Имрӯз, 7 октябри соли 2025, дар Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон вохӯрии расмии Раиси Кумита, академик Фарҳод Раҳимӣ, бо ҳайати Миссияи Бонки Исломии Рушд баргузор гардид.

Ҳайати мазкур аз коршиносони варзидаи Департаменти арзёбии мустақими Бонки Исломии Рушд иборат буда, он таҳти роҳбарии доктор Мусо Ҷега Иброҳим, Амин Абдуллоҳӣ - мудири бахши арзёбии корпоративӣ, кишварӣ ва мавзӯӣ бо мақсади гузаронидани санҷиши амиқ ва ҳамаҷонибаи раванди иҷрои лоиҳаҳои Бонки Исломии Рушд дар соҳаи маориф, аз ҷумла Лоиҳаи “Таҳсилоти касбию техникӣ ва омӯзиш дар минтақаҳои куҳистони Ҷумҳурии Тоҷикистон” ба Тоҷикистон ташриф овардааст.

Дар мулоқот намояндаи Ҷумҳурии Тоҷикистон дар Бонки Исломии Рушд Исмоил Ғаффоров, аъзои ҳайати роҳбарии Кумита ва Гурӯҳи татбиқи лоиҳа иштирок намуданд. Суҳбат дар фазои ҳамкории созанда ва ҳамдигарфаҳмии комил баргузор гардида, ҷонибҳо омодагии ҳамаҷонибаи худро барои идомаи татбиқи босифати лоиҳа, анҷоми саривақтии корҳои сохтмонӣ дар муассисаҳои таълимӣ, оғози фаъолияти ширкати консалтингӣ ва ҳамоҳангсозии кори мушовирони миллӣ ва байналмилалӣ баён намуданд.

Миссияи Бонки Исломии Рушд дар асоси Барномаи арзёбии стратегӣ ва соҳаи маориф барои солҳои 2015–2024 амал менамояд, ки тибқи он Бонк чор кишвари аъзоро, аз ҷумла Ҷумҳурии Тоҷикистон, барои таҳлили таъсири фаъолиятҳои худ дар соҳаи таҳсилоти касбӣ ва техникӣ интихоб кардааст. Арзёбӣ ба таҳлили сифати татбиқи сиёсати Бонк, натиҷаҳои рушди инсонӣ ва самаранокии фаъолияти он дар баланд бардоштани сатҳи таҳсилоти касбӣ ва омодасозии мутахассисони рақобатпазир равона гардидааст.

Лоиҳаи “Таҳсилоти касбию техникӣ ва омӯзиш дар минтақаҳои куҳистони Ҷумҳурии Тоҷикистон”, ки аз соли 2022 татбиқ мешавад, яке аз лоиҳаҳои намунавии ҳамкории стратегии Ҷумҳурии Тоҷикистон ва Бонки Исломии Рушд мебошад. Лоиҳа бо маблағгузории БИР ва Ҳукумати Ҷумҳурии Тоҷикистон амалӣ шуда, ҳадаф аз он такмили инфрасохтори таълимӣ, тавсеаи имкониятҳои шуғл, рушди қобилияти касбии ҷавонон ва занон, баланд бардоштани сифати таҳсилоти касбӣ ва коҳиши сатҳи бекорӣ дар минтақаҳои кӯҳистон мебошад.

Дар ҷараёни мулоқот ҷонибҳо масъалаҳои муҳими марбут ба татбиқи амалии лоиҳа, аз ҷумла таъмини саривақтии анҷоми сохтмони 9 маркази таълимӣ ва хобгоҳҳои донишҷӯён, ба роҳ мондани фаъолияти мушовирони миллӣ ва байналмилалӣ, баргузор намудани омӯзишҳои амалӣ барои устоҳо ва омӯзгорон, таҳкими низоми иттилоотии идоракунӣ барои назорат ва арзёбии самаранокии бозори меҳнат, инчунин ҷалби духтарон ва ҷавонони кӯҳистон ба таҳсилоти касбӣ ва касбомӯзӣ бо ҳадафи баланд бардоштани сатҳи шуғл дар миёни гурӯҳҳои осебпазирро баррасӣ карданд.

Миссияи арзёбии мустақими Бонки Исломии Рушд аз 6 то 12 октябри соли 2025 дар Тоҷикистон фаъолият хоҳад дошт. Дар ин давра ҳайати миссия бо истифода аз саволномаи арзёбии махсус бо намояндагони мақомоти давлатӣ, муассисаҳои таълимӣ, гурӯҳҳои татбиқи лоиҳа ва бенефитсиарҳо мулоқот намуда, ҷараёни иҷрои амалии лоиҳаро мавриди омӯзиш ва таҳлили ҳамаҷониба қарор медиҳад. Дар поёни миссия гузориши таҳлилии муфассал оид ба сифати татбиқи лоиҳа, натиҷаҳои бадастомада ва мушкилоти эҳтимолӣ таҳия шуда, ба роҳбарияти Бонки Исломии Рушд пешниҳод мегардад. Дар гузориш тавсияҳои мушаххас ҷиҳати беҳтарсозии идоракунӣ, баланд бардоштани самаранокии татбиқ ва таъмини устувории натиҷаҳои бадастомада пешниҳод хоҳанд шуд.

Лоиҳаи мазкур ҳамчун яке аз ташаббусҳои калидии ҳамкории Ҷумҳурии Тоҷикистон ва Бонки Исломии Рушд арзёбӣ гардида, ба татбиқи ҳадафҳои Стратегияи миллии рушди маориф барои давраи то соли 2030 ва Барномаи рушди таҳсилоти ибтидоӣ ва миёнаи касбӣ барои солҳои 2026–2030 мусоидат хоҳад намуд. Татбиқи он заминаи устувор барои рушди таҳсилоти касбӣ, ҷалби ҷавонон ба омӯзиш ва кори босамар, инчунин тақвияти ҳамкории давлат бо шарикони рушд фароҳам меорад.

Дар анҷоми мулоқот академик Фарҳод Раҳимӣ, Раиси Кумита оид ба таҳсилоти ибтидоӣ ва миёнаи касбӣ, иброз намуданд, ки ҳамкории Ҷумҳурии Тоҷикистон бо Бонки Исломии Рушд намунаи барҷастаи шарикии стратегии самаранок буда, кишвар омода аст ин ҳамкориҳоро бо рӯҳияи масъулият, эътимод ва ҳамдигарфаҳмӣ идома диҳад, то таҳсилоти касбӣ ва техникии Тоҷикистон ба сатҳи нав ва ҷавобгӯ ба талаботи замони муосир расад.

7 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Президенти Федератсияи Русия муҳтарам Владимир Путин суҳбати телефонӣ анҷом доданд.

Дар оғози суҳбат Сарвари давлати мо Президенти Русия муҳтарам Владимир Путинро ба муносибати зодрӯзашон сидқан табрик намуда, таманниёти беҳтарину самимии худро иброз доштанд.

Дар идомаи суҳбат Сарвари давлати мо саҳми шоёни назари муҳтарам Владимир Путинро дар таҳкиму тавсеаи муносибатҳои дӯстӣ ва шарикии стратегии ду кишвар таъкид карданд.

Сарони ду кишвар дар ҷараёни суҳбати дӯстона аз идомаи муколамаи байнидавлатӣ ва рушди минбаъдаи ин раванд истиқбол намуданд.

Ҳамзамон рӯзномаи мулоқотҳои дуҷонибаву бисёрҷонибаи дарпешистодаи сатҳи олӣ, ки дар Душанбе доир мегарданд, мавриди баррасӣ қарор гирифт.

Муҳтарам омӯзгорон, устодон, ҳамкасбон ва хизматчиёни содиқи соҳаи таҳсилоти ибтидоӣ ва миёнаи касбӣ!

Бо эҳтироми беандоза ва самимияти амиқ, ҳамаи шуморо ба ифтихори Рӯзи омӯзгор — иди касбии шахсиятҳое, ки меҳвари маърифат, поягузори рушду пешрафт ва тарбиятгари насли навини кишваранд, табрик гуфта, барои Шумо рӯзгори обод, файзи маънавӣ ва дастовардҳои бузурги илмиро таманно менамоям.

Шахсияти омӯзгор дар ҳама давру замон, дар ҳама ҷомеа ва дар ҳама миллат мақому манзалати воло доштааст. Омӯзгор инсони оддӣ нест. Ӯ роҳбалади фардои миллат, тарбиятгари шуури инсон ва парчамбардори арзишҳои маънавист. Ӯ шахсиятест, ки шабҳо бо андешаи пешрафти шогирд бедорхобӣ мекашад ва рӯзҳоро дар роҳи тақдири дигарон масраф месозад. Маҳз заҳмати омӯзгор аст, ки духтур табобат мекунад, муҳандис меофарад, олим кашф мекунад, овозхон месарояд ва кишвар рушд мекунад.

Имрӯз омӯзгор будан танҳо доштани касб нест. Ин эътиқод, масъулият ва садоқати комил ба миллат аст. Омӯзгори асил, новобаста ба шароит, вазъ ва душвориҳои замон, вазифаи муқаддаси хеш - омӯзондан ва тарбият карданро бо дилу ҷон анҷом медиҳад. Ӯ на танҳо дониш меомӯзонад, балки хислат, ахлоқ, ифтихори миллӣ ва меҳри Ватанро дар қалби шогирд мекорад.

