагогӣ ва маъмуриву техникӣ, дар умум 88 нафар ба кор ва бо маоши хуб ҷалб шудаанд.

Муассисаи наву замонавӣ ҳамчунин барои рафту омади бехатари кӯдакон бо нақлиёт таъмин аст.

Саҳни бинои Муассиса бо дарахтон ва гулу буттаҳои ороишиву ҳамешасабз ороста шуда, даромадгоҳи он пештоқи ҷолибу назаррабое дорад, ки бо завқу салиқаи баланд ороиш ёфтааст. Ҳамзамон дар саҳни бино айвончаи тобистона барои гузаронидани машғулиятҳо сохта шудааст.

Бояд тазаккур дод, ки дар даврони соҳибистиқлолӣ бо дастури Пешвои миллат муҳтарам Эмомалӣ Раҳмон барои хушсаводу доно ба воя расонидани кӯдакон ва дар рӯҳияи ватанпарварӣ тарбия намудани онҳо шумораи муассисаҳои таҳсилоти томактабӣ дар шаҳри Душанбе зиёд мешаванд.

Роҳбари давлат муҳтарам Эмомалӣ Раҳмон зимни боздид ба сифати корҳои анҷомёфта баҳои баланд дода, масъулону омӯзгоронро ба таълими босифати кӯдакон ва дар рӯҳияи ватандӯстӣ тарбия намудани насли наврас ҳидоят намуданд.

3 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар кӯчаи Нисор Муҳаммадии ноҳияи Шоҳмансури пойтахт Муассисаи таҳсилоти томактабии хусусии Ватанпарварро мавриди баҳрабардорӣ қарор доданд.

Зимни шиносоӣ ба Президенти кишвар муҳтарам Эмомалӣ Раҳмон иттилоъ доданд, ки иншоот дар доираи омодагӣ ба истиқболи ҷашни 35-солагии Истиқлоли давлатӣ ва нақшаи чорабиниҳои Мақомоти иҷроияи ҳокимияти давлатии шаҳри Душанбе оид ба муосирсозии низоми таҳсил дар муассисаҳои таҳсилоти томактабӣ аз ҷониби соҳибкори ватанӣ Шаҳбоз Қодирзода барои 300 кӯдак сохта шудааст.

Дар кӯдакистони хусусии Ватанпарвар барои 12 гуруҳ, 50 парастор ба кор бо маоши хуб ҷалб шудааст ва раванди таҳсил дар он бо забонҳои тоҷикӣ, русӣ ва англисӣ сурат мегирад.

Иншоот аз 3 ошёна ва таҳхона иборат буда, масоҳаташ зиёда аз 1000 метри мураббаъ мебошад.

Тибқи лоиҳа дар ин ҷо барои ҳар як гурӯҳ синфхонаи алоҳидаи таълимӣ бо хобгоҳ, ҳаммом ва ҳуҷраҳои ёрирасон бо шакл ва тарҳи ҷолиб сохта шудааст, ки барои инкишофи зеҳни кӯдакон ва машғул шудани онҳо ба ҳар гуна бозиҳои шавқовар макони дилнишину мувофиқ шудааст.

Дар кӯдакистон барои гузаронидани маҳфилу чорабиниҳои гуногун, инчунин ҷалби кӯдакон ба тарзи ҳаёти солим толорҳои варзишӣ ва бозӣ, толори мусиқӣ, рақс ва дигар ҳуҷраҳои ёрирасон амал мекунад, ки ҳамаи он дорои таҷҳизот ва лавозимоти зарурӣ мебошад.

Муассиса, ҳамчунин, дорои нуқтаи хизматрасонии тиббӣ ва ошхона бо 160 ҷойи нишаст мебошад.

Дар боғчаи навтаъсис аз рӯи китоби тозанашри “Шоҳнома”-и безаволи Абулқосим Фирдавсӣ машғулиятҳои инкишофи нутқ ба роҳ монда шудааст, ки ин иқдом ба бедор сохтани ҳисси худшиносӣ дар замири кӯдакон таъсир мегузорад.

