АНҶУМАНИ ЯКУМИ КУМИТАИ ИТТИФОҚИ КАСАБАИ КОРМАНДОНИ СОҲАИ ТАҲСИЛОТИ ИБТИДОӢ ВА МИЁНАИ КАСБӢ БАРГУЗОР ГАРДИД

Имрӯз дар дар Колеҷи техникии ДТТ ба номи М. Осимӣ Анҷумани якуми Кумитаи иттифоқи касабаи кормандони соҳаи таҳсилоти ибтидоӣ ва миёнаи касбӣ баргузор гардид.

Дар кори ҷаласа Бунёд Зиёзода, Раиси Кумитаи иттифоқи касабаи кормандони соҳаи таҳсилоти ибтидоӣ ва миёнаи касбӣ, Фарҳод Раҳимӣ, Раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, муовинони раис, сардорони раёсатҳои дастгоҳи марказии Кумита, роҳбарони муассисаҳои таҳсилоти ибтидоӣ ва миёнаи касбии шаҳри Душанбе, раисони иттифоқҳои касабаи муассисаҳои таҳсилоти ибтидо ва миёнаи касби иштирок намуданд.

Нахуст академик Фарҳод Раҳимӣ, Раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон, ҳамаи кормандонро ба муносибати 30-юмин солгарди қабули Конститутсияи Ҷумҳурии Тоҷикистон табрик гуфта, қайд кард, ки бо шарофати қабули ин ҳуҷҷати муҳим дар кишвари мо барои таҳсил намудан ва соҳиби касби дилхоҳ шудан ҳама шароитҳо муҳайёст.

“Конститутсия соҳибмаълумот шудани ҳар узви ҷомеаро кафолат медиҳад. Аз ин рӯ, махсусан насли ҷавони кишварро, ки қисми бештари аҳолиро ташкил медиҳанд, лозим аст, аз неъматҳои даврони соҳибистиқлолӣ пурсамар истифода бурда, ҳамчун насли шоистаи замон ва донандаи забонҳои хориҷию соиби ҳунарҳои воло ба воя расад”, - гуфт академик Фарҳод Раҳимӣ.

Дар идомаи нишаст Бунёд Зиёзода, Раиси Кумитаи иттифоқи касабаи кормандони соҳаи таҳсилоти ибтидоӣ ва миёнаи касбӣ, суханронӣ намуда, қайд кард, ки инкишофи дилхоҳ ниҳоди муҳим бе фаъолияти иттифоқи касаба кормандони он имконнопазир мебошад, зеро Кумитаи иттифоқи касаба ягона ташкилоти ҷамъиятии расмие мебошад, ки ҳуқуқу манфиатҳои ҳамаи кормандони муассисаю корхонаҳоро ҳимоя менамояд. Аз ин рӯ, чанде қабл дар наздии Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон ниҳоди нави ҷамъиятии расмӣ - Кумитаи иттифоқи касабаи кормандони соҳаи таҳсилоти ибтидоӣ ва миёнаи касбӣ ба фаъолият шуруъ намуд.

Таъкид гардид, ки минбаъд ҳамаи муассисаҳои зерсохтори Кумита оид ба таҳсилоти ибтидоӣ ва миёнаи касбӣ аъзои Кумитаи иттифоқи касабаи кормандони соҳаи таҳсилоти ибтидоӣ ва миёнаи касбӣ шуда, Иттифоқи касаба барои ҳифзи мақсадҳои касбӣ, меҳнатӣ, ҳуқуқ ва манфиатҳои иҷтимоӣ - иқтисодии аъзои Иттифоқ дар оянда тамоми талоши худро равона карда, барои фароҳам овардани шароит барои баланд бардоштани сатҳи зиндагии аъзои иттифоқи касаба ва аҳли оилаи онҳо мусоидат мекунад

Зикр карда шуд, ки Иттифоқи касабаи кормандони соҳаи таҳсилоти ибтидоӣ ва миёнаи касбии Ҷумҳурии Тоҷикистон ташкилоти ҷамъиятии ихтиëрӣ ва мустақил буда, кормандони ҳамаи муассисаҳои соҳаи таҳсилоти ибтидоӣ ва миёнаи касбӣ, сохторҳои Кумита оид ба таҳсилоти ибтидоӣ ва миёнаи касбӣ ва дигар ниҳодҳоеро, ки бо фаъолияти илмию таълимӣ дар самти таҳсилоти ибтидоӣ ва миёнаи касбӣ, инчунин донишҷуён, хонандагони муасисаҳои таҳсилоти ибтидоӣ ва миёнаи касбиро муттаҳид менамояд.