БАРОИ ТАҲИЯ НАМУДАНИ КИТОБҲОИ ДАРСИИ ФАНҲОИ ТАХАССУСӢ ҶАЛАСА ДОИР ГАРДИД
2024-07-27 12:46:06
Санаи 24 июли соли равон таҳти раёсати Раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон академик Фарҳод Раҳимӣ, бо иштироки муовинони раис Давлатзода Баҳрулло, Алишер Ализода, раёсату шуъбаҳои дахлдори дастгоҳи марказии кумита, директорон ва омӯзгорони муассисаҳои таҳсилоти ибтидоӣ ва миёнаи касбӣ ҷаласаи Гуруҳи кории дохилиидоравӣ ҷиҳати таҳия, тарҷума ва нашри китобҳои дарсии соҳавӣ баргузор гардид.
Дар ҷаласа академик Фарҳод Раҳимӣ, таваҷҷуҳи иштирокдоронро ба масъалаи омода намудани китобҳои дарсӣ, тибқи Дастурамал оид ба таҳияи адабиёти таълимӣ зимни таълифи китобҳои дарсӣ ҷалб намуда, таъкид намуд, ки директорони муассисаҳои таълимии таҳсилоти ибтидоӣ ва миёнаи касбӣ, ки ҳамчун муассисаҳои заминавӣ муайян карда шудаанд, дар таҳия ва тарҷумаи китобҳои дарсии фанҳои тахассусӣ бо мутахассисон ҳамкориро ба роҳ монанд.
Таъкид гардид, ки таъмини хонандагон бо китоби дарсӣ ба боло бурдани сифати таълим ва беҳтар намудани сифати таҳсилот дар муассисаҳои таълимӣ мусоидат менамояд.
Дар фарҷоми ҷаласа, аз ҷониби Раиси кумита ба аъзои Гуруҳи кории дохилиидоравӣ ва директорони муассисаҳои таҳсилоти ибтидоӣ ва миёнаи касбӣ барои саривақт таҳия ва тарҷума намудани китобҳои дарсӣ ва модулҳои таълимӣ дастуру супоришҳои мушаххас дода шуд.