Роҳбари давлат муҳтарам Эмомалӣ Раҳмон иқдоми соҳибкорони ватаниро барои дастгирӣ ва бунёди кӯдакистонҳои наву замонавӣ намунавӣ ва дар рушди ояндаи соҳа муҳим арзёбӣ намуданд.

Масъулон барои истифодаи самараноки имкониятҳои мавҷуда ва тарбияи дурусти кӯдакон дар руҳияи худшиносии миллӣ вазифадор шуданд.

Ҳамаи синфхона ва ҳуҷраҳои кории бино дар баробари таъмин шудан бо гармӣ, ҳамзамон бо таҷҳизоту лампаҳои каммасрафи барқӣ таъмин аст ва ин тадбир имкон медиҳад, ки неруи барқ дар фасли зимистон сарфа гардад.

Дар доираи корҳои ободонӣ дар атрофи бино ҳамзамон айвону нишастгоҳҳо, майдончаи бозӣ барои кӯдакон ва ҳавзи шиноварӣ бо тарҳи муосиру ҷавобгӯи талабот бунёд шудааст.

Бо сохта ба истифода додани ин боғчаи нав, шумораи муассисаҳои томактабӣ дар ноҳияи Шоҳмансури шаҳри Душанбе ба 31 адад ва фарогирии кӯдакон ба онҳо ба 6049 нафар расид.

Сарвари давлат муҳтарам Эмомалӣ Раҳмон зимни суҳбат бо кӯдакон, онҳоро ба дӯст доштани Ватан, аз худ кардани дониш ва ба ҷо овардани эҳтироми калонсолон ҳидоят намуданд.

Дар соли 2025 бо мақсади амалисозии дастуру супоришҳои Пешвои миллат муҳтарам Эмомалӣ Раҳмон, бо қарори дахлдори Раиси шаҳри Душанбе муҳтарам Рустами Эмомалӣ тадбирҳои ободонӣ барои бунёду ба истифода додани муассисаҳои нави таҳсилоти томактабӣ вусъати тоза пайдо намуд.

Дар ин давра бо дастгирии Мақомоти иҷроияи ҳокимияти давлатии шаҳри Душанбе ва саҳми соҳибкорони ватанӣ дар пойтахт 16 муассисаи нави томактабӣ бо фарогирии 3680 кӯдак сохта ба истифода дода шуд.

Имрӯз дар бинои Маҷлиси Олӣ Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо Раиси Маҷлиси Бузурги Миллии Туркия муҳтарам Нуман Куртулмуш дар ҳузури ҳайатҳои парламентии ду ҷониб мулоқот анҷом доданд.

Дар даромадгоҳи бино маросими истиқболгирии меҳмони олиқадр ва аксгирии якҷояи роҳбарони ҳайатҳо баргузор шуда, пас аз боздиди толори ҷаласаҳои якҷояи Маҷлиси миллӣ ва Маҷлиси намояндагон Раиси Маҷлиси Бузурги Миллии Туркия муҳтарам Нуман Куртулмуш дар Китоби меҳмонони фахрии Маҷлиси Олӣ таманниёти худро сабт намуд.

Дар оғози мулоқот, нахуст, Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ Раиси Маҷлиси Бузурги Миллии Туркия муҳтарам Нуман Куртулмуш ва ҳайати ҳамроҳашро ба Тоҷикистон хайра мақдам гуфтанд.

Дар ҷараёни музокирот ҷонибҳо масъалаҳои асосии рушди ҳамкориҳои дуҷониба ва робитаҳои байнипарламентиро мавриди баррасӣ қарор доданд.

Таъкид шуд, ки Тоҷикистон ва Туркияро робитаҳои муштараки фарҳангиву таърихӣ бо ҳам мепайванданд.