Дар партави сиёсати хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, соҳаи таҳсилоти ибтидоӣ ва миёнаи касбӣ дар меҳвари сиёсати иҷтимоии давлат қарор дошта, бо қадамҳои устувор рушд намуда истодааст. Дастгирии ҳамешагии омӯзгорон, баланд бардоштани мақому мартабаи касбии онҳо, таъсиси муассисаҳои нави таълимӣ, таҷдиду таъмири коллеҷу литсейҳои касбии техникӣ, тасвиби санадҳои меъёрию ҳуқуқии соҳавӣ ва баланд бардоштани музди маош аз он шаҳодат медиҳанд, ки Ҳукумати кишвар ба соҳаи мазкур ҳамчун пойдевори давлат ва сутуни асосии рушди ҷомеа менигарад.

Мо бо ифтихор изҳор медорем, ки имрӯз дар муассисаҳои таҳсилоти ибтидоӣ ва миёнаи касбии ҷумҳурӣ ҳазорҳо омӯзгори соҳибкасбу ватандӯст фаъолият доранд. Онҳо бо садоқати том, дониши муосир ва таҷрибаи баланди касбӣ мутахассисонеро омода месозанд, ки дар бозори меҳнати дохиливу хориҷӣ рақобатпазиранд ва дар пешрафти бахшҳои гуногуни иқтисоди миллӣ саҳми назаррас мегузоранд.

Заҳмати омӯзгорони муассисаҳои таҳсилоти ибтидоӣ ва миёнаи касбӣ танҳо ба дониши фаннӣ маҳдуд намешавад. Онҳо шахсият мепарваранд, ҷавонмардиро меомӯзонанд, ҳисси худшиносиву худогоҳиро дар ниҳоди онҳо бедор мекунанд ва ба шогирдон фарҳанги кору зиндагии солимро меомӯзанд. Ҳар як муваффақияти хатмкунанда самараи меҳру заҳмати омӯзгор аст.

Ҳамзамон, бо итминони комил гуфта метавонем, ки омӯзгорони мо имрӯз бо истифода аз усулҳои замонавии таълим, таҷрибаи бой ва муносибати инфиродӣ ба шогирдон, дар ташаккули ҷомеаи дорои дониши муосир, фарҳанги баланди меҳнат ва ахлоқи шоиста саҳми бузург мегузоранд. Шумо — омӯзгорони муҳтарам, бо заҳмати хеш бунёдгузорони фардо ва кафили бақои давлат ҳастед.

Бори дигар, Шумо шахсиятҳои хоксор, вале таъсиргузор, мураббиёни роҳбалади миллат ва роҳнамоёни насли ҷавонро ба муносибати Рӯзи омӯзгорон сидқан табрик мегӯям. Ба Шумо саломатии бардавом, хонаи обод, рӯҳу илҳоми тоза, шогирдони боистеъдод ва дастовардҳои арзандаи касбиро таманно дорам.

2 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар деҳоти Кангурти ноҳияи Темурмалик ҳамзамон иншооти дигари ҷашнӣ - майдони Парчами давлатии Ҷумҳурии Тоҷикистонро ифтитоҳ намуданд.

Иттилоъ дода шуд, ки баландии сутунпояи Парчами давлатии Ҷумҳурии Тоҷикистон 65 метр, дарозии матоъ 20 ва паҳноиаш 10 метр мебошад.

Майдони Парчами давлатӣ ба истиқболи 35-солагии Истиқлоли давлатии Ҷумҳурии Тоҷикистон бо мақсади тақвияти эҳсоси худшиносиву худогоҳии мардум аз ҷониби соҳибкорону сокинони саховатпешаи деҳоти Кангурт, аз ҷумла Анвар Қурбонов, Шерхон Салимзода ва Каромат Абдиев сохта шудааст.

Тарҳи муосири майдони Парчами давлатӣ хеле ҷолиб буда, ҳисси ватандӯстии ҳар бинанда, умеду бовар ба ояндаи дурахшони Тоҷикистон ва устуворию омодагии ӯро ба ҳифзи арзишҳои миллӣ ва дастовардҳои замони истиқлол боз ҳам баланд мебардорад. Дар робита ба ин Сарвари давлат муҳтарам Эмомалӣ Раҳмон зимни суҳбат бо ҷавонони ноҳия онҳоро нерӯи созанда ва пешбарандаи имрӯзу ояндаи давлат номиданд.

Пешвои миллат ҷавононро ба донишомӯзӣ, аз худ кардани забонҳои хориҷӣ ва расидан ба қадри тинҷию оромии Ватан ҳидоят намуданд.

Дар атрофи Парчами давлатии Ҷумҳурии Тоҷикистон, ҳамзамон барои сайругашти шабонарӯзии мардум фаввораҳои замонавӣ бунёд ва чароғакҳои муосир бо насби панелҳои офтобӣ насб шудааст.

Аз ин пас дар ин макони зебо ва гулгашти назаррабо чун нишони садоқат ва меҳру муҳаббати бепоён нисбат ба рамзҳои давлатӣ чорабиниҳои гуногуни фарҳангӣ баргузор карда мешавад, ки ин василаи муҳими парвариши ҳисси худшиносии миллӣ дар замири насли ояндасози кишвар мебошад.

Сарвари давлат муҳтарам Эмомалӣ Раҳмон ба соҳибкорону сокинони дар ин кори басо муҳим саҳм гузошта арзи сипос намуданд. Соҳибкор Анвар Қурбонов дар ҷавоб иттилоъ дод, ки тасмим дорад дар маркази деҳоти Кангурт як муассисаи таҳсилоти томактабӣ низ барои 400 кӯдак бисозад.

2 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар идомаи сафари корӣ ба ноҳияи Темурмалики вилояти Хатлон дар деҳоти Кангурт варзишгоҳи марказиро мавриди истифода қарор доданд.

Иттилоъ дода шуд, ки иншоот бо ҳадафи тарғиби тарзи ҳаёти солим ва ҷалби ҷавонон ба варзиш аз ҷониби Муассисаи давлатии “Дирексияи сохтмони иншооти ҳукуматӣ”-и Дастгоҳи иҷроияи Президенти Ҷумҳурии Тоҷикистон бо харҷи зиёда аз 18 миллион сомонӣ бунёд гардида, дорои 6000 ҷойи нишаст мебошад.

Аз моҳи августи соли 2022 бо супориши Сарвари давлат муҳтарам Эмомалӣ Раҳмон барои дар маркази деҳоти Кангурт бунёд намудани иншооти муосири варзишиву солимгардонӣ иқдом гирифта шуда, он дар муҳлати 3 сол бо ҷалби коргарону мутахассисони маҳаллӣ бо сифати баланду риояи талаботи меъморӣ сохта ба истифода дода шуд.  Масоҳати замини варзишгоҳ 13 ҳазор метри мураббаъро ташкил дода, дар чор гӯшаи иншоот барои гузаронидани бозиҳои футбол чароғакҳои равшанидиҳанда насб шудааст.

Ҳамзамон дар бинои дуошёнаи варзишгоҳ барои меҳмонон, мураббиён ва ровиёни варзиш 12 ҳуҷраи корию хизматрасонӣ ва дигар иншооти ёрирасон бунёд гардидааст. Бо мавриди истифода қарор гирифтани иншооти нави варзишӣ 10 сокини ҳамин деҳа дар он бо кор таъмин шудааст.

Дар ҳамин ҷо Пешвои миллат муҳтарам Эмомалӣ Раҳмон бо варзишгарони навраси дастаи футболи лигаи дуюми “Сурхоб” суҳбат карда, онҳоро ба дӯст доштани варзиш ва рушди ҷисмониву равонӣ ҳидоят намуданд.

Мавриди зикр аст, ки барои амалисозии ҳадафҳои ташаббуси ҷаҳонии Тоҷикистон дар самти таҷлили Рӯзи ҷаҳонии футбол дар шаҳру ноҳияҳои кишвар иншооти муосири варзишӣ сохта мешаванд, ки ин тадбир ба рушду оммавигардонии футбол, ва, умуман тарзи ҳаёти солим замина мегузорад. Дар робита ба ин дар 2 соли охир дар деҳот ва шаҳраки ноҳияи Темурмалик 8 майдонча ва 6 толори варзишӣ ва 4 муассисаи давлатии мактабҳои варзишӣ сохта ба истифода дода шуд.

Ҳоло дар доираи Барномаи давлатии рушди футболи Ҷумҳурии Тоҷикистон барои солҳои 2022-2026 дар вилояти Хатлон сохтмони 130 иншоот, аз ҷумла варзишгоҳи ноҳияи Восеъ бо 22 ҳазор ҷойи нишаст, ноҳияи Абдураҳмони Ҷомӣ бо 10 ҳазор ҷойи нишаст, ноҳияи Шамсиддини Шоҳин бо 6 ҳазор ҷойи нишаст ва дар ноҳияи Вахш сохтмони варзишгоҳи замонавӣ бо 5 ҳазор ҷойи нишаст идома дорад.

Бунёди биноҳои таълимии иловагӣ дар назди муассисаҳои таҳсилоти миёнаи умумӣ, иншооти тандурустӣ ва хатти оби нӯшокӣ дар ноҳияи Темурмалик чор иншооти муҳимми иҷтимоию зербиноист, ки аз ҷониби Пешвои миллат тариқи фосилавӣ ифтитоҳ ёфт. Ин 4 иншоот ба рушди таҳсилот, хизматрасониҳои босифати тиббӣ ва дастрасии мардум ба оби тоза заминаи мусоид мегузоранд.

