ҚОНУНИ ҶУМҲУРИИ ТОҶИКИСТОН «ДАР БОРАИ МАҚОМИ ОМӮЗГОР» СИПАРЕ БАРОИ ОМӮЗГОРОН!
2025-11-03 11:15:25
Қабули Қонуни Ҷумҳурии Тоҷикистон «Дар бораи мақоми омӯзгор» яке аз рӯйдодҳои муҳими сиёсиву иҷтимоии даврони Истиқлолияти давлатӣ ба шумор меравад. Ин санади муҳим ба таҳкими нуфуз ва мақоми омӯзгор дар ҷомеа, баланд бардоштани масъулият, ҳимояи ҳуқуқ, манфиат ва эътибори иҷтимоии устодон нигаронида шудааст.
Омӯзгор - пояи давлат, меъмори маърифат ва бунёдгузори ҷомеаи огоҳ аст. Бе омӯзгор на дониш ҳаст, на фарҳанг, на пешрафт. Аз ин рӯ, қабул гардидани ин қонун — сипари боэътимод барои ҳифзи манзалат ва заҳмати омӯзгорон мебошад.
Бо ташаббус ва ғамхориҳои пайвастаи Пешвои муаззами миллат, муҳтарам Эмомалӣ Раҳмон, соҳаи маориф ҳамеша дар мадди аввал қарор дорад. Роҳбарияти давлат бо хирадмандӣ таъкид менамояд, ки бе омӯзгор ҷомеаи пешрафта сохта намешавад. Аз ин рӯ, давлат шароити заруриро барои фаъолияти самараноки устодон фароҳам меорад.
Имрӯз муассисаҳои таълимӣ дар кишвар бо таҷҳизоти замонавӣ муҷаҳҳаз гардида, маоши омӯзгорон тадриҷан меафзояд, барномаҳои таълимӣ ва усулҳои дарсдиҳӣ такмил меёбанд. Ин ҳама аз сиёсати устувори давлат дар самти рушди соҳаи маориф шаҳодат медиҳад.
Қонуни мазкур на танҳо як санади меъёрии ҳуқуқӣ, балки эълони эҳтиром ва арҷгузорӣ ба заҳмати омӯзгор аст. Он омӯзгоронро ба масъулиятшиносӣ, ватандӯстӣ ва садоқат ба касб бештар ҳидоят менамояд.
Бигзор омӯзгорони тоҷик бо ифтихор гӯянд, ки давлату миллат қадри онҳоро медонад ва меҳнаташонро пос медорад.
Зеро омӯзгорон - сохтмончиёни рӯҳи инсон, тарбиятгарони насли оянда ва сипари маърифатанд.
Зиҳӣ омӯзгор! Зиҳӣ муаллим! Зиҳӣ соҳаи илму маърифат!
Дар зери парчами Истиқлол ва сиёсати маорифпарваронаи Пешвои миллат, омӯзгорони тоҷик бо дили сӯхта, виҷдони бедор ва иродаи қавӣ барои фардои дурахшони Ватан заҳмат мекашанд.
Очилов Лутфулло Рузибегович, омӯзгори Коллеҷи тиббӣ-иҷтимоии шахри Бохтар