Робитаҳои пайваста ва дӯстии самимонаи сарони ду давлат - муҳтарам Эмомалӣ Раҳмон ва муҳтарам Реҷеп Тайип Эрдоган омили муҳимми таҳкими муносибатҳои судманди дуҷониба мебошанд.

Ба тавсеаи ҳамкориҳои созанда миёни Маҷлиси миллии Маҷлиси Олии Ҷумҳурии Тоҷикистон ва Маҷлиси Бузурги Миллии Туркия таваҷҷуҳи хос зоҳир гардид.

Имрӯз беш аз 80 санади ҳамкорӣ миёни кишварҳо заминаи ҳуқуқии ҳамкории ду кишварро дар самтҳои мавриди таваҷҷуҳи муштарак муайян намудаанд.

Равобити иқтисодӣ ва тиҷоратӣ ҳамчун яке аз самтҳои асосии ҳамкории ду кишвар арзёбӣ гардид.

Ҷонибҳо тавсеаи ҳамкориро дар соҳаҳои афзалиятноки саноату истеҳсолот, аз қабили саноати нассоҷӣ ва коркарди алюминий, фарматсевтӣ ва инфрасохтори сайёҳӣ зарур шумориданд.

Инчунин, коркарди меваю сабзавот, истеҳсоли шарбатҳои табиӣ, намаки ошӣ, хушконидани маҳсулоти кишоварзӣ бо истифодаи фанновариҳои нави соҳа аз самтҳои ояндадори ҳамкорӣ номида шуд.

Зикр гардид, ки анъанаҳои муштараки фарҳангиву маънавӣ барои тавсеа ва такмили ҳамкориҳои фарҳангию гуманитарӣ имкониятҳои бештар фароҳам меоранд.

Маснавии Маънавӣ ва дигар осори арзишманди Мавлоно Ҷалолиддини Балхӣ, ки ҷойгоҳи муҳим дар тамаддуни ҷаҳонӣ доранд, барои мардумони кишварҳои мо аҳамияти калони таърихӣ, фарҳангӣ ва маънавӣ дошта, заминаи муҳимми таҳкими робитаҳои фарҳангӣ маҳсуб меёбанд.

Зимни музокирот ҷонибҳо ҳамчунин масъалаҳои мубрами рӯзномаи байналмилалиро баррасӣ карданд.

2 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар Қасри миллат Раиси Маҷлиси Бузурги Миллии Ҷумҳурии Туркия Нуман Куртулмушро ба ҳузур пазируфтанд.

Президенти кишвар муҳтарам Эмомалӣ Раҳмон аз сатҳу муҳтавои муносибатҳои Тоҷикистон ва Туркия, аз ҷумла дар арсаи дипломатияи парлумонӣ, изҳори қаноатмандӣ намуданд.

Гуфта шуд, ки муносибатҳои фарогир бо Туркия дар сиёсати хориҷии давлати мо мақоми хосса доранд.

Ба муколамаи сиёсии сатҳи олӣ ва баланд ва робитаҳои байнипарлумонии ду кишвар барои густариши робитаҳои гуногунҷанба таваҷҷуҳи зиёд зоҳир карда шуд.

Тавсеаи ҳамкории тиҷоративу иқтисодӣ низ аз мавзуъҳои муҳими суҳбат буд.

Дар ин робита таъкид гардид, ки кишварҳои мо имконият доранд, дар соҳаҳои афзалиятноки саноати нассоҷӣ, коркарди алюминий, амалӣ намудани тарҳҳои сармоягузорӣ дар бахшҳои воқеии иқтисодиёти Тоҷикистон, таъсиси корхонаҳои муштараки истеҳсолӣ дар асоси ашёи хоми маҳаллӣ ҳамкории бештар дошта бошанд.

Фаъолияти Комиссияи муштараки байниҳукуматӣ оид ба ҳамкории иқтисодӣ ва Агентии Туркия оид ба ҳамкории байналмилалӣ (ТИКА) василаи муҳими густариши робитаҳои дуҷониба номида шуд.