Бинои иловагӣ дар назди Муассисаи таҳсилоти миёнаи умумии №10 бо тарҳу сифати хуб сохта шуда, барои дар шароити мусоид ба таҳсил фаро гирифтани хонандагони деҳаи Чавроқ бунёд ёфтааст. 10 синфхона барои 480 хонанда дар ду баст пешбинӣ шуда, кабинетҳои фаннии муҷаҳҳаз ба омӯзиши назариявӣ ва амалии хонандагон нақш мегузорад. Бинои дуюми иловагӣ бо ҳамон лоиҳа дар назди муассисаи Муассисаи таҳсилоти миёнаи умумии №25 дар деҳаи Чашмаи деҳоти Гурдоварон сохта шуда, барои 480 хонанда дар ду баст пешбинӣ шудааст.

Дар заминаи рӯ ба беҳбудӣ овардани сатҳи зиндагии мардум ва пайваста зиёд шудани шумораи аҳолӣ, зарурати бунёди бинои иловагии таълимӣ дар ин деҳа ва дар шароити хуб ба таҳсил фаро гирифтани хонандагон ба миён омада буд. Ба ин хотир ба бунёди бинои таълимии иловагӣ дар назди Муассисаи таҳсилоти миёнаи умумии №25 тасмим гирифта шуд. Муассиса бо шабакаи гармидиҳӣ пайваст буда, ҳарорати синфхонаҳо муътадил нигоҳ дошта мешавад.

Дар ҳар ду бинои иловагӣ Маркази ташаккули барвақтии кӯдакон сохта шудааст, ки он пояи асосии рушди зеҳнӣ, равонӣ ва иҷтимоии кӯдакро аз солҳои аввал мегузорад. Машғулиятҳои махсуси таълимӣ ва омӯзишии кӯдакон бо истифода аз аёниятҳои зарурӣ амалӣ шуда, онҳоро ба марҳилаи мактабӣ омода менамояд.

Дар идомаи ғамхории Ҳукумати кишвар ба рушди соҳаи тиб шуъбаҳои таваллуд, бачагона, эҳё ва ҷарроҳии Маркази саломатии ноҳияи Темурмалик таъмир ва бо номгӯи зиёди дастгоҳу таҷҳизоти соҳавӣ ҷиҳозонида шуд. Хизматрасониҳои тиббӣ ба сокинон аз ҷониби 40 табиб бо истифода аз муосиртарин дастгоҳу таҷҳизот расонида мешавад.

Таъмир ва насби таҷҳизот дар Маркази саломатии ноҳияи Темурмалик бо дастгирии Ҳукумати Ҷумҳурии Тоҷикистон ва ҷалби шарикони рушд амалӣ гардидааст. Шуъбаҳои таваллуд, ҷарроҳӣ, эҳё ва шуъбаи бачагона дар маҷмуъ барои қабули 100 нафар дар як вақт пешбинӣ шудааст.

Ба ин муассисаи тандурустӣ аз ҷониби Президенти Тоҷикистон Пешвои миллат нақлиёти ёрии таъҷилӣ тақдим карда шуд, ки боиси сипосу қадрдонии кормандон ва мардум гардид. Бунёди шабакаҳои нави обтаъминкунӣ дар ноҳияи Темурмалик аз ҷумлаи муҳимтарин иншоот буд, ки аз ҷониби Пешвои миллат муҳтарам Эмомалӣ Раҳмон ба таври фосилавӣ ифтитоҳ ёфт.

Ду лоиҳаи марбут ба таъмини сокинон бо оби тозаи ошомиданӣ аз ҷониби соҳибкори саховатпеша Ҳабибулло Сулаймонов амалӣ гардид.

Мардум аз норасоии об дар маркази маъмурии ноҳия - шаҳраки Баҳманрӯд, деҳоти Танобчӣ ва Гурдоварон, маҳаллаҳои Баҳодурон, Чашма, Заркамар, Гурондеҳ, Саидмуъминобод ва Танобчии боло солҳои зиёд азият мекашиданд.

Таваҷҷуҳи Сарвари давлат муҳтарам Эмомалӣ Раҳмон ба беҳсозии шароити зиндагии мардум акнун ба ҳалли ин масъала мусоидат намуд.

Рӯйи даст гирифтани иқдоми мазкур бозгӯи ҳамовозии сокинони ватандӯст бо сиёсати инсондӯстонаи Пешвои миллат муҳтарам Эмомалӣ Раҳмон буда, боиси дастрасии 30 ҳазор кас аз аҳолии ноҳияи Темурмалик ба ин неъмати бузург шуд. Тасмим аст, ки ояндаи наздик боз 5 ҳазор сокинони деҳоти дурдасти ноҳия дар масофаҳои то 12 километр бо оби тозаи ошомиданӣ таъмин гарданд.

Об аз дарёи Сурхоб дар ҳавзи дорои ғунҷоиши 7 ҳазор метри мукааб захира шуда, аввал такшин мешавад. Оби ба ин тариқ софшуда боз бо истифода аз таҷҳизоти муосир аз чанд марҳилаи поксозӣ мегузарад ва аввал ба 8 махзани оби дар нуқтаҳои гуногун сохташуда ва аз онҳо ба хонаҳои мардум интиқол меёбад. Тибқи нишондоди лоиҳавӣ, пойгоҳҳои барқии обкашӣ иқтидор доранд, ки дар як шабонарӯз обкаширо то ба 4500 метри мукааб расонанд.

Барои истифодаи сариштакоронаи об дар ҳар хона ҳисобкунакҳо насб карда шудааст. Таъмири иншоот ва таҷҳизот, пардохти неруи барқ ва дигар хароҷоти пойгоҳҳои обкаширо соҳибкори ватанӣ бар дӯш гирифта, тасмим гирифтааст, ки маблағи аз ҳисоби истифодаи об ҷамъоваришударо дар дигар корҳои ободонӣ сарф намояд.

Сарвари давлат муҳтарам Эмомалӣ Раҳмон ташаббуси соҳибкор Ҳабибулло Сулаймоновро намунаи хуби инсондӯстӣ ва нақш гузоштан дар пешрафти Ватан арзёбӣ намуда, ба масъулин дастур доданд, ки номаш ба мукофоти давлатӣ пешниҳод карда шавад.

2 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо мақсади ифтитоҳи як қатор иншооти таъиноти гуногун ва шиносоӣ бо вазъи зиндагии мардум бо сафари корӣ ба ноҳияи Темурмалик ташриф оварданд.

Сарвари давлат муҳтарам Эмомалӣ Раҳмон нахуст дар деҳаи Дӯстии деҳоти Кангурт Мактаби президентии ноҳияи Темурмаликро, ки аз ҷониби соҳибкорони ҳимматбаланди ватанӣ бародарон Шамсулло ва Маҳмадзоҳир Соҳибовҳо бунёд шудааст, ифтитоҳ намуданд.

Аслан ин муассисаи таълимӣ барои таҳсилоти миёнаи умумӣ пешбинӣ шуда буд, вале бо назардошти он, ки дар сатҳи баланд ва бо сифати хуб сохта ва муҷаҳҳаз карда шудааст, Сарвари давлат муҳтарам Эмомалӣ Раҳмон зимни шиносоӣ бо шароити таълимӣ дастур доданд, ки он ба Мактаби президентӣ барои ҷамоатҳои деҳоти Кангурт ва Ҳусейнободи ноҳияи Темурмалик табдил дода шавад. Тибқи супориши дигар ҳамаи омӯзгорону хонандагон бояд тариқи озмун қабул карда шаванд. Ҳамчунин, дастур дода шуд, ки дар назди Мактаби президентӣ барои 400 хонанда хобгоҳ ва барои 200 кӯдак муассисаи таҳсилоти томактабӣ низ сохта шавад.

Зимни шиносоӣ бо шароити муассиса ба Пешвои миллат муҳтарам Эмомалӣ Раҳмон иттилоъ дода шуд, ки иншоот барои ба таҳсил фаро гирифтани 700 хонанда пешбинӣ гардидааст. Бинои таълимӣ аз 3 ошёна иборат буда, 27 синфхонаи муҷаҳҳаз, ҳуҷраҳои корӣ, толори фарҳанг бо 240 ҷойи нишаст, китобхонаи анъанавӣ ва электронии ба хати интернети баландсуръат пайваст, толору майдонча барои бозиҳои волейболу баскетбол, ошхона ва дигар ҳуҷраҳои ёрирасон дорад. Китобхона дорои адабиёти зиёди таълимию бадеӣ буда, аз он омӯзгорон ва ҳам хонандагон васеъ истифода менамоянд.

Иншоот ҷавобгӯ ба талаботи байналмилалӣ сохта шудааст ва кабинетҳои фаннӣ, аз ҷумла физика, химия, биология, технологияи информатсионӣ ва дигар шароити мусоид ба ташаккули дониши хонандагон мусоидат менамояд. Синфхонаҳо бо компютерҳои навтарин ва таҷҳизоти интерактивӣ низ таъмин гардидааст.

