Дар Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон вохӯрии академик Фарҳод Раҳимӣ бо Директори Ташкилоти байналмилалии Агроаксияи Олмон Ёоханнес Калтенбах баргузор гардид.

    Нахуст академик Фарҳод Раҳимӣ меҳмононро ба Ҷумҳурии Тоҷикистон ва Кумита хайрамақдам гуфта, дар бораи фаъолияти Кумита маълумоти муфассал пешниҳод намуда, таъкид дошт, ки дар Ҷумҳурии Тоҷикистон 63 муассисаи таҳсилоти ибтидоии касбии давлатӣ ва 2 муассисаи ғайридавлатӣ фаъолият доранд, ки шаҳрвандони кишварро барои бо шуғлу касбҳои талаботи замони муосир таъмин намудан талош меварзанд.

    Кумита оид ба таҳсилоти ибтидоӣ ва миёнаи касбӣ дар оянда талош меварзад, ки бо дастгирии Ҳукумати Ҷумҳурии Тоҷикистон дар ҳамкорӣ бо шарикони рушд муассисаҳои таҳсилоти ибтидоии касбиро бо таҷҳизоту техникаи муосир таъмин намояд.

    Ёоханнес Калтенбах, Директори Ташкилоти байналмилалии Агроаксияи Олмон барои пазироӣ ва меҳнавозии хоси тоҷикона изҳори миннатдорӣ намуда, аз ҳамкориҳои судманди Тоҷикистону Олмон ҷиҳати соҳибкасб намудани шаҳрвандон ёдовар гардид. Зикр гардид, ки Ташкилоти байналмилалии Агроаксияи Олмон дар доираи ҳамкориҳо дар деҳаи Вранги ноҳияи Ишкошими ВМКБ Муассисаи давлатии Литсейи касбии техникиро пурра азнавсозӣ намуда, онро бо техника ва таҷҳизотҳои муосир таъмин ва ба истифода медиҳад. Ҳамзамон, ташкилоти мазкур ният дорад, ки дар ояндаи наздик дар ноҳияи Лахш Литсейи касбии технкӣ бо муосиртарин таҷҳизот сохта мавриди истифода қарор диҳад.

    Дар рафти вохӯрӣ Фарҳод Раҳимӣ ба Директори Ташкилоти байналмилалии Агроаксияи Олмон Ёоханнес Калтенбах барои дастгириҳои пайваста изҳори миннатдорӣ намуда, пешниҳод кард, ки дар доираи имкониятҳои ташкилот дар ноҳияи Шамсиддин Шоҳин низ ҷиҳати таъсиси Литсейи касбии техникӣ мусоидат намоянд.

    Аз ҷониби Директори Ташкилоти байналмилалии Агроаксияи Олмон Ёоханнес Калтенбах пешниҳоди мазкур хуб пазируфта шуда, таъкид гардид, ки дар ояндаи наздик сохтмони муассисаи мазкур ба нақша гирифта мешавад.

    Маврид ба зикр аст, ки Ташкилоти байналмилалии Агроаксияи Олмон аз соли 1994 дар Ҷумҳурии Тоҷикистон фаъолият намуда, шуруъ аз соли 2015 дар бахши таҳсилоти ибтидоии касбӣ ва таҳсилоти калонсолон дар Тоҷикистон саҳм гузошта истодааст.

    Дар анҷоми вохӯрӣ байни Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон ва Ташкилоти байналмилалии Агроаксияи Олмон Ёддошти тафоҳум ба имзо расид.