Ҳарду ҷониб ба густариши ҳамкорӣ дар соҳаҳои маориф, илм, фарҳанг ва сайёҳӣ ҳавасмандии худро таъкид намуданд.

Ҳамчунин, доир ба ҳамкорӣ дар арсаи байналмилалӣ баҳри ҳалли масъалаҳои мубрами байналмилалӣ ва минтақавӣ табодули судманди афкор сурат гирифт.

1 декабри соли равон раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон академик Фарҳод Раҳимӣ бо сафари корӣ ба Ҷумҳурии Филипин рафтанд.

Дар доираи ин сафар академик Фарҳод Раҳимӣ дар кори Форуми 11-уми рушди малакаҳои касбӣ ва маориф ширкат ва суханронӣ намуданд. Зимни баромади хеш раиси Кумита ба масъалаҳои муҳими таҳияи лоиҳаҳо дар соҳаи таҳсилоти касбӣ таваҷҷуҳ карда, аз ҷумла тартиби таҳияи лоиҳаҳо, баррасӣ ва роҳҳои бартарафсозии мушкилот, тарҳрезии самтҳои афзалиятнок, вазъи кунунии муассисаҳои таҳсилоти ибтидоӣ ва миёнаи касбӣ, инчунин ҷанбаҳои маблағгузории лоиҳаҳо аз ҷониби Бонки Осиёии Рушдро тавзеҳ доданд.

Дар идомаи сафари корӣ 2 декабр раиси Кумита бо директори калони Департаменти рушди захираҳои инсонӣ ва иҷтимоии Бонки Осиёии Рушд, хонум Аяко Инагаки мулоқот анҷом дод. Дар ҷараёни мулоқот ҷонибҳо лоиҳаҳои марбут ба рушди таҳсилоти техникию касбӣ, аз ҷумла масъалаҳои таъмири муассисаҳои таълимӣ, муҷаҳҳазсозии онҳо бо таҷҳизоти муосир ва ҷорӣ намудани ихтисосҳои нав дар раванди таълимро мавриди муҳокима қарор доданд.

Дар оғизи мулоқот академик Фарҳод Раҳимӣ дар мавриди Кумита, фаъолияти он ва муассисаҳои зерсохтор маълумот дода, иброз дошт, ки соҳаҳои таҳсилоти ибтидоӣ ва миёнаи касбӣ яке аз самтҳои муҳимтарини сиёсати иҷтимоиву иқтисодии Ҷумҳурии Тоҷикистон ба ҳисоб рафта, ин зинаи таҳсилот на танҳо пояи асосии омодасозии мутахассисони сатҳи коргарӣ мебошад, балки омили бунёдии рушди иқтисод, саноат, кишоварзӣ ва хидматрасонӣ дар кишвар аст.

“Яке аз дастовардҳои муҳим дар ин самт таҷдиду навсозии муассисаҳои таълимӣ ва бунёди муассисаҳои нав мебошад. Танҳо дар солҳои охир дар доираи дастуру супоришҳои Пешвои миллат даҳҳо коллеҷу литсейҳои касиби техникӣ таъсис ёфтанд ва ин раванд дар оянда низ идома мекунад”, - гуфт раиси Кумита.

Дар ҷараёни мулоқот ҷонибҳо ба зарурати тақвияти ҳамкорӣ дар самти омодасозии кадрҳои соҳибкасби техникӣ таъкид намуда, изҳор доштанд, ки татбиқи муштараки лоиҳаҳои пешниҳодшуда барои болоравии сатҳи омӯзиш ва эҳё шудани шабакаи муассисаҳои касбӣ аҳамияти хоса дорад. Зикр гардид, ки Кумита бо мақсади рушди соҳа ба Бонки Осиёии Рушд се лоиҳаи муҳими инфрасохторӣ ва таълимиро пешниҳод намудааст.