Пешвои миллат муҳтарам Эмомалӣ Раҳмон бо зикри он, ки “маориф самти афзалиятноки сиёсати иҷтимоии давлат аст ва сармоягузорӣ ба он — сармоягузорӣ ба ояндаи кишвар мебошад”, ҳайати омӯзгоронро ба истифодаи хуби имконоти фароҳамшуда ва ба омода кардани кадрҳои дорои дониши баланд ҳидоят намуданд. Фаъолияти таҷҳизоти мутамаркази гармидиҳии иншоот таъсири манфии фасли сармо ба раванди таълимро пешгирӣ менамояд. Дар назди муассиса чоҳҳои зеризаминӣ канда шуда, оби ошомиданӣ дар ҳавзи ғунҷоишаш 50 метри мукааб захира мегардад.

Ба Роҳбари давлат муҳтарам Эмомалӣ Раҳмон иттилоъ дода шуд, ки раванди таълим дар муассиса бо се забон – тоҷикӣ, русӣ ва англисӣ ба роҳ монда шудааст. Ҳамчунин, барои дар сатҳи баланд гузаронидани машғулиятҳо ба муассиса омӯзгорони ҷавону ботаҷриба ҷалб гардидаанд.

Ифтитоҳи муассисаи таълимӣ як қадами устувор дар роҳи татбиқи Стратегияи миллии рушди маориф то соли 2040 мебошад ва ба тақвияти неруи зеҳнии насли наврас, боло бурдани сатҳи саводнокӣ ва тавсеаи имкониятҳои таълимӣ мусоидат хоҳад кард. Бо ба назар гирифтани афзоиши ҳамасолаи аҳолӣ тасмим гирифта шудааст, ки роҳандозии тадбирҳо барои ба таҳсил фаро гирифтани 1500 хонанда дар ду баст дар ин муассиса шароит муҳайё гардад.

Майдончаи варзишӣ, ки дар назди иншоот сохта шудааст, воситаи хуби ташаккули тарғиби тарзи ҳаёти солим, ҷалби бештари хонандагон ба тарбияи ҷисмонӣ, таҳкими саломатӣ ва боло бурдани завқи онҳо ба варзиш мебошад. Сабзкории ҳудуди иншоот, гулу буттаҳои ороишӣ ва дарахтони мевадиҳанда ба ҳусни муассиса ва ҳам деҳа зебогии дигар зам мекунад.

Пешвои миллат муҳтарам Эмомалӣ Раҳмон ифтитоҳи муассисаи замонавии таълимиро намунаи возеҳи шарикии давлат ва бахши хусусӣ дар соҳаи маориф арзёбӣ намуда, ба соҳибкорони ватандӯсту ҳимматбаланд бародарон Соҳибовҳо барои ин иқдоми наҷиб изҳори сипос намуданд ва ба омӯзгорон барои тарбияи насли ҳушманду доно дастуру тавсияҳо доданд.

26 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар доираи сафари корӣ ба шаҳри Ваҳдат дар деҳоти Раҷаб Исмоилов бо нашъунамои дарахтони хоҷагии ниҳолпарварӣ, намоиши маҳсулоти кишоварзӣ ва рафти кишти такрорӣ шинос шуданд. Ин хоҷагии ниҳолпарварӣ дар назди Кумитаи ҳифзи муҳити зисти назди Ҳукумати Ҷумҳурии Тоҷикистон бо мақсади амалишавии «Барномаи давлатии кабудизоркунӣ барои то давраи соли 2040» бунёд карда шудааст.

Зимни шиносоӣ ба Сарвари давлат муҳтарам Эмомалӣ Раҳмон иттилоъ дода шуд, ки масоҳати умумии замини хоҷагии ниҳолпарварӣ 5 гектар буда, дар он беш 25 ҳазор бех ниҳолу дарахтони гуногуни ҳамешасабз, сояафкану ороишӣ парвариш карда мешавад. Ҳоло дар ин ҷо парвариши намудҳои нодири ниҳолу дарахтон, аз ҷумла секвойя, можжевелник берёза, павловния, арча, магнолия, шамшод, дуб ва санавбар дар маҷмуъ 20 навъ мутобиқ ба иқлим бо усулҳои муосири инноватисионӣ ба роҳ монда шудааст.

Ҳамзамон Роҳбари давлат муҳтарам Эмомалӣ Раҳмон дар як гӯшаи хоҷагии ниҳолпарварӣ барои беҳдошти ҳифзи муҳити зист ва тарғибу ташвиқи ниҳолшинонӣ як ниҳол дарахти нодири ороишии секвойя шинонданд.

Зимни суҳбат бо мутахассисон Пешвои миллат муҳтарам Эмомалӣ Раҳмон ҷиҳати зиёд намудани навъҳои дарахтони нодири ороишӣ ва таъмини шаҳру ноҳияҳо бо ин навъи дарахтон тавсияҳои муфид доданд. 

Баъди шиносоӣ бо нашъунамои дарахтон дар ҳамин ҷо Пешвои миллат муҳтарам Эмомалӣ Раҳмон аз намоиши маҳсулоти кишоварзӣ ва анвои нону хурокҳои миллӣ боздид намуданд. Дар ҳама шаклҳои хоҷагидории шаҳри Ваҳдат 19 ҳазору 470 гектар замини кишт мавҷуд аст, ки 6 ҳазору 460 гектари онро боғу токзор ташкил медиҳад.

Кишоварзони шаҳр сабзавоту полезӣ ва меваи тару тоза, аз ҷумла картошка, пиёз, сабзӣ, карам, тарбузу харбуза, себу ангурро бо шаклу услуби зебо ба намоиш гузоштанд. Ҳамаи ин самараи заҳмати пурганҷи деҳқонон буда, аз фаровонӣ ва файзу баракат дар кишвари биҳиштосоямон дарак медиҳад.

Ҳамзамон, Президенти Ҷумҳурии Тоҷикистон муҳтарам Эмомалӣ Раҳмон аз рафти кишти такрорӣ дар заминҳои хоҷагиҳои деҳқонии Барот Абдураҳимов ва Абдурауф Раҷабов дидан намуданд. Хоҷагии деҳқонии Барот Абдураҳимов дар майдони 1 гектар, аз ҷумла дар 70 садяк ғалла ва 30 садяк кишти такрории картошка гузаронидааст. 

Хоҷагии деҳқонии Абдурауф Раҷабов дар ихтиёри худ 9 гектар замин дорад, ҳоло дар 6 гектари он кишти такрорӣ гузаронида шудааст. Ҳоло хоҷагидорон пас аз ҷамъоварии ҳосили кишти асосӣ, кишти такрориро ба роҳ монда, ҳар қитъа замини корамро самараноку оқилона истифода менамоянд.

Дар ҳама шаклҳои хоҷагидории шаҳри Ваҳдат дар нуҳ моҳи соли ҷорӣ дар зиёда аз 6 ҳазору 800 гектар, аз ҷумла дар 3 ҳазору 203 гектар ғалла, 22 гектар картошка, 6 гектар полезӣ, 1143 гектар сабзавот ва дигар зироат кишти такрорӣ гузаронида шудааст.

Сарвари давлат муҳтарам Эмомалӣ Раҳмон пас аз шиносоӣ бо вазъи нашъунамои дарахтон, намоиши маҳсулоти кишоварзӣ ва рафти кишти такрорӣ ба заҳмату меҳнати деҳқонон баҳои баланд дода, барои афзун намудани истеҳсоли маҳсулоти рақобатпазир дастуру тавсияҳо доданд.

Сеюмин иншооти саноатӣ - корхонаи Роял Бебӣ Тоҷикистон дар шаҳри Ваҳдат аз ҷониби Пешвои миллат муҳтарам Эмомалӣ Раҳмон ба таври фосилавӣ ифтитоҳ гардид. Корхона дар заминаи имтиёзу сабукиҳои давлат ба соҳибкорон бо ҷалби сармояи хориҷӣ сохта шудааст. Хатҳои технологӣ аз хориҷи кишвар ворид шуда, маҳсулоти он бо шаклу андозаҳои гуногун ва мутобиқ ба стандартҳои аврупоӣ истеҳсол мешавад. Дар марҳилаи аввал дар ин ҷо 65 сокини маҳаллӣ бо кор таъмин шуда, тасмим аст, ки ин шумора пас аз фаъолияти шабонарӯзии корхона ба 150 кас расонида шавад. Иқтидори лоиҳавии корхона дар як моҳ истеҳсоли 6 миллиону 240 ҳазор ва дар як сол 75 миллион донаро ташкил медиҳад.

Ашёи хом аз хориҷи кишвар ворид шуда, дар анборҳо бо риояи талаботи санитарӣ нигаҳдорӣ мешавад. Соҳибкорон ният доранд, ки ояндаи наздик истеҳсоли қисми зиёди ашёи хоми ин корхонаро дар дохили кишвар ба роҳ монанд.

Бехатарӣ ва сифати маҳсулот пеш аз коркард дар озмоишгоҳ бо истифода аз таҷҳизоти муосир санҷида мешавад. Маҳсулоти ниҳоӣ ба бозору мағозаҳо тавассути нақлиёти махсуси ширкат дастрас мегардад.

Се иншооти саноатӣ: ҶДММ Талант, ҶДММ Зиннат Гач ва корхонаи Роял Беобӣ Тоҷикистон, ки дар шаҳри Ваҳдат аз ҷониби Роҳбари давлат муҳтарам Эмомалӣ Раҳмон ифтитоҳ ёфтанд ба афзоиши иқтидори истеҳсоли ватанӣ мусоидат менамоянд. Дар се корхона ҳоло 165 сокини маҳаллӣ бо кор таъмин шуданд ва имкони афзун шудани ин шумора вуҷуд дорад.