Сафари кории раиси Кумита академик Фарҳод Раҳимӣ ба Ҷумҳурии Филипин идома дошта, он ба таҳкими ҳамкории Тоҷикистон бо созмонҳои байналмилалӣ дар самти рушди захираҳои инсонӣ ва такмили низоми таҳсилоти касбӣ такони нав мебахшад.

1 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо роҳбарони сохторҳои қудратӣ ва ҳифзи ҳуқуқу тартиботи кишвар машварати корӣ доир намуданд.

Дар машварат вазъи кунунӣ дар сарҳади давлатии миёни Тоҷикистону Афғонистон ва роҳҳои тақвияти ҳифзи он баррасӣ шуд.

Тибқи гузориши масъулин, давоми ҳафтаи охир ду ҳодисаи тирандозӣ ба хоки Тоҷикистон аз он сӯйи сарҳад рух дод, ки дар натиҷа панҷ кас фавтида ва панҷ каси дигар захмӣ шуданд.

Сарвари давлат муҳтарам Эмомалӣ Раҳмон амалҳои ғайриқонунӣ ва иғвоангези шаҳрвандони Афғонистонро шадидан маҳкум намуда, ба масъулин дастур доданд, ки доир ба ҳалли масъала ва пешгирӣ аз такрори чунин ҳодисаҳои нохуш аз чораю тадбирҳои муассир кор бигиранд.

27 ноябр дар шаҳри Бишкеки Ҷумҳурии Қирғизистон Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар нишасти навбатии Шурои амнияти дастҷамъии СААД иштирок ва суханронӣ намуданд.

Сарвари давлати мо муҳтарам Эмомалӣ Раҳмон нахуст ба роҳбари кишвари мизбон барои муҳайёсозии шароити хуби ҳамоиш арзи сипос намуда, ҳолати кунунӣ ва дурнамои ҳамкорӣ дар доираи СААД-ро мавриди таҳлилу баррасӣ қарор доданд.

Зимнан зикр гардид, ки СААД дар низоми амнияти минтақавӣ нақши муҳим бозида, кафили амну субот ва тақвияти имкониятҳои мудофиавии кишварҳои минтақа мебошад.

“Тоҷикистон, ки дар сафи пеши самти ҷанубии мудофиаи дастҷамъӣ қарор дорад, ба талошҳо барои тақвияти субот ва таъмини амният дар минтақаи масъулияти Созмон дар Осиёи Марказӣ таваҷҷуҳи доимӣ дорад”, - таъкид намуданд Президенти Ҷумҳурии Тоҷикистон муҳтарам Эмомалӣ Раҳмон.

Сарвари давлати Тоҷикистон авзои байналмилалиро “мураккабу душвор пешгӯишаванда” арзёбӣ намуда, аз тадбирҳои муштараки рӯзномаи нишасти Шурои амнияти дастҷамъӣ, аз ҷумла санадҳои барои қабул пешниҳодшуда, пуштибонӣ намуданд. Аз ҷумла, таъкид гардид, ки Тоҷикистон қабули Нақшаи рушди ҳамкории ҳарбии давлатҳои аъзои СААД барои солҳои 2026-2030-ро дастгирӣ менамояд.

Қабули қарор дар бораи тасдиқи Стратегияи зиддимухаддаротии давлатҳои аъзои СААД барои солҳои 2026-2030 низ аз ҷониби Сарвари давлати мо дастгирӣ ёфт. Зимнан дарёфти роҳҳои ҳамкорӣ миёни СААД ва Маркази зиддимухаддаротии Созмони ҳамкории Шанхай, ки дар шаҳри Душанбе таъсис меёбад, ба мақсад мувофиқ дониста шуд.

Муҳтарам Эмомалӣ Раҳмон, ҳамчунин, аз Барномаи ҳадафманди байнидавлатии СААД барои таҳкими сарҳади Тоҷикистону Афғонистон, ки қаблан қабул шуда буд, бо арзи сипос ёдовар шуда, ҳамзамон изҳори умед намуданд, ки татбиқи самарабахши он таъмин хоҳад шуд.