26 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Ваҳдат ба фаъолияти боз як корхонаи саноатӣ – ҶДММ «Зиннат Гач» оғоз бахшиданд.

Иншоот дар доираи корҳои ободонӣ ба истиқболи шоиста аз 35- умин солгарди Истиқлоли давлатӣ аз ҷониби гурӯҳи соҳибкорони ватанӣ бо роҳбарии Абдулҳафиз Раҳимов сохта шуда, собит мекунад, ки соҳибкорон дастгириҳои давлат аз бахши хусусиро хуб истифода мекунанд.

Дар корхона бо истифода аз конҳои амалкунандаи ҳудуди шаҳри Ваҳдат гачкартон, ғуррагачҳо, ранг, намудҳои ширеши тахтасангҳои ба обу намнокӣ тобовар ва дигар молҳои ивазкунандаи воридот мутобиқ ба талаботи стандартҳои дохилу хориҷ истеҳсол карда мешаванд. Иттилоъ дода шуд,ки 75 дарсади ашёи хом аз дохили кишвар дастрас мегардад. ҶДММ «Зиннат Гач» бо тавлиди 14 номгӯи маҳсулот, аз ҷумлаи калонтарин корхонаҳои саноатӣ дар шаҳри Ваҳдат аст.

Шаклу андозаҳои гачкартон гуногун буда, ба гармӣ ва намнокӣ тобовар мебошанд. Ин маҳсулот дар таъмиру ороиши девор ва сақфи иншооти гуногун васеъ истифода мегардад. Хатҳои технологӣ насли нави истеҳсоли кишварҳои пешрафта буда, иқтидори лоиҳавӣ дар як сол як миллион гачкартон ва 50 тонна маҳсулоти дигари сохтмониро ташкил менамояд.

Мутахассисон ашёи хомро қабл аз коркард бо истифода аз муосиртарин дастгоҳу таҷҳизот санҷида, сипас барои истеҳсолот пешниҳод менамоянд. Ин раванд эътимод ба сифат ва рақобатпазир будани маҳсулотро бештар мекунад.

Дар шароте, ки сохтмон дар Тоҷикистон босуръат рушд мекунад, бунёди чунин корхонаҳои саноатӣ аҳамияти хеле бузург дорад. Пас аз ба фаъолият оғоз намудани иншоот 40 сокини маҳаллӣ бо кор таъмин шуда, ин шумора ояндаи наздик ба 100 кас расонда мешавад.

Пешвои миллат муҳтарам Эмомалӣ Раҳмон иқдоми гурӯҳи соҳибкоронро дар самти бунёди иншооти нави саноатӣ, ки дар татбиқи ҳадафи чоруми миллӣ – “Саноатикунонии босурати кишвар” нақш мегузорад, муҳим арзёбӣ намуда, иброз доштанд, ки ин тадбир ба истифодаи васеъи захираҳои табиӣ, баланд бардоштани иқтидори истеҳсолӣ, коҳиши вобастагӣ аз воридот, муҳайёсозии ҷойҳои нави корӣ, рушди иқтисод ва дар маҷмуъ ба баланд бардоштани сатҳи некуаҳволии мардум заминаҳои воқеӣ мегузорад.

26 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар шаҳри Ваҳдат корхонаи истеҳсоли хишти Ҷамъияти дорои масъулияти маҳдуди Талантро ба истифода доданд.

Ҷамъияти дорои масъулияти маҳдуди «Талант» аз ҷониби соҳибкор Муҳаммадӣ Қодирзода дар якҷоягӣ бо бародаронаш сохта шудааст. Иқтидори истеҳсолии корхона дар як шабонарӯз 250 ҳазор дона хишти пухтаро ташкил намуда, дар он 60 кас бо кор таъмин мешаванд.

Ҷамъияти дорои масъулияти маҳдуди Талант ягона корхонаи истеҳсоли хишт дар кишвар маҳсуб меёбад, ки бо болопӯши даврзананда таъмин аст ва ин имкон медиҳад, ки фаъолияти иншооти саноатӣ новобаста аз барфу борон дар 4 фасли сол ба роҳ монда шавад.

Пешвои миллат муҳтарам Эмомалӣ Раҳмон ифтитоҳи корхонаи навро дар доираи татбиқи ҳадафи чоруми стратегии Ҳукумати кишвар барои афзоиши истеҳсоли масолеҳи сохтмонӣ, фарогирии сокинони маҳаллӣ бо кори доимӣ ва рушди саноат аз ҳисоби имкониятҳои табиӣ муҳим арзёбӣ карданд.

Амалишавии ҳадафҳои Ҳукумати кишвар ва татбиқи имтиёзҳо барои намояндагони бахши хусусӣ ҷиҳати ворид кардани таҷҳизоти муосире, ки дар як вақт чанд амалро иҷро мекунад, сабаб шудааст. Аз ҷумла роботҳо ба фаъолияти мунтазам ва баланд шудани иқтидори истеҳсолии Ҷамъияти дорои масъулияти маҳдуди Талант мусоидат мекунад.

Истифодаи 3 намуди ашёми хом - хоки сафед, гили сурх ва хокаи ангишт имкон медиҳад, ки маҳсулоти босифати ҷавобгӯ ба стандартҳои байналмилалӣ бо тамғаи Элок истеҳсол шавад. Ҳудуди умумии корхонаи хишт 3 гектарро ташкил медиҳад.

Масоҳати камро фаро гирифтани ҳудуди корхона, иқтидори баланди хатҳои технологӣ ва сарфаи қувваи барқ аз бартариҳои дигари технологияи ин корхонаи нави саноатӣ маҳсуб меёбад. Бо афзалият ба таҷрибаи муосир бунёди иншооти саноатӣ дар доираи татбиқи ҳадафи чоруми стратегӣ – саноатикунонии босуръати кишвар талаботи бозорро бо маҳсулоти босифати ватанӣ қонеъ мегардонад.

Барои таъмини эҳтиёҷи корхона аз чуқурии 190 метр об бароварда шудааст. Ҳоло дар кишвар 160 корхонаи истеҳсолкунандаи хишти пухта мавҷуд аст.

Ҳамзамон дар ҳамин рӯз ба Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон лоиҳаи бинои асосии корхона муарифӣ гардид, ки он аз ду ошёна ва таҳхона иборат мебошад. Иншооти нав дар шафати роҳи дорои аҳаммияти байналмилалӣ Душанбе-Кӯлоб-Хоруғ сохта шуда, дорои ҳуҷраҳои корӣ, марказҳои хизматрасонӣ ва хобгоҳ аст, ки дар он 20 кас бо кор таъмин мешаванд.

Пешвои миллат муҳтарам Эмомалӣ Раҳмон ба коргарону мутахассисон ва масъулини дахлдори соҳа таъкид намуданд, ки корҳои сохтмонӣ ва таҷҳизонӣ бояд бо сифати баланд анҷом дода шавад.

26 сентябр бо иштироки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бинои шуъбаи Кумитаи давлатии амнияти миллии Ҷумҳурии Тоҷикистон дар шаҳри Ваҳдат мавриди истифода қарор гирифт.

Иншооти нав аз 4 ошёна ва таҳхона иборат буда, дар он барои фаъолияти кормандон мутобиқ ба талабот шароит фароҳам оварда шудааст.

Бинои шуъбаи Кумитаи давлатии амнияти миллӣ дар шаҳри Ваҳдат аз ҳуҷраҳои корӣ, китобхона, толори варзишӣ, маҷлисгоҳ барои 40 нафар, ошхона ва ҳуҷраи бойгонӣ иборат мебошад.

Дар ҳамин рӯз ба кормандони шуъбаи Кумитаи давлатии амнияти миллии Ҷумҳурии Тоҷикистон дар шаҳри Ваҳдат калиди манзилҳои нави истиқоматӣ супорида шуд.

Пешвои миллат муҳтарам Эмомалӣ Раҳмон бо ёдоварӣ аз ҳолати зудтағйирёбандаи ҷаҳони муосир кормандони шуъбаи Кумитаи давлатии амнияти миллӣ дар шаҳри Ваҳдатро барои хизмати садоқатмандона ба нафъи давлату мардуми Тоҷикистон ва иҷрои сарбаландонаи масъулият вазифадор намуданд. Зеро имрӯз ҳамчун гавҳараки чашм ҳифз намудани амнияти миллӣ ва таъмини оромию осудагӣ аз ҳадафҳои аслии Ҳукумати кишвар маҳсуб меёбад.

Бо мавриди истифода қарор гирифтани бинои нави хизматӣ кормандони шуъбаи Кумитаи давлатии амнияти миллии Ҷумҳурии Тоҷикистон дар шаҳри Ваҳдат аз шароити мусоид барои фаъолият ва истиқомат баҳравар шуданд.

Ҳамзамон дар шафати бино иншооти ёрирасон сохта шуда, ҳудуди он чароғон ва сабзкорӣ шудааст.