Президенти кишвари мо аҳамияти таъсиси Маркази аксуламалҳои башардӯстонаи СААД дар Тоҷикистонро таъкид намуда, изҳори бовар намуданд, ки ин масъала аз ҷониби кишварҳои аъзо дастгирӣ хоҳад ёфт.

Муҳтарам Эмомалӣ Раҳмон ба масоили вобаста ба таҳдиду хатарҳои ҷаҳони имрӯза чун терроризму экстремизм, гардиши ғайриқонунии маводи мухаддир ва ҷиноятҳои созмонёфтаи фаромиллӣ таваҷҷуҳи зиёд зоҳир намуданд.

Дар ин робита Сарвари давлати мо бо ёдоварӣ аз истифодаи фазои маҷозӣ, аз ҷумла зеҳни сунъӣ, аз ҷониби сохторҳои террористию ифротӣ, бар зарурати табодули маълумоти фаврӣ ва идораи ин хатарҳо бо технологияҳои нави рақамӣ таъкид намуданд.

Дар фароварди сухан Президенти Ҷумҳурии Тоҷикистон муҳтарам Эмомалӣ Раҳмон изҳори бовар намуданд, ки қарорҳои дар ин ҳамоиш қабулшаванда ба таҳким ва рушди ҳамкории минбаъдаи кишварҳои аъзои созмон мусоидати фаъол хоҳад намуд.

Дар ҷамъбасти ҳамоиш аз ҷониби сарони давлатҳои аъзои СААД як зумра санадҳои нави муҳим ба имзо расид.

26 ноябри соли равон раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон дар идомаи сафари корӣ дар минтақаи Бохтари вилояти Халон бо раванди корҳои сохтмонӣ дар бинои хобгоҳи Литсейи касбии техникии ноҳияи Вахш шинос шуд.

Директори муассиса Фирдавс Шарифзода иттилоъ дод, ки бинои хобгоҳ аз 3 ошёна иборат буда, барои 620 хонанда пешбинӣ шудааст ва он дар арафаи 35 солагии Истиқлоли давлатӣ ба истифода дода мешавад.

Қайд гардид, ки худи Литсейи касбӣ техникӣ дорои 2 озмоишгоҳ буда, 10 устохонаи таълимӣ истеҳсолӣ дорад ва айни ҳол аз рӯи ихтисосҳои “Дӯзанда”, “Кафшергари газию барқӣ”, “Челонгари таъмири муҳаррики автомобил”, “Фелдшер-бойтор”, “Монтёри барқӣ”, “Системаи компютер ва Интернет-технология” ва “Фермер-соҳибкор” мутахассисонро омода мекунад.

Раиси Кумита баъди боздид аз ҷараёни сохтмон ба масъулин ҷиҳати сари вақт ва бо сифати баланд ба анҷом расонидани корҳои бунёдӣ дастуру супоришҳои мушаххас дод.

26 ноябри соли ҷорӣ раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон академик Фарҳод Раҳимӣ аз ҷараёни корҳои сохтмонӣ дар бинои нави Коллеҷи махсусгардонидашудаи шаҳри Бохтар, ки дар ноҳияи Вахш бунёд мешавад, боздид ба амал овард.

Итиллоъ дода шуд, ки сохтмони бинои нави муассиса соли 2017 оғоз ёфта, он аз 5 ошёна иборат буда, утоқҳои кории кормандон, хобгоҳ барои омӯзгорон (500 нафар), хобгоҳ барои донишҷӯён (1200 нафар), маҷлисгоҳ, гармхона, анбори захираи сӯзишворӣ, майдончаҳои варзишӣ барои футбол, баскетбол ва волейбол, инчунин истироҳатгоҳ ва боғи фароғатиро дар бар мегирад.