Ҷумҳурии Тоҷикистон аз соли 1992 узви фаъоли Созмони Миллали Муттаҳид (СММ) мебошад. Сиёсати хориҷии кишвар таҳти роҳбарии Президенти Ҷумҳурии Тоҷикистон, Эмомалӣ Раҳмон, бо мақсади ҳифзи амнияти миллӣ, таъмини рушди устувор ва тақвияти ҳамкории байналмилалӣ равона шудааст. Ҷанбаҳои ҳуқуқӣ ва меъёрҳои байналмилалӣ ҳамчун асоси таҳкими сиёсати хориҷӣ ва иштироки фаъол дар фаъолияти СММ хизмат мекунанд (United Nations, 1945).

 Асоси ҳуқуқии сиёсати хориҷии Тоҷикистон дар СММ

Тоҷикистон фаъолияти хориҷиро дар чаҳорчӯби Конститутсияи Ҷумҳурии Тоҷикистон (1994) ва санадҳои байналмилалӣ амалӣ мекунад. Узвият дар СММ ба кишвар ҳуқуқҳо ва вазифаҳои мушаххас медиҳад, ки аз ҷумлаи онҳо метавон ба:

Ҳифзи сулҳ ва амнияти байналмилалӣ (Art. 1, UN Charter, 1945);

Ҳифзи ҳуқуқи инсон ва пешгирии зӯроварӣ (Universal Declaration of Human Rights, 1948);

Ҳамкории иқтисодӣ ва иҷтимоӣ барои рушди устувор (Economic and Social Council, UN, 1946) ишора кард.

Ҳар яки ин принсипҳо Тоҷикистонро водор менамояд, ки сиёсати хориҷиро бо риояи меъёрҳои байналмилалӣ ва қатъномаҳои СММ мутобиқ созад.

 Принсипҳои сиёсати хориҷии Эмомалӣ Раҳмон дар СММ

Сиёсати хориҷии Тоҷикистон таҳти роҳбарии Эмомалӣ Раҳмон бо асоси ҳуқуқи байналмилалӣ ва меъёрҳои СММ ҷорӣ гардидааст. Принсипҳои асосӣ инҳоянд:

Ҳифзи амният ва устувории минтақаӣ
Тоҷикистон ҳамчун узви фаъоли СММ барои ҳалли баҳсҳои минтақавӣ ва пешгирии таҳдидҳои амниятӣ истифода мебарад (UN Security Council Resolutions).

Ҳамкории байналмилалӣ ва рушди устувор
Ҷумҳурӣ тавассути созмонҳои зерсохтори СММ барномаҳои рушди устувор, муҳофизати муҳити зист ва ҳифзи ҳуқуқи инсонро дастгирӣ мекунад (UN Sustainable Development Goals, 2015).

Эҳтиром ба ҳуқуқи байналмилалӣ ва қонуният
Тоҷикистон қатъномаҳои Маҷмаи умумӣ ва Шӯрои амниятро риоя намуда, баҳсҳо ва низоъҳоро бо роҳи сулҳомез ҳал мекунад (UN Resolutions 1325, 2250). Ҷанбаҳои амалии сиёсати хориҷии Тоҷикистон дар доираи ҳуқуқи байналмилалӣ

Тоҷикистон дар кори Шӯрои иқтисодӣ-ижтимоии СММ, Кумитаи ҳуқуқи инсон ва дигар ниҳодҳои СММ фаъолона иштирок мекунад.

Кишвар дар қабули қарорҳои байналмилалӣ, аз ҷумла қатъномаҳои Шӯрои Амният, ҳуқуқи байналмилалӣ ва Конвенсияҳои СММ-ро ҳамчун заминаи ҳуқуқӣ истифода менамояд.

Дар масъалаҳои марзӣ, амниятӣ ва минтақавӣ Тоҷикистон ба меъёрҳои ҳуқуқи байналмилалӣ такя мекунад ва ҳамкориҳои дуҷониба ва бисёрҷонибаро бар асоси он таҳким медиҳад.

 Хулоса

Сиёсати хориҷии Ҷумҳурии Тоҷикистон таҳти роҳбарии Эмомалӣ Раҳмон дар чаҳорчӯби Созмони Миллали Муттаҳид намунаи комилест, ки чӣ тавр меъёрҳои ҳуқуқи байналмилалӣ метавонад воситаи ҳифзи амнияти миллӣ, рушди устувор ва тақвияти ҳамкории байналмилалӣ гардад. Риояи қатъномаҳо ва созишномаҳои СММ барои Тоҷикистон василаи муҳим барои ҳифзи манфиатҳои миллӣ ва иштироки фаъол дар ҷомеаи байналмилалӣ мебошад.

 Адабиёт:

United Nations. (1945). Charter of the United Nations. New York: United Nations.

United Nations. (1948). Universal Declaration of Human Rights.

United Nations. (2015). Sustainable Development Goals.

United Nations Security Council Resolutions. (1325, 2250, ва дигар).

Конститутсия Ҷумҳурии Тоҷикистон (1994). Душанбе.

 Фозил Бобозода Ашурмаҳмад,

Сардори шуъбаи ҳуқуқ, коргузорӣ ва назорати

Кумита оид ба таҳсилоти ибтидоӣ ва миёнаи касбии

назди Ҳукумати Ҷумҳурии Тоҷикистон

Дар фароварди сафар ба шаҳри Ню-Йорк Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон бо Президенти Ҷумҳурии Фаронса муҳтарам Эммануэл Макрон мулоқот намуданд.

Дар вохӯрӣ масоили вобаста ба густариши робитаҳои дуҷониба ва ҳамкорӣ дар доираи созмонҳои байналмилалӣ доир ба пешбурди ташаббусҳои муштараки ду кишвар, аз ҷумла дар мавзӯъҳои обу иқлим, баррасӣ шуд.

Ҳамчунин, атрофи дигар масоили мавриди таваҷҷуҳи ду ҷониб гуфтугӯи судманд сурат гирифт.

Президенти Ҷумҳурии Тоҷикистон муҳтарам Эмомалӣ Раҳмон соли 2024-ро дар кишвар ҳамчун «Соли маърифати ҳуқуқӣ» эълон карда, ин иқдомро ҳамчун як ташаббуси муҳими миллӣ барои таҳкими фарҳанги ҳуқуқӣ ва риояи қонунҳои миллӣ ва байналмилалӣ роҳандозӣ намуданд. Бо дарки мушкилоти замони муосир, ки бо нодида гирифтани меъёрҳои ҳуқуқи байналмилалӣ ва афзоиши низоъҳои байнимамлакатӣ алоқаманд аст, Ҳукумати кишвар кӯшиш намуд, ки сатҳи огоҳӣ ва маърифати ҳуқуқиро дар байни аҳолӣ ва мақомоти давлатӣ боло барад.

Дар давоми соли 2024 ҳазорҳо суҳбату вохӯрӣ, барномаҳои таълимӣ ва таблиғотӣ дар шакли семинарҳо, конфронсҳо ва маъракаҳои иттилоотӣ баргузор шуданд. Ин тадбирҳо боиси баландшавии сатҳи ҳуқуқдонии шаҳрвандон гардиданд. Дар натиҷа, таҷрибаи Тоҷикистон нишон дод, ки маърифати ҳуқуқӣ метавонад сабаби коҳиши низоъҳои ҳуқуқӣ, болоравии шаффофият ва эътимоди ҷомеа ба низоми қонунгузорӣ гардад.

Бо ба даст овардани ин натиҷаҳо, Ҷумҳурии Тоҷикистон пешниҳод кард, ки Маҷмаи Умумии Созмони Милали Муттаҳид “Соли байналмилалии маърифати ҳуқуқӣ”-ро эълон кунад. Ин пешниҳод нишон медиҳад, ки таҷрибаи миллӣ метавонад ҳамчун пойгоҳи муҳим барои рушди маърифати ҳуқуқӣ дар сатҳи байналмилалӣ хизмат кунад.

Дар шароити мураккаби ҷаҳонӣ, ки низоъҳо ва поймолшавии ҳуқуқҳои байналмилалӣ зиёд мешаванд, эълони “Соли байналмилалии маърифати ҳуқуқӣ” метавонад воситаи муассир барои таъмини риояи қатъии қонунҳо ва ҳалли осоиштаи низоъҳо бошад. Тавассути ин ташаббус, сатҳи масъулияти кишварҳо ва ҷомеаҳо дар муносибатҳои байналхалқӣ баланд шуда, фарҳанги шаффофият ва адолат густариш меёбад.

Аз ин рӯ, таҷрибаи Тоҷикистон намунаи равшанест, ки нишон медиҳад маърифати ҳуқуқӣ на танҳо як арзиши назариявӣ, балки як амали воқеӣ ва зарурист, ки метавонад ҳамчун заминаи устувори сулҳу субот ва ҳамкории байналмилалӣ хизмат кунад.

Пешниҳоди Тоҷикистон ба СММ барои эълони соли махсуси маърифати ҳуқуқӣ ба ҷомеаи ҷаҳонӣ имкон медиҳад, ки таваҷҷӯҳро ба масъалаҳои ҳуқуқӣ ва аҳамияти онҳо барои амният ва рушди устувор бештар равона кунад. Ин иқдом метавонад омили муҳими таҳкими низоми ҳуқуқӣ дар сатҳи байналмилалӣ гардад ва ба рушди ҳамкории созанда байни давлатҳо мусоидат намояд.