“Иншооти мазкур дар масоҳати 6 гектар сохта шуда, корҳои сохтмонӣ бо маром идома доранд. Тибқи нақша, бунёди пурраи бино дар арафаи ҷашни 35-солагии Истиқлоли давлатии Ҷумҳурии Тоҷикистон ба анҷом расида, мавриди истифодаи омӯзгорон ва донишҷӯён қарор дода мешавад”, - гуфт директори муассиса Шаҳром Ҷалилов.

Раиси Кумита ба сифати корҳои сохтмонӣ баҳои баланд дода, таъкид намуд, ки бо шарофати сиёсати созанда ва дастгириҳои пайвастаи Пешвои миллат муҳтарам Эмомалӣ Раҳмон, инчунин таваҷҷуҳи хосаи Ҳукумати Ҷумҳурии Тоҷикистон ба соҳаи таҳсилоти касбӣ, бунёди биноҳои хуштару замонавии муассисаҳои таҳсилоти ибтидоӣ ва миёнаи касбӣ сол то сол густариш меёбад.

Ҳамзамон, раиси Кумита иброз доштанд, ки ғамхориҳои роҳбарияти давлат моро водор месозанд, то дар раванди таълиму тарбияи насли ҷавон дар рӯҳияи ватандӯстӣ ва касбомӯзӣ саъю кӯшиши бештар намоем ва барои ободиву пешрафти Ватани азизамон саҳми арзандаи худро гузорем.

26 ноябри соли равон муовини якуми раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон Давлатзода Баҳрулло Раҳмон бо мақсади шиносоӣ бо раванди таълим ва шароити дарсомӯзии донишҷӯён ба Коллеҷи омӯзгории шаҳри Бохтар ташриф овард.

Иттилоъ дода шуд, ки Коллеҷи омӯзгории шаҳри Бохтар 26 ноябри соли 1932 ҳамчун Омӯзишгоҳи омӯзгории ба номи Абулқосим Лоҳутӣ таъсис ёфтааст, яке аз маъруфтарин муассисаҳои таҳсилоти миёнаи касбӣ дар вилояти Хатлон аст.

Гуфта шуд, ки дар коллеҷ ду факултет - фанҳои гуманитарӣ ва табиӣ-риёзӣ, 5 кафедра (забон ва адабиёти тоҷик, таърих, табиӣ-риёзӣ, забонҳои хориҷӣ, педагогика ва психология) амал мекунанд. Дар онҳо дар баробари омӯзгорони соҳибтаҷриба ҷавонони болаёқат низ корҳои таълиму тарбияро пеш мебаранд. Коллеҷ аз рӯи 12 ихтисос дар шуъбаҳои рӯзона ва ғоибона мутахассисони дорои маълумоти миёнаи касбиро тайёр менамояд.

Директори муассиса Шамъигул Шарифзода қайд кард, ки дар муассиса 22 синфхона мавҷуд буда, ҳамаи онҳо бо айёниятҳо ҷиҳозонида шудаанд. Инчунин, 2 синфхонаи компютерӣ мавҷуд аст, ки дорои 26 адад компютер, 2 тахтаи электронӣ ва 6 проектор мебошад. Ҳамаи кафедраҳои таълимгоҳ аз рӯи нақшаи таълимии ба тасвибрасида фаъолият дошта, сарбориҳои омӯзгорони кафедраҳо тибқи низомномаи таҳсилоти кредитӣ дуруст тақсим карда шудааст.

Дар ҷараёни боздид муовини якуми раиси Кумита бо утоқҳои корӣ, синфхонаҳои таълимӣ ва ҷараёни дарсҳо шинос шуда, бо устодон ва масъулини муассиса суҳбат анҷом дод. Ҷиҳати боз ҳам беҳтар намудани сатҳ ва сифати таълиму тарбия ба масъулин дастуру супоришҳои мушаххас пешниҳод гардид.