ИГАМОВА Ирода Худойбердиевна,

директори Коллеҷи омӯзгории ноҳияи Зафаробод,

номзади илмҳои филологӣ

Дар ҷаҳони муосир, ки тақдири давлатҳо ва ҷомеаҳо ба ҳам пайваставу вобаста шудааст, риояи меъёрҳои ҳуқуқи байналмилалӣ ба унсури асосии таъмини сулҳу субот ва устувории низоми ҷаҳонӣ табдил ёфтааст. Бо вуҷуди ин, имрӯз мо шоҳиди нодида гирифтани қонунҳои байналмилалӣ ва поймол шудани меъёрҳои ҳуқуқӣ ҳастем, ки ин амр ба мушкилоти густурда дар муносибатҳои байнидавлатӣ ва муноқишаҳои зиёд дар сатҳи ҷаҳон оварда мерасонад.

Дар ҳамин замина, Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ дар иҷлосияи 80-уми Маҷмаи Умумии Созмони Милали Муттаҳид пешниҳод намуданд, ки «Маҷмаи Умумии Созмони Милали Муттаҳид имконияти эълон намудани Соли байналмилалии маърифати ҳуқуқиро мавриди баррасӣ қарор диҳад». Ин пешниҳод яке аз иқдомҳои муҳими байналмилалӣ ба ҳисоб меравад, ки ҳадафи он таҳкими фарҳанги риояи қонун ва адолат дар арсаи ҷаҳонӣ мебошад.

Дар замоне, ки низоъҳои байнидавлатӣ бо шаклҳои гуногун авҷ мегиранд, аз ҷумла муноқишаҳои мусаллаҳона, тазоҳуротҳои сиёсӣ ва таҳримҳои иқтисодӣ, зарурати таъсиси механизмҳои муассири ҳалли низоъҳо бештар эҳсос мешавад. Ҳалли муноқишаҳо тавассути роҳҳои дипломатӣ ва мувофиқаи тарафайн яке аз василаҳои самараноки нигоҳ доштани сулҳ ва оромии ҷомеаҳои байналмилалӣ аст. Дар акси ҳол, ноқис будани маърифати ҳуқуқӣ ва эҳтиром надоштани меъёрҳои байналмилалӣ метавонад ба муноқишаҳои бештар, бад шудани вазъи башарӣ ва тағйирёбии манфии низоми ҷаҳонӣ оварда расонад.

Таълим ва паҳн кардани маърифати ҳуқуқӣ ҳамчун воситаи пешгирии нофаҳмӣ ва ихтилофот дар муносибатҳои байналхалқӣ нақши муҳим мебозад. Маълумоти кофӣ ва дуруст дар бораи ҳуқуқ ва уҳдадориҳои давлатҳо ва шахсони алоҳида метавонад муҳити эътимод ва ҳамкории созандаро дар ҷомеаи ҷаҳонӣ таҳким бахшад.

Ташаббуси Тоҷикистон, ки аз ҷониби Пешвои миллат муҳтарам Эмомалӣ Раҳмон пешниҳод гардид, барои эълон намудани «Соли байналмилалии маърифати ҳуқуқӣ» иқдоми муфид ва саривақтӣ мебошад. Бо чунин иқдом, сатҳи огоҳӣ дар байни кишварҳо ва ҷомеаҳои шаҳрвандӣ дар бораи аҳамияти риояи қонун ва ҳалли низоъҳо дар доираи ҳуқуқҳои байналмилалӣ метавонад боло равад. Ин пешниҳод, инчунин, таҳкими фарҳанги шаффофият ва адолатро ба хотир меорад, ки яке аз заминаҳои асосии рушди устувор ва сулҳу субот дар арсаи байналмилалӣ мебошад.

Сарвари давлати мо дар суханрониашон ҳамаи давлатҳои аъзои Созмони Милали Муттаҳидро даъват карданд, ки ба ин ташаббус ҳамроҳ шаванд ва барои таъмини иҷрои меъёрҳои ҳуқуқӣ дар сатҳи байналмилалӣ саъю талош кунанд. Ин даъват метавонад таъсири мусбат дар равандҳои дипломатӣ ва ҳуқуқӣ дошта бошад, ки ба таҷдиди эътимод ва ҳамкорӣ миёни кишварҳо мусоидат менамояд.

Яке аз мавзӯъҳои асосие, ки дар суханронии Президенти Тоҷикистон таъкид шуд, зарурати риояи қатъии қонунҳои байналмилалӣ ва ҳаллу фасли низоъҳо дар доираи қонун мебошад. Қонунҳои байналмилалӣ ҳамчун пояи асосии муносибатҳои байнимамлакатӣ ва воситаи ҳалли низоъҳо бояд эҳтиром ва риоя шаванд. Дар сурати вайроншавии ин меъёрҳо, низоъҳо ба вуҷуд меоянд, ки онҳо метавонанд ба таъсири манфӣ ба амнияти минтақа ва ҷаҳон, таъхири рушди иқтисодӣ ва эҳтимоли афзоиши хатарҳои башарӣ оварда расонанд.

Ба ҳамин тартиб, маърифати ҳуқуқӣ ҳамчун омӯзиши амиқ ва фаҳмиш дар бораи меъёрҳои ҳуқуқӣ, тарзи татбиқи онҳо ва василаҳои ҳалли низоъҳо дар доираи қонун, имконият медиҳад, ки ҷомеаҳо ва кишварҳо бо рӯҳияи ҳалли осоиштаи ихтилофот дар ҳаёти байналмилалӣ амал намоянд.

Хулоса, пешниҳоди эълони «Соли байналмилалии маърифати ҳуқуқӣ» як иқдоми муҳими байналмилалӣ ва таърихист, ки метавонад ба таҳкими фарҳанги ҳуқуқӣ, баланд бардоштани сатҳи огоҳии ҷомеаҳои ҷаҳонӣ ва таъмини сулҳу амният дар арсаи байналмилалӣ мусоидат кунад. Дар шароити мураккаби муноқишаҳо ва низоъҳои байналмилалӣ, ки ба оромии башарият таҳдид мекунанд, ин ташаббус метавонад ҳамчун пояи нави устувории низоми ҷаҳонӣ нақши муҳим бозад.

Бо ҳамроҳшавии кишварҳои аъзо ва таҳкими фарҳанги шаффофият ва адолат, Тоҷикистон барои таъмини муҳити сулҳҷӯёна ва муътадил дар сатҳи байналмилалӣ намунаи хубе пешкаш кардааст. Риояи қатъии меъёрҳои ҳуқуқи байналмилалӣ ва таҳкими маърифати ҳуқуқӣ бояд дар авлавияти сиёсати ҷаҳонӣ қарор гирад, то ояндаи дунё бо сулҳу субот ва пешрафти устувор таъмин гардад.

ШАРИФЗОДА Шамъигул Гадомад,

директори Коллеҷи омӯзгории шаҳри Бохтар

Дар замони муосир яке аз ҷиноятҳое, ки ба асосҳои сохтори конститутсионӣ ва амнияти давлат хавфи ҷиддӣ ба миён меоварад, ин ҷиноятҳои хусусияти террористӣ ва экстремистидошта мебошад. Тамоми давлатҳои дунё кӯшиш мекунанд, ки роҳи нави мубориза бар зидди ин зуҳуроти номатлуби ҷомеаро ҳарчи зудтар пайдо намуда, онро решакан намоянд. Ин ҷараёни хатарзо метавонад ба несту нобуд кардани халқиятҳо, миллатҳо ва давлатҳо оварда расонад. Аз таҳдиди ин зуҳуроти номатлуб тамоми ҷомеаи ҷаҳонӣ дар канор буда наметавонад.

Дар ҳақиқат ҳам, терроризм ва экстремизм ҳамчун вабои аср ба амнияти ҷаҳон ва ҳар як сокини сайёра таҳдид намуда, барои башарият хатари на камтар аз силоҳи ядроиро ба миён овардааст. Рӯз то рӯз терроризм ва экстремизм ба хатари глобалӣ табдил ёфта, ҷаҳони муосирро ба ташвиш овардааст.

Ифротгароӣ ва терроризм яке аз чунин зуҳуроти номатлуби замони муосир ба шумор рафта, мубориза бар зидди он қарзи ҳар як инсони комил мебошад. Терроризму экстремизм ҳамчун вабои аср ва дигар ҳодисаҳои номатлуб ба оромию амнияти сайёра ва пойдории давлат таҳдиду хатарҳо эҷод карда, амну осоиш ва ваҳдати халқу миллатҳоро барҳам мезанад. Ҳол он ки ҳеҷ ҷомеае бидуни таъмини амнияти иҷтимоӣ рушду такомул нахоҳад кард.

Воқеан, бар асари амалҳои террористӣ дар бисёр мамолики дунё одамони бегуноҳ ба ҳалокат расида, шаҳру деҳот ва ёдгориҳои беназири таърихӣ хароб мегарданд, зарари ба иқтисодиёти кишварҳо расонидашуда ба садҳо миллиард доллар баробар мегардад. Идомаи ин зуҳуроти номатлуб аз ҳар ҷиҳат хатарро дар пай дошта, на фақат боиси афзоиши таҳдиду хатарҳои сиёсиву иқтисодӣ, амниятӣ ва башариву фарҳангӣ, балки сабаби хурӯҷу афзоиши ҳар гуна бемориҳои сироятӣ дар тамоми минтақаҳои олам гардида, солимии ҷомеаро зери суол мебарад, инчунин, гаронии зиёдеро ба буҷети кишвар ворид месозад.

Айни замон зуҳури терроризм воқеияти муосири муносибатҳо буда, новобаста аз минтақаи истиқомат одамият метавонад ба амалҳои террористон дучор шавад. Мубориза алайҳи терроризм дар навъҳои гуногун сурат мегирад. Давлатҳои ҷаҳон роҳҳои зиёди мубориза бо онро пеш мегиранд, то ҳар чӣ зудтар аз ин падидаи номатлуб наҷот ёбанд. Аввалин кӯшиши мубориза ба муқобили терроризмро Лигаи Миллатҳо соли 1937 дар асоси қабули Конвенсия «Оид ба пешгирии терроризм ва муҷозот барои амалиёти террористӣ» ба миён оварда буд.

Дар тӯли даҳсолаҳои охир, ҷомеаи ҷаҳонӣ таҳти сарпарастии Созмони Милали Муттаҳид як қатор ҳуҷҷатҳои меъёрии ҳуқуқии универсалӣ таҳия намудааст, ки шумори онҳо беш аз 13 конвенсия ва якчанд протоколҳои иловагӣ, инчунин як қатор қатъномаҳои Шӯрои Амнияти Созмони Милали Муттаҳид дар бораи терроризм ва мубориза зидди ин падидаи манфурро дар бар мегиранд. Дар якҷоягӣ, онҳо ҳимоякунандаи чархи умумиҷаҳонии мубориза алайҳи терроризмро ташкил медиҳанд.

Аз таҳлили конвенсияҳо ва дигар ҳуҷҷатҳои байналмилалӣ, ки дар доираи Созмони Милали Муттаҳид дар соҳаи мубориза бар зидди терроризми байналмилалӣ қабул шудаанд ба хулоса омадан мумкинаст, ки ин ташкилоти бонуфузи байналмилалӣ тӯли солҳо заминаи ҷиддии ҳуқуқиро барои мубориза бо терроризми байналмилалӣ фароҳам овардааст. Давлатҳои аъзои Созмони Милали Муттаҳид мебояд саъй кунанд, ки барои мувофиқат ва бастани конвенсияи ҳамаҷониба дар бораи терроризми байналмилалӣ, аз ҷумла ҳалли масъалаҳои ҳалнашуда дар мавриди таърифи ҳуқуқии миқёси дар асоси ин конвенсияҳои фарогир муносибат намоянд, то ки онҳо ҳамчун воситаи муассири мубориза бо терроризм хидмат кунад.

Терористҳоро умуман ба ду гурӯҳ тақсим намудаанд. Террористони муътақид ва террористони муздур ё худфурӯхта. Махсусан ҳамаи гурӯҳҳои террористоию экстремисти, ин гурӯҳое ҳастанд, ки аз номи дини мубини ислом баромад намуда номи дини Исломро дар назари ҷаҳониён ҳамчун як дини қатлу куштор ва бераҳм нишон медиҳанд.Дар ҳоле,ки дини Ислом пайравони худро ҳамеша бо панду насиҳат, илму маърифат, дустиву бародарӣ, ватандӯстиву ватанпарварӣ ва инсондӯстӣ даъват менамояд.

Дар мубориза бар зидди терроризми байналмилалӣ, Ҷумҳурии Тоҷикистон дар доираи созмонҳои бонуфузи сатҳи минтақавӣ ва байналмилалӣ ҳамкориҳоро ба роҳ монда, дар коҳиш ва пешгирии таҳдидҳои дорои хусусияти террористӣ дошта саҳми назаррас дорад. Ҳамкории минтақавӣ мушкилоти умумиро тавассути такмили ҳамоҳангсозӣ, мубодилаи иттилоот ва таҷрибаи пешқадам ҳал менамояд. Иҷрои қарорҳои муштараки қабулшуда дар доираи созмонҳои минтақавӣ ва ҷаҳонӣ ба таҳкими сулҳ ва субот дар соҳаи масъулияти ин созмонҳо, аз ҷумла дар Тоҷикистон, мусоидат мекунад.

Ҷумҳурии Тоҷикистон низ ҳамчун узви баробарҳуқуқи ҷомеаи ҷаҳонӣ нисбат ба чунин проблемаҳои глобалӣ бетараф набуда, бар зидди хатарҳои замони имрӯза ҳамчун дигар давлатҳои дунё ҳадафмандона талошҳои худро амалӣ намуда, дар ин самт омодагии худро бо андешидани тадбирҳои мушаххас ва муборизаи самарабахш пайваста ифода менамояд.

Ман ҳамчун як омӯзгори асил,- дустон, ҳаммаслакони худро даъват менамоям, ки ҳама якҷо муттаҳид дар зери сиёсати ҷавонпарвари Асосгузори сӯлҳу ваҳдати милӣ, Пешвои миллат, Призиденти Ҷумҳурии Тоҷикистон муҳтарам Эмомалӣ Раҳмон ҷамъ омада нагузорем, ки ягон гурӯҳе, ягон нафаре аз ин гурӯҳои террористию экстремистӣ ба мақсадҳои нопоки худ бирасанд ва оромию суботи Ватани азизамонро халалдор созанд. Шиори мо ҳамеша бояд ҳамин бошад: «НЕСТ БОД ТЕРРОРИЗМ…»

КАРИМОВА Сафаргул Одинаевна,

омӯзгори Коллеҷи тиббии ҷумҳуриявӣ

Дар замони муосир, ки равандҳои ҷаҳонишавӣ ва пешрафти технология бо суръати баланд идома доранд, яке аз хатарҳои бузург ва мубрами башарият зуҳури терроризм ва экстремизм мебошад. Ин ду падидаи номатлуб на танҳо амният ва суботи давлатҳоро халалдор месозанд, балки барои ҳаёти осоиштаи мардум, рушду тараққиёти иқтисодӣ ва фарҳангии ҷомеа таҳдиди ҷиддӣ ба ҳисоб мераванд.

Терроризм истифодаи зӯроварӣ, тарсондан ва амалиёти хунин бо ҳадафи расидан ба манфиатҳои сиёсӣ, динӣ ё идеологӣ мебошад. Мақсади аслии он на танҳо расонидани зарари ҷисмонӣ, балки шикастани руҳияи мардум ва паҳн кардани ваҳму изтироб дар ҷомеа аст.

Экстремизм бошад ҷаҳонбинӣ ва андешаҳои шадид ва радикалиест, ки бо роҳҳои ифротӣ талош мекунанд, мардумро ноором созанд. Экстремизм аксар вақт замина барои ба амал омадани терроризм мегардад. Фарқият дар он аст, ки экстремизм бештар ба шакли ғоя ва ақида зуҳур мекунад, вале терроризм амал ва татбиқи ин ғояҳо тавассути хушунат мебошад.

Бесаводию ноогоҳӣ яке аз сабабҳои асосӣ ба шумор меравад, зеро ин ду ҷавононро ба доми гурӯҳҳои радикалӣ меандозад. Таблиғоти радикалӣ тавассути интернет ва шабакаҳои иҷтимоӣ ҷавононро ба роҳи хатарнок мебарад. Бесаводӣ ва набудани маърифати ҳуқуқӣ низ омилест, ки шаҳрвандонро зуд ба роҳи ғалат мебарад. Муноқишаҳои минтақавӣ ва ҷаҳонӣ шароити мусоид барои фаъолияти гурӯҳҳои террористиро фароҳам меоранд.

Ин падидаҳо боиси талафоти инсонӣ мегарданд, зеро одамони бегуноҳ кушта ё маҷрӯҳ мешаванд. Онҳо ба иқтисодиёт низ зарари бузург мерасонанд, чунки инфрасохтор хароб мешавад ва сармоягузорӣ коҳиш меёбад. Суботи сиёсӣ халалдор мегардад ва эътимоди мардум ба ниҳодҳои давлатӣ суст мешавад. Дар ҷомеа тарсу изтироб паҳн шуда, ихтилофи динӣ ва этникӣ ба вуҷуд меояд.

Барои муқовимат бо терроризм ва экстремизм пеш аз ҳама, баланд бардоштани маърифат муҳим аст. Таълим ва тарбия бояд дар руҳияи таҳаммулпазирӣ, дӯстӣ ва эҳтироми арзишҳои миллӣ ва инсонӣ сурат гирад. Дастгирии ҷавонон низ зарур аст, зеро бо фароҳам овардани ҷойҳои корӣ ва ҷалби онҳо ба варзиш ва фарҳанг метавон роҳи радикализатсияро баст. Қонунгузории қавӣ ва ҷазо додани шахсоне, ки бо терроризм алоқаманданд, нақши муҳим мебозад. Муборизаи иттилоотӣ дар интернет ва ҳамкории байналмилалӣ низ яке аз роҳҳои муассири пешгирист.

Терроризм ва экстремизм мушкилоти умумии ҷаҳонӣ буда, онҳо танҳо бо талоши давлатҳо ҳал намешаванд. Ҷомеаи шаҳрвандӣ, муассисаҳои таълимӣ ва ҳар як шахс бояд дар мубориза саҳм гузорад. Баланд бардоштани сатҳи маърифат, таъмини адолати иҷтимоӣ ва ҳамкории ҳамаҷониба калиди асосии таъмини суботи миллӣ ва амнияти ҷомеа мебошад.

Замира САМАДОВА,

мудири кафедраи таърих ва ҷомеашиносии

Коллеҷи омӯзгории ба номи Хосият Махсумова